Au Faigaluega Agavaa e Faaaogā Tonuina le Afioga a le Atua
1 Ua saʻo ona faasino i faifeau Kerisiano o se “au faigaluega . . . faatasi ma le Atua.” (1 Kori. 3:9) E tatau ona fai ma o tatou sini le atiina aʻe o agavaa o ni tagata faigaluega o ē “vaevaetonuina le upu moni.”—2 Timo. 2:15.
2 Ina ia fesoasoani ia i tatou e agavaa i le faiva Kerisiano, ua faaaofia e le Sosaiete nai vala tutasi i le New World Translation of the Holy Scriptures. O e masani ia i latou? Afai e te malamalama i le gagana faa-Peretania, pe ua e faaaogāina nei vala i lau faiva i le fanua ma i au suesuega totino o le Tusi Paia?
SE SAUNIUNIGA MAU FETUUNAI
3 Ina ua tatalaina le New World Translation of the Christian Greek Scriptures i le 1950, sa tatou iloa ai le fesoasoani tele o faasinoga ogatotonu, i le pito i lalo, i tua, ma faasinoga e fesootai i la tatou faiva, i tapenaga mo sauniga a le faapotopotoga, ma i suesuega totino e masani ai. Mulimuli ane, i le 1984, maeu lo tatou nenee ina ua maua mai le New World Translation Refernce Bible! Maeu se sauniuniga mataina e fesoasoani ia i tatou i a tatou taumafaiga ia avea ma tagata faigaluega o ē faaaogā tonuina le Afioga a le Atua! E ala i le toʻaga e faaaogā lenei sauniuniga mau fetuunai, ua sili ai nei ona faaaʻuupegaina i tatou na i lo muamua e fausia aʻe uiga mautu faaleagaga ia i tatou atoa ma isi.—Mata. 7:24; 1 Timo. 4:16; Epe. 5:14.
4 A o auai i le faiva, atonu e te feiloai i se Katoliko mapo lotu na te sii mai le Mataio 16:18 o se faamaoniga faapea o Peteru o le papa lea ua faavae ai le Lotu Katoliko. Pe a tupu lenei, e mafai ona e sueina le mau i lau New World Translation ua iai faasinoga ogatotonu ma maua ai mau e lima ua faasino i le upu “papamaa.” Ua faaalia e na mau faapea o le Faavae o le faapotopotoga o Keriso, ae le o Peteru. E ala i le sailia o le mau lava lea i le New World Translation Reference Bible, o le a e maua ai faamatalaga faaopoopo i faasinoga i le pito i lalo i le upu “papa-maa,” o loo faamatala ai lona uiga i le uluai gagana Eleni.
5 O se vaega ua faaulutalaina “Mataupu o le Tusi Paia mo Talanoaga” o se isi lea itu ua faamaonia le aogā i le faiva i le fanua. Pe a galue i oganuu ua ufitia soo, atonu e te manao e filifili se ulutala e ese mai lea ua faatomua i La Tatou Faiva o le Malo.I lalo o mataupu e pei o le “Laueleele,” “Malo,” ma “Aso e Gata ai,” o le a e maua ai mau e mafai ona faaaogā i se taulimaga mai i lea fale ma lea fale po o se talanoaga faale-Tusi Paia i se toe asiga.
FESOASOANI I MANATUNATUGA
6 Afai e te lē manatua po o fea e maua ai se mau iloga pe a faia se talanoaga faale-Tusi Paia, e mafai ona e sue i le “Faasino Upu Tusi Paia” i tua o lau Tusi Paia ma maua ai le fesoasoani manaomia. Pe o e faaaogāina lenei vala tautele?
7 O upu faataʻimua i le itulau e 5 ua na aumaia ni faamaoniga aiai e faaalia ai o le New World Translation o se galuega o suesuega faaeteete. O faasinoga i tua ua saunia se faamalamalamaga manino o le pogai ua talafeagai ai le faaaogāina o le suafa tauatua. Ua faamaonia ai foi faale-Tusi Paia le uiga o “Kena,” “Heitisi,” “Seoli,” ma le “solu.” E faaopoopo iai, i le liliu atu i le “Faasologa o Tusi o le Tusi Paia” i itulau e 1546-1547, e mafai ona tatou iloa ai ē na tusia tusi taitasi, o fea na tusia ai, na tusia anafea, ma le taimi na aofia ai.
8 E mautinoa, ua saunia e Ieova mea tatou te manaomia ina ia “saunia lava ia i galuega lelei uma lava.” (2 Timo. 3:17) E ala i le faaaogāina o le New World Translation faatasi ma lomiga faale-Tusi Paia o le a tatou ofoina, e mafai ai ona tatou faia ma le uigā le galuega ua tofia mai. (Luka 6:47, 48) A o faamaonia o i tatou o ni tagata faigaluega agavaa, e faaaogā tonuina le Afioga a le Atua, e mafai ona tatou faatalitalia ma le mautinoa le faapea mai o le Matai: “Lelei tele”!—Mata. 25:21, NW.