Faamalieina Ou Manaoga Faaleagaga
1 Na fetalai Iesu: “E fiafia i latou e taunapa i o latou manaoga faaleagaga.” (Mata. 5:3, NW) Aiseā e matuā tāua ai ona taunapa i o tatou manaoga faaleagaga? E mafai faapefea ona tatou folasia tatou te taunapa i ai? O ā mailei e tatau ona tatou alofia, ma o ā faamanuiaga o le a iʻu i ai mai le taunapa i o tatou manaoga faaleagaga?
2 E lē masalomia ua tatou masani uma i le faiā i le va a lo tatou soifua faaletino ma le fuatatauina o meaʻai. E lē mafai e se tagata ona faifai pea ona faatamala i ona manaoga faaletino ma faatalitalia e faaauau ona faatinoina se galuega uigā. O le mataupu silisili lava e tasi e faatatau pe afai tatou te faatalalē i le fafagaina o i tatou faaleagaga.—Mata. 4:4; Ioane 17:3.
FESOASOANI SAUNIGA E FAAMALIEINA MANAOGA
3 E i ai se faiā tuusaʻo i le va o lo tatou soifua maloloina faaleagaga ma la tatou polokalama o le fafagaina faaleagaga. Ia tatou sauniga, ua saunia ai e “le auauna faamaoni ma le mafaufau” se faigaʻai o mea lelei faaleagaga e faamalieina ai lo tatou manaoga. (Mata. 24:45-47) E tofu ā le sauniga ma lona fuafuaga faapitoa, ma e lē tatau ona faatalalē i se tasi. Pe e te sauniuni mo sauniga uma ma auai ia i latou e le aunoa?
4 Seʻi o tatou iloiloina puupuu na o le tolu o a tatou sauniga e lima faalevaiaso. O le sauniga autu ua fuafuaina tatou te piivaa ai pea i le upu moni auiluma o le Suesuega o Le Olomatamata. E mafai ona fesoasoani le Aʻoga o le Faiva Faatiokarate ia i tatou ia agavaa o ni faifeau. Ua saunia le Suesuega Tau Tusi a le Faapotopotoga mo se suesuega faaeteete o mataupu eseese o le Tusi Paia.
5 E te sauniuni mo sauniga a le faapotopotoga? O nisi atonu e na ona salualuga o le mataupu o le suesuega, vave ona vaseina tali i fesili, ae lē vaaia mau ua siiina ai. Atonu ua na ona latou sauniuni e tali, peitai o latou maua le aofaiga atoa o le tausiga faaleagaga ua faaavanoaina? Faamata o i ai se avanoa mo le faaleleia i le auala o loo faapea ona e sauniuni ai ma lou aiga mo sauniga?
FAATAU MAI LE TAIMI
6 Pe a e faataatia ese le taimi e sauniuni ai mo sauniga, aua neʻi faatagaina le televise po o so o se isi gaoioiga e faaletāua e aiā ia au fuafuaga. E faapitoa lava, i ulu o aiga, ona tatau ona fesoasoani i o latou aiga e pipii mau i se polokalama faifai pea o le suesuega faale-Tusi Paia, sauniuni mo sauniga, ma auai i le auaunaga i le fanua. E ao i tagata uma ona manatu mamafa i le fautuaga a le aposetolo o Paulo ia ‘faatau mai le taimi avanoa’ ma tuu faamuamua lo tatou itu faaleagaga.—Efe. 5:15-17.
7 E ala i le taunapa i o tatou manaoga faaleagaga, o le a tatou alofia ai le mailei o le pagamālie, po o le faamalieina o le tagata lava ia. O i tatou taitoatasi ma aiga, e i ai moni manaoga faaleagaga. E faalagolago lo tatou fiafiaga e faavavau i taumafaiga ua tatou tuu faamuamua e faamalieina o tatou manaoga faaleagaga.