Le Faamanatuina o le Maliu Lea ua Aumaia ai le Faamoemoe o le Ola e Faavavau

¹ Pe a mavae le goto o le la ia Aperila 6, 1993, o le a tatou faamanatuina ai le maliu o le Alii Sili o le ola. (Galu. 3:15) Ioe, ua matuā alagatatau ona faamanatuina le soifua ma le maliu o Iesu Keriso. O lo tatou lava faamoemoe o le ola e faavavau, ua faalagolago atu lea i le toto masaa o Iesu.

² Ua faamatilatila mai e le Faamanatuga le tāua o le maliu o Keriso e tusa ai ma le galueaiina o le fuafuaga a Ieova. O lena fuafuaga e aofia ai le saunia o le taulaga faaletagata e lelei atoatoa, sa manaomia e togiolaina ai le fanau a Atamu, ua mafai ai e le faitau piliona ona faatuatua i ai ma ola ai e faavavau i se lalolagi parataiso.—Ioane 3:16.

³ O loo tulimataʻia e ē uma e alolofa i le upu moni ma le ola, le faamanatuina o le Talisuaga Afiafi a le Alii, ona o le usiusitai i le poloaiga a Iesu. (Luka 22:19) O le ā e mafai e i tatou taitoatasi ona faia e faaalia ai lo tatou talisapaia o le sauniuniga mo le taulaga togiola a Keriso? E tāua tele se faamaopoopoga lelei, e faailoa atu ai le tāua o lenei faamanatuga. O ā au tapenapenaga o faia mo lenei sauniga faapitoa?

⁴ E Manaomia Muai Sauniuniga Mamao: Ioe, ia tatou faamautinoa o le a auai uma tagata o le aiga. E ao foi ona sauniunia o tatou mafaufau e ala i le faitauina ma manatunatu loloto i fuaitau o le Tusi Paia na o loo faailoga atu i le 1993 Calendar mo Aperila 1-6. E talafeagai foi ona faaaofia ai faamatalaga o le tāua o le Faamanatuga i a tatou suesuega totino faale-Tusi Paia ma suesuega a le aiga, lea e faia a o toetoe lava oo ia Aperila 6. Ia fuafua e vavevave i le nofoaga, ma ia faatuatuai foi ona ō ese pe a maeʻa le Faamanatuga, ina ia e avanoa ai e faafeiloai atu i ē fou atonu o le uluai taimi lea ua auai atu ai.

⁵ I vaiaso a o leʻi oo i le Faamanatuga, ia valaaulia mo lenei faamanatuga tagata loto naunau uma e te masani ai. Pe a faaaogā pepa valaaulia, ia manatua ona taʻu atu i tagata fiafia le nofoaga ma le taimi o le faamanatuga a la outou faapotopotoga. Ia sauniuni se lisi o i latou o loo e manao e valaaulia. Po o maua ni auala mo i latou uma o loo mananao e auai? Afai e leai, o le ā sau gaoioiga e fesoasoani ai ia i latou? Afai o iai se avanoa i lau taavale, aiseā e lē fesili atu ai i toeaina po o iai se isi o manaomia se auala?

⁶ Talu ai o le faamanatuga sili lenei ona tāua o le tausaga, ma o loo faatalitalia foi se aofia toatele, o le a manaomia ai la ona fai mamao atu e toeaina ni sauniuniga faapitoa. (1 Kori. 14:40) Pe tusa o se vaiaso pe ā a o leʻi oo ia Aperila 6, o le a faia ai e toeaina se feiloaiga faapitoa ma uso o ē o le a fesoasoani i le faamanatuga, ina ia faamautinoa ua latou malamalama i faatulagaga o nofoa ma le auala e ao ona tauaao faasolo atu ai le areto ma le uaina. Afai ua tofia oe e fesoasoani i le taimi o le faamanatuga e fai ma tautū po o se tautua, ia mautinoa le mulimulituʻi i taʻitaʻiga a toeaina mo nei mataupu. O le toe tagai i mea na o loo faamanatu mai i le pusa i le itulau e 7, o le a mautinoa ai e toeaina ua lelei ona muai sauniuni mamao atu faatulagaga uma mo le au tautua, o ē tautū, o le areto ma le uaina, ma le failauga.

⁷ Ua toaitiiti lava uso o Keriso o loo totoe pea i le lalolagi i aso nei, ma i se taimi foi e lē o toe mamao atu, o le a faamutaina ai loa le faamanatuina o le Talisuaga Afiafi a le Alii. (1 Kori. 11:25, 26) Ma, a o avea pea ma o tatou faaeaga le faia faapea, seʻi o tatou faamanatuina pea i se auala talafeagai le maliu, lea ua aumaia ai le faamoemoe o le ola e faavavau.