Taulimaina o le Tala Lelei—I Aso Malōlō
1 E ui ina anoanoai aso faamanatu e fesootai ma le Kirisimasi ma le Tausaga Fou e iai ni amataga faapaupau, e sili atu i le piliona ē ua faapea mai o Kerisiano o loo tausia ia aso malōlō i tausaga uma. O le toatele o tagata e talitonu ma le faamaoni faapea o ia aso faamanatu ua faamaonia e le Atua. E mafai faapefea ona tatou pāʻia loto o na tagata ma le tala lelei i le vaitau o aso malōlō?
IA MAGAFAGAFA MA FAAALOALO
2 Ona o le toatele o i tatou e malōlō mai galuega totogi, o le a faia ai e toeaina ni faatatauga faapitoa mo le molimau atu i aso malōlō. E ao ona fetuutuunai le taimi mo le amataina o le galuega i lea fale ma lea fale i le magafagafa mo tagata o aiga o ē atonu e tuai ona momoe na i lo le tulaga masani i na aso.
3 A o tatou tauaveina pea la tatou faiva, atonu e toatele tagata tatou te tau i ai ua fai se tuatuagia i mālō asiasi ma le sauniunia o taumafataga. I le iloaina faapea o se taimi faapitoa lea mo i latou, e mafai ai ona faapupuu a tatou faamatalaga ma le faaaloalo ma ia fana saʻo i le manatu. O lo tatou migao faa-Kerisiano atonu e tatalaina ai le ala mo se molimau atili i le lumanai.
4 Tatou te lē saosaolaumea i aso faamanatu a lotu faalelalolagi, ma tatou te lē feofoalofaaʻi i faafeiloaiga faaleaganuu i aso malōlō. O le mea lea, e manaomia ai le uta mamao i le auala tatou te tali atu ai i na faafeiloaiga. E lē manaomia ona faia se finauga i le faafeiloaiga, ae i le tele o tulaga tau a ina tatou faafetai i lē ona le fale mo ona moomooga lelei. Afai e fesilisili mai ni tagata e uiga i lo tatou talitonuga, e mafai ona tatou faamautinoa ia i latou faapea tatou te āva ia Keriso Iesu, auā ua manaomia ona faia faapea e i latou o ē āva i le Atua. (Ioane 5:23) Peitai, o le tele o aganuu i aso malōlō e lē faamamaluina ai Keriso po o le Atua. Afai e naunau ni tagata mo ni faamatalaga atili i lena taimi pe mulimuli ane, e mafai ona tatou fetufaai ma i latou le mataupu i le tusi Reasoning i itulau e 176-178 ma le 180.
FAATOMUAGA
5 Ona e faalelotu le natura o aso malōlō o le Kirisimasi, atonu tatou te tau i le toatele o tagata o ē sili atu ona fia talanoa e uiga i le Atua i lena taimi na i lo se isi lava taimi o le tausaga. E mafai ona tatou faaaogā tatau lenei mea moni i a tatou faatomuaga. Mo se faaaʻoaʻoga, tatou te ono faapea atu: “E faitau miliona tagata i le lalolagi atoa o loo faamanatuina le Aso Kirisimasi ma le Tausaga Fou. Pe te manatu ua aumaia e ia aso fiafia tagata ia vavalalata ma le Atua?” Pe lagona e lē ona le fale faapea e lelei pe leaga ia aso faamanatu, a maeʻa ona faaalia lona taofi, tatou te ono taʻua faapea: “O loo moomoo le toatele o tagata e maimau pe ana iai sa latou faiā lelei ma le Atua, atonu o manatu faapea e fai se mamao ese o le Atua ma i latou. Ma le fiafia lava, ua valaaulia i tatou e le Atua e saili mo ia.” Ona faasolo atu ai lea ma le Mataupu mo Talanoaga.
6 I le faaaogāina o se isi faafeiloaiga, e mafai ona tatou faapea atu: “O le vaitaimi lenei o le Kirisimasi, e masani a ona tatou faalogo ai o faaleo e tagata le faamoemoe faapea o le a iai le filemu i le lalolagi ma le finagalo alofa agaʻi i tagata. E te manatu o le a aumaia e le Atua le filemu i le lalolagi i o tatou aso?” A maeʻa lena e mafai ona tatou faaauau i le folasiaina faapea o Iesu Keriso o le “Perenise o le Filemu” na valoia. (Isaia 9:6, 7,NW) I le avea ma Taʻitaʻi tofia i le pulega a le Atua, o le a toe o se aga ona gaoioi lea o Keriso e aumaia le filemu e faavavau i le lalolagi.—Tani. 2:44; Faaa. 21:3-5.
7 E ui ina toatele tagata o loo faalotolotolua i le feau o le Malo ma fiafia i o latou aso malōlō faalelotu sese, e mautinoa o le a sili atu ona faamanuia e Ieova a tatou taumafaiga ia maua ē o saili mo le upu moni, auā “o loo saili le Tamā i e tapuai faapena ia te ia,” ma na te taʻitaʻia mai i latou i lana faalapotopotoga.—Ioane 4:23, 24.