Taulimaina o le Tala Lelei—Ma Mekasini
1 E aunoa ma nisi nusipepa i le talafaasolopito ua iai ni ona āuga mo le lelei o olaga o tagata e pei o Le Olomatamata ma le Awake! Ua faatumulia o la lomiga uma i taumafa faaleagaga foai ola. O taunuuga o sailiiliga loloto ua taulimaina ai faatasi ma le sapasapaia malosi faale-Tusi Paia ua faamamafaina ai i o tatou mafaufau ma loto le feau o le upu moni.
2 O Le Olomatamata, e ala i ona itulau, ua faamatalaina aʻoaʻoga faale-Tusi Paia ma tataʻi atu ai o tatou manatu i le faataunuuga o valoaga a le Tusi Paia. Ua ia faalaeiau tagata uma o ē matelaina faaleagaga ia toe fuataina o latou mafaufau ma ia faaofuina i le peresona fou. (Roma 12:2; Efe. 4:22-24) O le Awake! na te fagufagu maia i ona tagata faitau mea tutupu iloga i le lalolagi. O ona ata matagofie ua faaataina ai le ofoofogia o le foafoaga e faagaeeina ai le naunau i le lalolagi fou ma faaloloto ai le talisapaia mo Lē na Foafoaina Mea e alofa.
E LĒ PEI O MEKASINI TAATELE
3 E lē o faaalia e mekasini taatele i tagata pe faapefea ona olioli i ni olaga faamalie loto i lenei lalolagi. E aunoa ma se faamoemoe o latou ofoina mai mo le lumanai ma ua lē taulau i le aʻoaʻoina o tagata pe faapefea ona maua le ola e faavavau. O na mekasini faalelalolagi ua fuafuaina e siitiaina mea o le lalolagi. Maeu se eseesega ma Le Olomatamata ma le Awake!—1 Ioane 2:15-17.
4 E lē masalomia ua e lagonaina e oe lava se faalogona loloto o le faafetai mo lomiga taitasi o Le Olomatamata ma le Awake!—o mekasini ua iai mea manogi suamalie o le upu moni mai ‘le auauna e pule faamaoni.’ (Luka 12:42) O le ā e mafai ona tatou faia e faaleleia ai lo tatou tuua o mekasini ma fesoasoani ai i le toatele ia maua aogā mai a tatou mekasini?
FAIA O LA TATOU VAEGA
5 A o leʻi mafai ona tatou faalaeiauina tonu ē loto faamaoni e faitau a tatou mekasini, e manaomia ona tatou iloa mea o loo iai i mekasini taitasi. E tatau ai i lenei ona tatou faitauina lomiga taitasi a o leʻi faaaogāina i le faiva. I le faamasani atoatoa ma mea o iai, e mafai ona tatou faaaogāina ai vala o le faiva i lea fale ma lea fale, galuega i magaala, ma le molimau lē fuafuaina mo le tufatufaina o mekasini.
6 E lē gata i lena, i le iai o mekasini fou ma i tatou a o faatau, malaga i ala o le lautele, i aʻoga, i o tatou fale faigaluega, po o fea lava tatou te ō i ai, o le a mafai ona tatou puʻeina avanoa talafeagai e molimau atu ai. O se upu tomua filifilia lelei mai le tusi Reasoning e vaavaalua ma se manatu mai se tasi o mataupu atonu e faaosofia ai le faanaunauga o se tagata e faitau a tatou mekasini.
7 E ui ina atonu e pupuu a tatou felafolafoaiga pe a ofoina mekasini, e lē tau tuli ina faatapulaa a tatou talanoaga i le na o se minute pe a. Tatou te mananao e faaalu le taimi e faamautinoa ai pe faamata e naunau moni le tagata i le feau ma pe o le a ia faitauina le mekasini. Afai e tulai mai ni fesili, e tatau pea ona tatou taumafai e taliina na fesili i le faaaogāina atoatoa o la tatou Tusi Paia po o le tusi Reasoning. I le sauni e avatu se tali i lo tatou faatuatua, e mafai ai ona tatou seleseleina faamanuiaga ofoofogia.—1 Pete. 3:15.
8 Afai e ioe le tagata e faitau i mekasini, e mafai ona tatou tautala e uiga i le natura o la tatou galuega ma pe faapefea i ia mekasini ona lomia faalua i le masina o se vaega o le galuega tau aʻoaʻoga faale-Tusi Paia i le lalolagi aoao. O le faamatalaga i le itulau e 2 o Le Olomatamata po o le itulau e 4 o le Awake! ua matuā lelei ona faamatalaina ai o lenei. Ona ua masani ona lisiina ai mataupu o le lomiga e sosoo mai o mekasini faa-Peretania, e mafai ona tatou faatutū atu ni fesili e fesootai i ai pe tataʻi foi manatu i mataupu o loo fotuai mai. Atonu o le a faaosofia e lenei le mataʻai o le tagata ma uunaia ai o ia e faaleoina se faanaunauga ia maua lena lomiga pe a sau. E ono avea lenei ma amataga o se ala mekasini.
9 A o latalata mai le iʻuga o lenei faiga o mea, tau ina faanatinati ona tatou ō e fesoasoani i ē loto faamaoni e sosola ese mai ia Papelonia le Aai Tele ma ō mai i totonu o le upu moni. (Faaa. 18:4) Ua faatino e Le Olomatamata ma le Awake! se vaega malosi i la tatou galuega tau aʻoaʻoga faale-Tusi Paia i le lalolagi aoao. Tatou te faafetai ona ua saunia e Ieova i latou mo lo tatou faaaogāina i le faiva. Talosia ia faaauau pea e Ieova ona faamanuia lo tatou faaaogāina faaeteete ma le tinoū o ia mekasini!