Ia Atamai—Faatatau Mea Ua E Aʻoaʻoina
1 O le sini o le toatele o tagata ia ola i se olaga fiafia, toafilemu. E faitau afe tusi ma mataupu ua aumaia timaiga i le faapefea ona maua se faaipoipoga manuia, faapefea ona tausia aʻe fanau, faapefea ona taulau i le itu tau tupe, faapefea ona ausia ma faatumauina se soifua maloloina lelei, ma le anoanoai o isi mataupu fesootai e fesoasoani i tagata ia maua le fiafia. E ui atonu o loo iai sina tomai faatino i lomiga faalelalolagi, e toatele tagata i le lalolagi ua aʻe noa le faiva e lē o fiafia ma toafilemu. Aiseā ua mafua ai?
2 E mafai ona maua le tali i le Tusi Paia i le Faataoto 1:7, ua faapea mai: “O le mataʻu ia Ieova, o le amataga lea o le poto; a e ʻinoʻino tagata valelea i le [atamai, NW] ma le aʻoaʻoina.” E lē mafai e se tagata ona faatalitalia na te maua le filemu ma le fiafia pe afai na te lē amanaia ma faaaloalo i le Puna o le poto moni ma le atamai, o Ieova le Atua.
3 Ua oge—matelaina faaleagaga le lalolagi. O le mea e malie ai, o lenei tulaga faanoanoa o mea fai e le tagata lava ia, ona e fau ma soloi taumafa faaleagaga o loo faaavanoa i tagata uma lava o le lalolagi, ma e ave fua. (Faata. 1:20, 21; Faaa. 22:17) Ona ua teena e tagata o le lalolagi le atamai mai ia Ieova, ua faaauau ai ona latou tautevateva solo i le pogisa faaleagaga. (Faata. 1:22-32) I le isi itu, ona o tagata o Ieova, o ē faaaloalo i ana tulafono ma mulimuli i ana poloaiga, ua tatou maoona lelei ai faaleagaga ma fiafia. (Isaia 65:13, 14) Ua faapea foi, e le alofa o loo fetafeaʻi i le faalapotopotoga a le Atua ona faailogaina i tatou o soʻo moni o Keriso. (Ioane 13:35) Ioe, ua avatua e le au uso o Molimau a Ieova i le lalolagi aoao faamaoniga ola faapea o le tausisi i aʻoaʻoga a le Tusi Paia o se auala atamai e mulimuli ai.
4 Ae, e iai pea nisi o ē ua miomiō ma le faalapotopotoga a Ieova atonu e leʻi tofo i le fiafiaga lea e mafai ona fai mo i latou. E oo foi ina matuā afaina ia i latou le fiafiaga o isi i o latou autafa i mea latou te taʻua ma faia. E mafai faapefea lenei? Ua mafua ona latou te lē o faatatauina le atamai o le Atua i o latou olaga. Atonu latou te auai i sauniga, fonotaga matagaluega, ma tauaofiaga itumalo. Atonu o latou ō faatasi ma mea ua fai mai ai lomiga a le Sosaiete, ae o a latou aga ma le auala o loo latou feutagai ai ma isi, e aofia ai uso a Kerisiano, e lē o atagia ai le faatatauina o le upu moni ua latou aʻoaʻoina. O le ā e manaomia ona faia? E manaomia e na tagata ona mafaufau loloto i le “lulu i la le Agaga” ina ia latou aumaia ai le fiafiaga i o latou lava olaga ma saosaolaumea i le fiafiaga o ē i o latou autafa.—Kala. 6:7, 8.
MEA E FAATATAUINA
5 Afai tatou te taitoatasi ma faatalale, lafoai lo tatou puipuiga, ma lolo atu ia Satani, le lalolagi, po o tatou tino lē lelei atoatoa, o le a tatou misia le olioli o le mauaina o se faiā vavalalata ma Ieova. I le taimi nei, e sili atu na i lo muamua, e tatau ai ona tatou mataalia e faatatau mea ua tatou aʻoaʻoina ia tatou sauniga faalefaapotopotoga ma fonotaga atoa foi ma isi sauniuniga e ala i le faalapotopotoga. O le lalolagi o loo tatou ola ai o se nofoaga matautia ua faapea ona suia faasolosolo. E manaomia ona tatou mataalia e faatatau le fautuaga ua saunia ma le alofa e Ieova e ala i le “auauna faamaoni ma le mafaufau,” amanaia o ni taumafa mo le taimi e tatau ai.—Mata. 24:45-47.
