E Mafai Faapefea ona Aogā le Index i le Aiga
1 I le talanoaina o sui o le aiga, ua faapea mai le 1 Timoteo 5:4, NW: “Ia aʻoaʻoina i latou ia muamua ona faatinoina le amioatua i lo latou lava aiga.” Ioe, o le faatinoina o le amioatua i a tatou feutagaʻiga ma sui o le aiga o se mea e tatau ona aʻoaʻoina. I lea, tatou te manaomia ai le taʻitaʻiga tauatua, ona o le tausia o sui o le aiga o se vaega o la tatou matafaioi faa-Kerisiano. E mafai ona fesoasoani le Watch Tower Publications Index ia i tatou ina ia sailia ai taʻiala mo aiaiga eseese e faapea ona mapuna aʻe i le olaga i le aiga.
2 Faatoʻā iai lava se aiga pe afai e faaipoipo se tama ma se teine. (Kene. 2:24) O ē manatunatu loloto ea ina ia faaipoipo? I lalo o le ulutala “Faaipoipoga,” o le a e maua ai le tamaʻi ulutala “filifilia o se paaga.” O le a faasino oe e faamaumauga i fautuaga aogā i lenei taumafaiga fitā i nisi taimi. Ua iai foi i le Index tamaʻi ulutala mo le “vaega a le tane” ma le “vaega a le avā,” ua saunia uma ai faamatalaga o le a faapea ona aogā ia i latou o loo faanaunau e faaipoipo ma i latou ua maeʻa ona faaipoipo. E faaopoopo i ai, ua faasino atu e tamaʻi ulutala e pei o le “fesootaiga,” “felataʻi,” ma le “filemu” i mataupu e mafai ona faamanuiaina ai le faaipoipoga. A mapuna aʻe ni faigatā, e mafai e le tamaʻi ulutala “faafitauli i” ona faasinoina oe i se fautuaga aogā i le auala e foia ai na tulaga.
3 O fanau o se tofi lea mai ia Ieova. (Sala. 127:3) E mafai faapefea e mātua ona tausia aʻe a latou fanau “i aoaiga ma apoapoaiga a [Ieova]”? (Efe. 6:4) O le mea e sili ona tāua o le taʻitaʻiga ua saunia e Ieova e ala i lana Afioga ma le vasega o le auauna faamaoni. E manaomia ona malamalama mātua i faalogona ma manaoga o a latou fanau. E mafai ona maua timaʻiga ma faufautuaga aogā e ala i ulutala “Fanau” ma “Talavou” o le Index. Ae faapefea le totōina o le tulafono a Ieova i o latou loto iti? O le ulutala “Toleniga o le Tamaitiiti” o loo taulaʻi atu i iloiloga manino o vala uma o le tausia aʻe o le fanau, e aofia ai le faapefea ona fesoasoani ia i latou e atiina aʻe se faiā totino ma Ieova ma galueaiina se faanaunauga mo le upu moni.—1 Pete. 2:2.
4 O talanoaga faale-Tusi Paia a le aiga e muai fuafuaina e matuā manaomia lea mo le manuia o le aiga. (Teu. 6:6-9; Isaia 54:13; Efe. 5:25,26) E mafai ona maua faamaumauga i manatu mo le faia o ni talanoaga fiafia faaleaiga i lalo o le ulutala “Aiga.” I le Index fou, o loo iai i le tamaʻi ulutala “suesuega faale-Tusi Paia” ni tamaʻi ulutala lagolago e pei o le “faia ia uigā,” “faia ia fiafia,” ma le “faia ia faaoso naunau.” Aiseā foi, e lē iloiloina ai mai lea taimi i lea taimi se tasi o tala i olaga o Molimau a Ieova? I lalo o le ulutala “Faiva Faa-Taimi Atoa,” o le a faasino ai oe i tala o olaga e pei ona faaulutalaina “Se Filifiliga Ou te Leʻi Faanoanoa ai Lava” ma le “Mauaina o Talosaga a Loʻu Loto.” O loo iai foi isi tala faapena ua lisiina i lalo o “Misionare.” O loo maua se lisi atoa i lalo o “Tala i Olaga o Molimau a Ieova.”
5 O le Watch Tower Publications Index o se meafaigaluega ofoofogia lea mo le aoaoina o fautuaga ma manatu mo le olaga i le aiga. Tau ina ia fesoasoani lea ia te oe ina ia maua ai se fiafiaga sili i le faataunuuina o ou avega tauave i totonu o le aiga.