Pusa Fesili

● Aiseā e tāua ai ona faauma le suesueina maeʻaeʻa o tusi e lua ma soʻo fou tusa lava pe papatisoina i latou a o leʻi uma le tusi lona lua?

Ua faamanuiaina e Ieova lana faalapotopotoga i le gasolo mai o ē fou ua lolofi ane i faapotopotoga. Tatou te olioli e vaaia lenei aoaoina tele. Peitai, tatou te talisapaia faapea o loo manaomia e nei tagata e pei ni mamoe se fesoasoani faifai pea ma se taʻitaʻiga i le aʻoaʻoina e auauna ia Ieova.

E manaomia e tagata fou le fesoasoani ina ia maua le poto saʻo o le upu moni. (Kolo. 1:9, 10) Ua ia i tatou le faaeaga e fesoasoani ai ia te i latou ia maua se malamalamaga lelei i aʻoaʻoga faavae o le Tusi Paia ma uu mau le mea ua aʻoaʻoina e le Tusi Paia e uiga i tapulaa tau amio mamā, olaga faa-Kerisiano, ma mataupu ua fesootai i ai. O le a fesoasoani lenei ia i latou e faavae mausalī ai i le upu moni ina ia foia ai so o se tofotofoga atonu o taatia mai i le lumanai.

E manaomia foi e tagata aʻoga ona oo ina faatagata matutua i le mafaufau. (1 Kori. 14:20) Ua faaalia i mea tutupu faapea ina ia ausia le tulaga o se tagata matua faaleagaga, e aogā ai se suesuega totino faale-Tusi Paia ma se faiaʻoga. O lea, e ui lava ina ua papatiso se tagata a o leʻi maeʻa lana suesuega o tusi e lua, ua faatonu mai e le atamai faapea e ao ona faaauau lana suesuega faale-Tusi Paia i le aiga seia maeʻa ona ia suesueina tusi uma e lua.

MAVAE LE PAPATISOGA

Na fetalai Iesu e ao ona tatou faia soʻo—papatiso ma aʻoaʻo atu i latou. (Mata. 28:19, 20) O le tele o mea e faatonuina ai soʻo e faia pe a maeʻa le papatisoga. E masani a ona lē lava le poto e maua e se tagata mai na o se tusi e tasi e faaleleia ai lana toleniga faaleagaga. E manaomia ni faatonuga faaopoopo e faamalosia ai o ia mo le galuega o le faiva ma faaauupegaina ai o ia e teena omiga e oo mai i luga o ē auauna ia Ieova i nei aso e gata ai. O le lē taulau ona saunia ia lava le toleniga atonu o le a tuua ai le tagata aʻoga ua lē sauniunia faaleagaga e tu na o ia. A maeʻa ona papatisoina se tagata fou, e faaauau pea ona tatou fesoasoani ia te ia ia faia se agaʻigaʻi i luma atili tusa lava pe ua uma ona ia suesueina tusi e lua pe leai. O le uluai lomiga ua suesueina e saunia ai se malamalamaga i mataupu faavae. O le lomiga lona lua e ufitia ai uiga faa-Kerisiano. O ia lomiga atonu o le tusi Ola e Faavavau ma le tusi United in Worship po o le tusi Manuia Moni. Afai e lē o maua ia tusi, e mafai ona faaaogā isi tusi o loo iai faamatalaga e tali tutusa. O le faaauau o le suesuega faale-Tusi Paia seia maeʻa le tusi lona lua e saunia ai se aʻoaʻoga lelei i fuafuaga a Ieova atoa ma ana tapulaa maualuluga faa-Kerisiano ma mea manaomia. O le a fesoasoani lenei i le tagata fou ia malamalama i le uiga o mataupu silisili faa-Kerisiano ma tumau ai ona mauaa i le faatuatua. (Kolo. 2:7) Mo nisi auiliiliga atili ma faamatalaga i le lipotia o suesuega faapena, tagaʻi i le Pusa Fesili i La Tatou Faiva o le Malo o Novema 1987.

O le mea moni, a maeʻa le papatisoga e ao ona faatalitalia tagata fou e faia se agaʻigaʻi i luma faaleagaga. (Epe. 6:1-3) I le tele o tulaga e lē umi se taimi e faamaeʻaina ai le tusi lona lua. O lea o le a saunia ai le tagata fou faatasi ma se faavae mausalī.