Faataunuu La Tatou Faiva o le Malo ma le Fesoasoani mai le Index
1 Ona o ni Kerisiano ua tuuina atu, tatou te taumafai faamaoni ai e faataunuu la tatou faiva. Ina ia fesoasoani ia i tatou e faia lenei mea, ua saunia e Ieova se tamaoaiga o taʻiala ma faalaeiauga i se faaputuga tele o tusi o lomiga tautele. E mafai ea ona tatou faaaogā lelei na lomiga? O se fesoasoani autū mo le faia o lenei mea o le Watch Tower Publications Index, ua faaauau ona lomia i gagana eseese talu mai le 1961.
2 E mafai faapefea ona fesoasoani le Index ia te oe e faataunuuina lau faiva? Ua ia faia faapea i le faasinoina o le ala i se fautuaga e sili ona lelei ma faamatalaga ua maeʻa ona saunia. Ua sauniunia le Index ona o le manatu i le auuso i le lalolagi aoao. Mai fanau e oo i tuaʻa o mātua, tagata aʻoga fou o le Tusi Paia i toeaina, e mafai uma lava ona maua faamatalaga latou te manaomia mo so o se fuafuaga aogā.
E FAAPEA ONA SAILIA MEA O LOO E MANAOMIA
3 Afai o loo e naunau i le uiga o se fuaiupu patino po o se faasologa o fuaiupu, o le a e iloa e sili atu ona lelei le sue muamua i le faasinoga o mau i le pito i tua. Pe ua sii mai ea e se tasi le Ioane 10:30 i se taumafaiga e faamaonia ai le aʻoaʻoga o le Tolutasi? O le a tataʻia oe e le faasinoga o mau i le mataupu e faamanino ai le pogai na taʻua ai e Iesu na upu. O le a faaʻoaina e le faasinoga o mau la tatou faitauga Tusi Paia totino a o tatou sailia faamatalaga o fuaiupu e foliga e lavelave pe faanenefu.
4 Ua saunia e le faasino mataupu ala eseese i na lava faamatalaga aogā. Mo se faaaʻoaʻoga, atonu e te manaomia se faamatalaga i le mea e fai pe afai e tetee lau paaga lē talitonu i lou aveina o lau fanau i sauniga. Ina ia maua le tali, e mafai ona e sue i ulutala o “Tane,” “Avā,” “Fanau,” “Teteega,” po o “Sauniga.” E faatatau i so o se mataupu, afai e lē maua le mea o e sailia i lalo o le ulutala muamua e te sue i ai, sue le isi ulutala. Fesili ane ia te oe lava: ‘O ai ua aafia ai? E tāua ea lea nofoaga patino? Se uiga patino po o se tomai? Se faalogona faasausili? Se sini?’ Afai e te tau i se ulutala autū e peiseai e saʻo, ia muamua ona tilofaia faaopoopoga na e i ona lalo tonu ifo lava. E masani a i na manatu ona faasao ai le taimi i le faamaʻoti mai ai o se isi ulutala e tau sōsō i le manatu.
5 E mafai ona telē se sao o le tomai i le faaaogāina o le Index i le faataunuuina o a tatou avega tauave paia. O le a maua e o tatou aiga, a tatou tagata aʻoga o le Tusi Paia, ma a tatou faapotopotoga aogā a o faasolo ina tatou tomai atili i le faaaogāina o lenei meafaigaluega. O lomiga a sau o La Tatou Faiva o le Malo o le a faalauteleina ai vaega iloga e mafai ona avea ai le Watch Tower Publications Index o se fesoasoani tautele i le faataunuuina o la tatou faiva o le Malo.