Le Aso e Silisili ona Tāua i le 1991
1 O le aso e silisili ona tāua i la tatou kalena o lenei tausaga o le Aso Toonai, Mati 30. A mavae le goto o le la i lena aso, ona tatou faamanatuina lea o le Faamanatuga o le maliu o Iesu. (1 Kori. 11:20, 24) Aiseā ua avea ai le aso o le maliu o Iesu ma aso e faamanatuina faapitoa?
LE FAAMANATUGA—LONA UIGA
2 O le maliu o Iesu sa o se mea e tāua faalevateatea. Na faapea mai le aposetolo o Paulo, ina ua tusi atu i sui o le faapotopotoga Kerisiano fanauagagaina: “O aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seia afio mai o ia.” (1 Kori. 11:26) O le Faamanatuga la e uaʻi faapitoa atu ai manatu i le aogā o le maliu o Iesu Keriso i le galueaiina o le fuafuaga a Ieova. E faamatilatila ai le uiga o le maliu faataulaga o Iesu, ae maise lava i le sootaga ma le feagaiga fou ma le auala ua faaaafia ai e lona maliu i latou o ē o le a avea ma suli faatasi ma ia i le Malo faalelagi.—Ioane 14:2,3; Epe. 9:15.
3 I le tausisi i le faamaoni seia oo i lona maliu, na faapaiaina ai e Iesu le suafa o lona Tamā ma faaalia ai faapea e mafai e se tagata lelei atoatoa ona tumau faamaoni i le Atua i lalo o so o se ituaiga o tofotofoga atonu e faaoo atu e Satani faasaga ia te ia. Ua saunia foi e lona maliu le taulaga faaletagata lelei atoatoa sa manaomia e togiola ai le fanau a Atamu ma mafai ai e le toatele o ē o le a faaalia le faatuatua ona ola e faavavau i se lalolagi parataiso. Ona o na mea uma o le a faataunuuina e ala i le maliu o Iesu, sa matuā fetaui ai la ona ia faatonuina ona soʻo e faamanatuina lona maliu.—rs itu. 266-267.
E FAAPEA ONA TATOU FAAALIA LE TALISAPAIA
4 E anoanoai aso faamanatu o le lalolagi i le tausaga, ma e tele ni mea ua faia ina ia lagolagoina ai. I le isi itu, o le Talisuaga Afiafi a le Alii ua na o lea le aso faamanatu na poloaiina ai soʻo e mulimuli tuʻi i tulaga aao o Iesu ia tausia. E lē tau fesiligia, o se aso faamanatu silisili lea i le tausaga mo Kerisiano moni uma. Pe lē tatau ea ona avea le uiga loloto o le faamanatuina o le Talisuaga Afiafi a le Alii e uunaia ai i tatou ia fai ma taulaʻiga o manatu ia Mati?
5 Atonu e mafai ona tatou faaaluina ni nai minute i vaiaso taitasi o Mati, e talanoa ai ma a tatou tagata aʻoga o le Tusi Paia, mau o loo faapea ona faamatilatila ai le uiga o le maliu o Keriso ma faaali ia i latou le faavae mo le Faamanatuga. E mafai foi ona tatou faalaeiauina i latou e mulimuli totoʻa i le faitau Tusi Paia o le Faamanatuga mo Mati 25-30, e pei ona matauina i le 1991 Calendar of Jehovah’s Witnesses. O le a mafai ona fesoasoani lenei mea e faaloloto ai lo latou talisapaia mo le Talisuaga Afiafi a le Alii.
6 Talu ai e paʻū le faamanatuina o le Faamanatuga i le Aso Toonai, o le a faigofie la mo le toatele ona faatulaga a latou fuafuaga ina ia auai. E toatele tagata talaʻi ua faaaogāina tatau le mea moni faapea e lima faaiʻuga o vaiaso ia Mati e galulue ai o ni paeonia lagolago. O lenei mea, ua faaavanoa ai i latou ia faia se sao e sili atu i le faamamafaina o le faamanatuina o le Talisuaga Afiafi a le Alii. Ua ia aumaia ni avanoa faaopoopo e fesoasoani ai i ē fou ia sauniunia faalemafaufau mo lenei faatasiga faapitoa.
7 I le manatu atu i le uiga ua faamanatuina ai le Faamanatuga, seʻi o tatou faia ia o mea uma tatou te mafaia e fesoasoani ai i isi ia auai. E mafai ona maua faamanatu aogā o auiliiliga e ao ona vaaia e toeaina i La Tatou Faiva o le Malo o Mati 1989 ma Aperila 1990.
8 Talosia ia tatou tu vae atu i lena aso e silisili ona tāua i le 1991 ma se utaga manino ma le talisapaia loloto mo mea uma ua uiga i ai le maliu o Iesu mo le fanau a tagata. Ioe, talosia ia tatou auai uma lava i le afiafi o Mati 30, o ni tagata tapuai moni o Ieova o loo usiusitai ma le faamaoni i le poloaiga a Iesu, tatou te toe “faailoa atu ai le maliu o le Alii seia afio mai o ia.”