Faalaeiau Tagata Aʻoga o le Tusi Paia e Agai i Luma
1 O loo manatunatu le lalolagi e agai i luma mai na o se vaaiga i tomai faaonaponei po o mea faitino. Peitai e lē faapena le ala o tagata o Ieova. Na i lo lea, ua tatou pulunaunauina i tatou lava e agai i luma faaleagaga. Tatou te fiafia ona ua maua le faalaeiauga e faapea ona taʻitaʻia ai i tatou e avea ma soʻo mataalia ma fuatele mai o Keriso.—Ioane 15:8; 2 Pete. 1:5-8.
2 I tusi o le Tala Lelei o le faaupuga “soʻo” e faatatau tonu lava ia i latou o ē e le gata ina talitonu i aʻoaʻoga a Keriso ae mulimuli taʻi ai foi. (Mata. 28:19, 20) Pe o talisapaia e tagata aʻoga o le Tusi Paia lena mea moni? E mafai faapefea ona tatou faalaeiau i latou e agai i luma e avea ma soʻo?
FAASINO Ē NAUNAU I LE FAALAPOTOPOTOGA
3 O le agai i luma o le tagata aʻoga e fesootai moni lava ma lona talisapaia o le faalapotopotoga a Ieova. O lea, o se vaega o la tatou avega tauave o ni faiaʻoga o le faasino o le faanaunauga o le tagata aʻoga agai i le faalapotopotoga a le Atua. Mo le tele o tausaga sa faalaeiau ai i tatou e tuuina atu le lima i le sefulu minute i taimi o suesuega faale-Tusi Paia taitasi e faamatalaina ai se mea e uiga i le faalapotopotoga. O le polosiua Molimau a Ieova Autasi i le Faia o le Finagalo o le Atua i le Lalolagi Aoao ua na saunia se auivi e sili ona lelei mo le faia o lea. Pe o i ai se kopi a lau tagata aʻoga o le Tusi Paia? Afai e leai, tagai totoa i ai ua ia maua nei loa. Faalaeiau o ia e faitau, ma faamatala ia te ia faapea o le a lua iloiloina na o sona vaega puupuu i sueusega taitasi.
4 Ua fuafuaina faamatalaga i itulau e 14 ma le 15 o le polosiua Faia o le Finagalo o le Atua e atiina aʻe ai le talisapaia mo sauniga taitasi a le faapotopotoga. Aiseā e le ufitia ai na o se tasi pe lua ni palakalafa i vaiaso taitasi? Folasia pe faapefea i sauniga taitasi ona aumaia le toleniga ma faatonuga e faamalieina ai se manaoga iloga. Fesoasoani i le tagata aʻoga e iloa faapea o le tuputupu aʻe faaleagaga e mafua mai “le faapotopotoina o i tatou.” (Epe. 10:24, 25) Faalaeiau mafana o ia e auai ma i tatou i le Maota o le Malo. O i na o le a ia oo totino ai i le autasi ma le alofa lea ua tatou olioli ai o ni tagata faapotopotoina o Ieova.—Sala. 133:1; Ioane 13:35.
FAAGAEE LE TUPUTUPU AʻE FAALEAGAGA
5 E manaomia ona avea ē fou ma tagata aʻoga moni o le Afioga a le Atua, e agaigai i luma i le poto, malamalama, ma le faatatauina o ona mataupu silisili. Mo lenei mafuaaga o le a faaauau ai ona tatou suesueina le tusi Ola e Faavavau ma le tusi United in Worship po o le tusi Manuia Moni tusa lava pe ua papatiso le tagata aʻoga ae leʻi maeʻa ia lomiga. E mafai e le tagata aʻoga ona maua kopi o nei tusi e ui ina e leʻi sauni o ia e amata ona suesueina le tusi lona lua mo nisi masina. Atonu o le a mafai e lenei ona faaosofia lona mataʻai faaleagaga, ma faagaeeina ai o ia e faia faitauga faaopoopo e faapea ona faataalise ai lona agai i luma. E tatau foi, ona tatou faasino atu le tautele o le i ai o tusiga o Le Olomatamata ma le Awake! ma le mauaina o isi lomiga a le Sosaiete ina ia o faatasi ai ma “luʻuga o taumafa i le taimi tatau.” (Luka 12:42, NW) O i latou o ē faia faapea o le a mauaa, atiina aʻe, ma faatumauina i le faatuatua.—Kolo. 2:7.
6 Ona o ni aumea faatalitalia a Molimau a Ieova, e manaomia e tagata aʻoga o le Tusi Paia la tatou fesoasoani ina ia latou tutupu aʻe ai i le taʻumatuaina. (Epe. 5:14) E ao ona tatou ofo atu fautuaga talafeagai e faalaeiau ai le agai i luma. (Fili. 3:16) Pe o ia fetufaai ma ona aiga ma ē masani mea ua ia aʻoaʻoina? Afai ua ia agavaa, pe ua ia auai i le Aʻoga o le Faiva Faatiokarate? Faamata ua ia faanaunau e avea o se tagata talaʻi o le tala lelei?
7 Afai e faatino la tatou vaega o ni faiaʻoga, e mafai la ona tatou tepa taulai atu i le faamanuiaga faaʻoaina a Ieova. (2 Kori. 9:6) Aua lava neʻi o tatou faagaloina le malosi o le tatalo mo tagata aʻoga o le Tusi Paia. Ole atu ia Ieova e taʻitaʻia i latou e faatinoina mea ua latou aʻoaʻoina. (1 Kori. 3:6, 7) Talosia ia latou uia se gaoioiga aʻiaʻi e auaumea tiotio ma le faapotopotoga ma faaopoopo atili ai i le mamalu ma le viiga i le suafa o Ieova.