Malo o le Atua​—Le Māfuaaga e Tāua ai iā Iesu

Pe afai na e mātauina i le mataupu muamua atu, sa taulaʻi atu le olaga o Iesu i le “talaʻi ma folafola atu le tala lelei o le malo.” (Luka 8:1) Na savali o ia i le faitau selau o maila i Isaraelu ina ia aʻoaʻo tagata i le Malo o le Atua. O loo faamauina lana galuega talaʻi i tusi e fā o Evagelia, ma e silia ma le 100 taimi o loo taʻua ai le Malo i na tusi. O le tele o na faamatalaga e faatatau i le Malo e maua i fetalaiga a Iesu, ma atonu e tele atu isi ana fetalaiga e faatatau i le Malo e lē o faamauina i tusi o Evagelia!​—Ioane 21:25.

Aiseā na tāua ai iā Iesu le Malo a o iai i le lalolagi? O se tasi o māfuaaga, na silafia e Iesu ua filifilia o ia e le Atua e avea ma Pule po o le Tupu o lenā Malo. (Isaia 9:6; Luka 22:28-30) Peitaʻi, e leʻi taulaʻi atu Iesu i le mauaina o le mana ma le viiga mo ia lava. (Mataio 11:29; Mareko 10:17, 18) Na ia faalauiloa atu le Malo e aunoa ma se faanaunauga manatu faapito. Sa naunau Iesu i le Malo o le Atuaa ona o mea o le a faia e le Malo mo ē e alofa i ai e pei o lona Tama, ma ona soo faamaoni.

MEA O LE A FAIA E LE MALO MO LONA TAMĀ

E alofa tele Iesu i lona Tamā i le lagi. (Faataoto 8:30; Ioane 14:31) E na te talisapaia uiga lelei o lona Tamā e pei o le alofa mutimutivale ma le faamasinotonu. (Teuteronome 32:4; Isaia 49:15; 1 Ioane 4:8) E mautinoa le lē fiafia o Iesu i pepelo e faatatau i lona Tamā e faapea, e lē ano mai le Atua ma e finagalo ia tatou mafatia. O se tasi lenā o māfuaaga na naunau ai Iesu e folafola atu le “tala lelei o le malo,” auā na ia silafia o le a aveesea e le Malo tala pepelo e faatatau i lona Tamā. (Mataio 4:23; 6:9, 10) E faapefea ona faataunuu e le Malo lenā tulaga?

E ala mai i le Malo, o le a faia ai e Ieova suiga tetele i le lalolagi, ma maua ai e tagata uma aogā. O le a ia “soloiesea foʻi loimata uma” mai mata o ana auauna faamaoni. O le a aveesea e Ieova le pogai o loimata, ma ua ia faamautinoa mai “e lē toe iai se oti, po o se faanoanoa, po o se tagiauē, e lē toe iai foʻi se tigā.” (Faaaliga 21:3, 4) O le a aveesea e le Atua mafatiaga uma o tagata e ala mai i le Malo.b

E lētioa a naunau Iesu e faailoa atu i tagata le Malo, auā o le a faaalia mai ai le malosi ma le alofa mutimutivale o lona Tamā. (Iakopo 5:11) Na silafia foʻi e Iesu o le a maua ai e tagata faamaoni aogā.

MEA O LE A FAIA E LE MALO MO TAGATA FAAMAONI

Sa soifua Iesu faatasi ma lona Tamā i le lagi, a o leʻi taitai afio mai i le lalolagi. Sa faaaogā e le Tamā lona Alo e foafoaina isi mea uma e pei o le lagi, fetu, aniva, le lalolagi ma le anoanoaʻi o meafaiola o loo iai. (Kolose 1:15, 16) E ui lava i na mea uma, ae sa ʻmatuā fiafia Iesu i le fanau a tagata.’​—Faataoto 8:31.

Sa mātaulia le galuega talaʻi a Iesu ona o lona alofa i tagata. Sa ia faailoa manino mai ua māfua ona sau i le lalolagi, ina ia “folafola le tala lelei” i tagata. (Luka 4:18) E tele taimi na faaalia ai i gaoioiga a Iesu lona alofa i tagata, nai lo o le tau ina talanoa e fesoasoani atu iā i latou. O se faataʻitaʻiga, ina ua potopoto se motu o tagata e faalogologo iā te ia, ona ʻtigā alofa lea o ia iā i latou, ma ia faamālōlō ai o latou tagata mamaʻi.’ (Mataio 14:14) Ina ua faaalia foʻi e se tamāloa na mafatia i se maʻi lona faatuatua e mafai e Iesu ona faamālōlō o ia, na uunaʻia Iesu i le alofa ma faapea atu: “Ou te loto i ai. Ia mamā ia oe.” (Luka 5:12, 13) Ina ua silasila atu foʻi o ia i le faavauvau o Maria ona o le maliu o lona tuagane o Lasalo, sa ʻōi ma ootia lona finagalo’ ona “tagi” ai lea o ia. (Ioane 11:32-36) O le iʻuga, sa ia faia se vavega uigaese o le toe faatūina mai o Lasalo mai i le oti, e ui ua fā aso talu ona iai i le tuugamau!​—Ioane 11:38-44.

