Pe a Tupu se Mala

“O matou faalogona muamua lava o le leai o se faamoemoe. Ua faaleagaina uma a matou meafaitino e se eleele solo ma lologa.”—Andrew , Sierra Leone.

“Ina ua māeʻa le afā na matou toe foʻi i o matou aiga. Leai ma se mea na totoe. Ua matou lē magagana. Na faapaʻū ifo si oʻu afafine i ona tulivae ma tagi masūsū.”—David, Virgin Islands.

PE AFAI na e aafia muamua i se mala, e te ono malamalama foʻi la i faalogona o isi na faasaoina mai: lē mautonu, faateʻia, lē talitonu i le mea ua tupu, popole, ma ua iai miti lē lelei. O le toʻatele o ē na sao mai ua lotovaivai ma lē lavavā, ma ua oo lava ina leai se uunaʻiga e taumafai ai e toe faaleleia lo latou tulaga.

Pe afai sa e aafia i se mala, e te ono lagona foʻi ua lē mafai ona e onosaia nisi popolega. E ono amata ai foʻi ona e lagona ua leai se aogā e ola ai. Peitaʻi, o loo faamatalaina i le Tusi Paia e iai le tāua o le ola pea, ma e mafai ona e maua se faavae mausalī mo le faamoemoe i se lumanaʻi e sili atu ona lelei.

O LE UPU MONI I LE TUSI PAIA E AUMAIA AI IĀ I TATOU LE FAAMOEMOE

Ua faapea mai le Failauga 7:8: “E sili ona lelei le faaiʻuga o se mataupu nai lo o lona amataga.” Pe a faatoʻā amata ona e faaleleia lou tulaga mai i se mala, e ono foliga mai ua leai se faamoemoe o le olaga. Ae a o e onosaʻi ma galue mamafa e toe faafoʻi lou olaga i le mea sa iai muamua, o le a mafai ona toe faaleleia le tulaga o mea.

O loo valoia i le Tusi Paia se taimi “e lē toe lagonaina . . . le leo o le tagiauē po o le leo o le tagi faanoanoa.” (Isaia 65:19) O le a moni lenei tulaga pe a suia le lalolagi i se parataiso i le pulega a le Malo o le Atua. (Salamo 37:11, 29) O le a lē toe iai ni mala. O so o se tigā o le tino ma faalogona e ono aafia ai se tasi mo se taimi umi, o le a soloia e faavavau, ona ua folafola mai e Le Atua o lē e ona le malosi uma lava: “E lē toe manatua mea sa iai muamua, e lē toe alu aʻe foʻi i le loto.”—Isaia 65:17.

Seʻi manatu: Ua fuafuaina e Lē na foafoaina mea “ia avatu iā te [oe] se lumanaʻi ma se faamoemoe,” o se olaga filemu i le pulega lelei atoatoa a le Atua. (Ieremia 29:11) Pe e fesoasoani lou iloaina o lenei upu moni e faatāua ai pea lou ola? Ua faapea mai Sally lea na taʻua i le mataupu ua mavae, “O le toe faamanatu mai pea o mea silisili o le a faia e le Malo o le Atua mo i tatou i le lumanaʻi, e fesoasoani iā oe e faagalo ai mea ua tuanaʻi ma onosaia ai le tulaga o mea ua iai nei.”

E valaaulia oe e aʻoaʻo atili e uiga i mea o le a toeitiiti faia e le Malo o le Atua mo tagata. O le faia faapea e faamautinoa atu ai e ui i mafatiaga na e aafia ai mai se mala, ae e tāua le ola pea a o e faatalitali ma le onosaʻi i se lalolagi e aunoa ma ni mala. Ae i le taimi lenei, ua saunia mai i le Tusi Paia taʻitaʻiga aogā e fesoasoani e te feagai ai ma āuga o se mala. Seʻi iloilo nisi o faaaʻoaʻoga.

O Mau o le Tusi Paia e Maua ai Fautuaga Lelei

Ia lava le mālōlō.

“E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.”—Failauga 4:6.

Na lipotia mai e se ʻau suʻesuʻe, pe a māeʻa se mea mataʻutia na tupu, e faateteleina faafitauli tau faalogona pe a lē lava lelei le moe. O lea la, o se gaoioiga atamai le lava o le mālōlō.

Ia faailoa atu ou faalogona.

“O popolega i le loto o le tagata e faavaivai ai le loto, a o tala lelei e olioli ai le loto.”—Faataoto 12:25.

Ia talanoa atu i se sui o lou aiga po o se uō maufaatuatuaina. E faaopoopo atu i le faalogologo lelei, e mafai ona saunia e sui o le aiga po o uō vavalalata faalaeiauga ma avatu se fesoasoani manaʻomia.a

Ia mafaufau i le taimi o le a faaleleia ai mea uma.

“E tatou te faatalitali i le lagi fou ma le lalolagi fou, e tusa ma folafolaga [a le Atua], e mau ai le amiotonu.”—2 Peteru 3:13.

a O se tagata o loo aafia i popolega faaumiumi e ono manaʻomia ona saʻilia togafitiga faafomaʻi.