6 I le polokalama fou o la tatou aso fono faapitoa, e tele faamatalaga lelei na saunia ai i le faapefea ona tutumau mausali o se lafu e tasi. Sa aumaia faufautuaga i le faapefea ona faafetauia aafiaga e faavaivai ai, e pei o aiaiga faavaivailoto, le agaga fia tutoatasi o le lalolagi, ma tosinaga faamaimau taimi. Pe ua tatou faatino le fautuaga lelei ia faalagolago atoatoa ia Ieova ma ona ala, amanaia ma gauai i le pule faatiokaate, ia loto maulalo ma agamalu, ma ia faatau mai le taimi avanoa mo sailiga faatiokarate? (Mika 6:8; Efe. 5:15, 16; Epe. 6:10; 13:17) Pe o fesoasoaniaʻi sui o le aiga ia mulimuli i se olaga Kerisiano? O a tatou filifiliga i faafiafiaga, o tatou uiga, ma a tatou faasologa i aso faisoo e tatau ona aafia i fautuaga ua tatou maua mai Tusitusiga Paia. Seʻi vagana ua iai se taumafaiga tinoū e faatatauina mea ua aʻoaʻoina, o le a itiiti la pe leai se auiluma faaleagaga, ma o le a matuā aaina ai lo tatou filemu o le mfaufau ma le fiafiaga.—Fili. 4:7-9; Iako. 1:22-25.
7 O se taumafaiga tuufaatasi i suesuega totino ma faaleaiga e manaomia. E mafai ona taʻitaʻia i tatou e le Watch Tower Publications Index i faamatalaga auiliili e uiga i le faatatauina o mataupu silisili o le Tusi Paia. O le tusi Young People Ask o se fesoasoani aupito sili mo mātua e faaaogā e fesoasoani ai ia latou fanau e faafesagai ma le lalolagi fenuminumiai faasatani. I le sueina i na mataupu, o le a tatou taea ai le manatu o Ieova i mataupu ma mafai ai ona taʻitaʻia e mataupu silisili amiotonu. O le lē faia o lenei e pei o se vailaau ua iai mo se maʻi ae lē taitai ona faaaogāina, e ui ina tatou iloa e tafiesea ai le mala o loo tatou aafia ai. O suesuega totino ma faaleaiga faifai pea o le a faatupuina lo tatou faatuatua ma aumaia ia i tatou le malosi e tumau ai. I le taimi o tofotofoga, o le a lē mate lo tatou faatuatua, e mafua ai ona tatou paʻuʻū ese.—Mata. 13:6; Luka 8:13; Epe. 2:1.
8 E tatau i toeaiina ma auauna o le faiva ona faataatia se faaaʻoaʻoga i le pulea o ō latou aiga. O le a aofia i lenei le fesoasoani i a latou avā ma fanau e faatatauina mea ua latou aʻoaʻoina mai le Afioga a le Atua ma lana faalapotopotoga ina ia tumau ona malolosi faaleagaga. I lenei auala, e mfai ai ona avea le aiga atoa o se faaaʻoaʻoga i le olaga Kerisiano ma saunia ai le faalaeiauga mo isi i totonu ma fafo o le faapotopotoga.—Efe. 6:4; 1 Timo. 3:4, 12, 13.
O AI E FESOASOANI I AI
9 Faatasi ma i latou e auai i le Faamanatuga i tausaga taitasi o le toatele o ē e manaomia atili le faalaeiauga e faatatauina mea ua latou aʻoaʻoina ma auaumea tiotio ma le faalapotopotoga. E mafai ona faaalia le alofa ma le magafagafa i a tatou tagata aʻoga o le Tusi Paia i le aʻoaʻoina o i latou i le faapefea ona faatatau mataupu silisili o le Tusi Paia i o latou olaga ma faapefea ona tauaveina faatonuga amiotonu a le Atua. E ao ona tatou faataʻitaʻia le manatu mamafa mo i latou o ē agai i luma i le avea ma o tatou uso ma tuafafine i le faatuatua.
10 So o se tasi e lē faifai pea pe ua lē toe talaʻi e tatau ona fesoasoania e tagai i le manaoga ia auai pea i gaoioiga ma le faalapotopooga. E manaomia ona latou toe maua le filemu ma le fiafiaga na latou olioli ai muamua a o auauna atoatoa ia Ieova. (Ioane 13:17) I le fesoasoani ma le alofa ia i latou e faafouina lo latou talisapaia mo le upu moni ma “avatu soo ai le taulaga o le viiga i le Atua,” o le a mafai ai ona latou faatatauina mea ua latou aʻoaʻoina ma faaauau ai i le auala i le ola.—Epe. 13:15; tagai i La Tatou Auaunaga o le Malo, Iulai 1979, itulau 3, ma Mati 1977, itulau 3.
11 O tagata uma lava o le Atua e manaomia ona savavali faatasi ma le faalapotopotoga saosaoa a Ieova. E lē mafai ona tatou faatagaina i tatou e maileia i o tatou lava manaoga. E tatau ona tatou faatumauina pea lo tatou tulaga faaleagaga, faaauau ona iloaina faamatalaga fou ua saunia e ala i le faalapotopotoga a le Atua ma sauni e faia sona faatatauga. E faaaluina ai i lenei se taumafaiga tinoū ma i nisi taimi o se faataulagaina totino. Peitai ua lē o talosagaina e Ieova mai ia i se mea tatou te le mafai ona faia. O ia o Lē Na Foafoaina i tatou, ma ua ia silafia le mea sili o i tatou. O lea sei faamaonia tatou te atamamai i le aʻoaʻoina pea e Ieova ma faatatauina mea ua tatou aʻoaʻoina. O lea o le a aumaia ai le viiga ia te ia ma iʻu ai i aogā e faavavau mo i tatou.—Isaia 48:17; 54:13.