O le mea moni, na silafia e Iesu e lē tumau le mapusaga na ia ofo atu i tagata i lenā taimi, auā na toe mamaʻi i latou uma na ia faamālōlō, ma toe maliliu ē na ia faatutūina. Peitaʻi, na ia silafia o le a aumaia e le Malo o le Atua le mapusaga tumau mo faafitauli o tagata. O le māfuaaga lea e na te leʻi faia ai na o faamālōlōga, ae na ia maelega foʻi e “talaʻi atu le tala lelei o le malo.” (Mataio 9:35) O faamālōlōga na ia faia, o sina faaataga lenā o mea ua toeitiiti faia e le Malo o le Atua i le lalolagi. Seʻi mātau nisi o folafolaga a le Tusi Paia e faatatau i lenā taimi.

• 

  E lē toe iai ni maʻi.

  “O lea foʻi taimi o le a faapupulaina ai mata o ē ua pō le vaai, ma o le a faalogo foʻi taliga o ē e tutuli. O le a osooso ai lē ua pipili e pei o le ʻaila, e alaga fiafia le laulaufaiva o lē ua gūgū.” E lē gata i lea, “e lē fai mai foʻi se tasi ua nofo ai: ʻOu te maʻi.’”​—Isaia 33:24; 35:5, 6.

• 

  E lē toe iai se oti.

  “E fai lava le lalolagi mo ē e amiotonu, e nonofo ai pea i latou e oo i le faavavau.”​—Salamo 37:29.

  “O le a faaumatia e ia le oti e faavavau, o le a soloiesea foʻi e le Alii Pule Silisili Ese o Ieova loimata mai i mata uma.”​—Isaia 25:8.

• O le a toetutū mai i latou ua maliliu.

  ʻE faalogo i latou uma o loo i tuugamau i lona leo, ma latou ō mai ai.’​—Ioane 5:28, 29.

  “E toetutū mai tagata.”​—Galuega 24:15.

• 

  O le a maua fale ma galuega.

  “O le a latou fausia fale ma nonofo ai; e latou te totō foʻi togāvine ma latou aai i ona fua. O le a latou lē fausia ae e nonofo ai isi; o le a latou lē totō ae e aai ai isi. . . . O le a matuā fiafia uma oʻu tagata ua filifilia i galuega a o latou lima.”​—Isaia 65:21, 22.

• 

  E lē toe iai ni taua.

  “Ua ia faaiʻuina taua i tuluʻiga o le lalolagi.”​—Salamo 46:9.

  “E lē toe sii le pelu e le tasi atunuu i le tasi atunuu, pe latou te toe aʻoaʻo foʻi i taua.”​—Isaia 2:4.

• 

  O le a tele meataumafa.

  “E fua mai lava e le laueleele ona fua; e faamanuia foʻi i matou e le Atua, o lo matou Atua.”​—Salamo 67:6.

  “O le a tele saito i le laueleele; o le a fau ma soloi i tumutumu o mauga.”​—Salamo 72:16.

• E lē toe iai se mativa.

  “E lē faagaloina pea o lē e mativa.”​—Salamo 9:18.

  “Auā e laveaʻi e ia le tagata mativa o loo tagi mai mo se fesoasoani, atoa foʻi ma lē ua mafatia ma lē ua leai sona fesoasoani. E tigā alofa o ia i lē ua faatauvaa ma lē ua mativa, e faaola foʻi e ia o ē ua matitiva.”​—Salamo 72:12, 13.

Pe a e iloiloina nei folafolaga e faatatau i le Malo o le Atua, po ua e iloa la le māfuaaga e tāua ai iā Iesu le Malo? A o soifua o ia i le lalolagi, na ia matuā naunau e talanoa atu e uiga i le Malo i so o se tagata, auā na ia silafia o le a aumaia e le Malo le mapusaga i faafitauli o loo fesagaʻia e tagata i aso nei.

Pe e logolelei iā te oe folafolaga mai i le Tusi Paia e faatatau i le Malo? Pe afai o le tulaga lenā, e faapefea ona e aʻoaʻo atili e faatatau i le Malo? O le ā e tatau ona e faia ina ia maua ai aogā mai i na faamanuiaga? O le a taliina na fesili i le mataupu o sosoo mai.