Agaʻigaʻi i Luma i le Faiva
1 Ua faapea mai se muagagana anamua e uiga i le agaʻigaʻi i luma: “Amata i le mea o e iai. Ae aua e te nofo ai.” Maeu le fetaui lelei o lena faaupuga i le agaʻigaʻi i luma i le faiva! Ina ua amata ona e alu i le faiva, atonu sa na o se taulimaga puupuu lava o le feau o le Malo na mafai ona e faia. Peitai afai e mavae atu ni nai tausaga ae e te leʻi see ese lava mai lena tulaga, o loo e nofo ai, o le ā e mafai ona e faia?
2 O le uluai laasaga o le ole atu lea ia Ieova mo le atamai e manaomia ina ia agavaa ai e aʻoaʻo atu. (Faata. 15:14; Iako. 1:5) O le laasaga lona lua o le galue ia ōgatasi ma lau tatalo. Faataatia ese sina taimi e autalu ai taulimaga i le tusi Reasoning. Vaai se taulimaga e te lagona e mafai ona e faaaogāina ma le uigā, ona faaaʻoaʻo lea ma toe faaaʻoaʻo o lena taulimaga seia oo ina manino i lou mafaufau. O le laasaga lona tolu o le ō faatasi ma ou uso i le fanua ina ia mafai ai ona e faia le taulimaga ua e sauniunia.
UO E FESOASOANI IA TE OE
3 Atonu e te faapea mai, ‘E faigofie a le tautala ia na i lo le faatino.’ E moni, ae o le pogai lena o le iai o au uo e fesoasoani ia te oe. Afai e te laitiiti, talanoa ma ou mātua po o ni tagata talaʻi ua iai le poto masani o ni faifeau e fuatele mai. Fesili ia i latou mo ni faufautuaga i le auala e felafolafoai ai ma tagata i aiga. Atonu latou te fautuaina ni vaega faataʻitaʻi ina ia mafai ai ona faaaʻoaʻo lau taulimaga. E mafai ona fai i latou ma tagata e ona le fale, e faatutuina mai ni teteega masani e faafetaiaia i aiga. I le faataʻitaʻia, o le a mafai ai ona e iloa felafolafoai ma le tomai ma tagata.
4 E iai foi isi au uo e mafai ona fesoasoani ia te oe. O loo iai paeonia o ē ua aʻoaʻoina auala e fai ai le talaʻiga e ala i mea tutupu ma le auai i le Aʻoga o le Auaunaga Paeonia. Atonu foi e avanoa lau taʻitaʻi o suesuega tau tusi po o le ovasia o le auaunaga lua te galulue faatasi i lea fale ma lea fale ma faataʻitaʻi atili ai le auala e talanoa ma fetufaʻai ai ma tagata.
TULILOA LE NAUNAU SA FAAALIA
5 Tatou te naunau e avatu atili se fesoasoani faaleagaga i tagata o ē talia a tatou lomiga. O le uiga o lena mea e tatau ona tatou toe foi e faagaee atili le naunau. A o leʻi faia le toe asiga, autalu le mea na e taʻua i le uluai asiasiga ina ia mafai ai ona e atiina aʻe ia matuā uigā le mataupu na faaosofiaina lo latou naunau. Ia teu foi i manatu, faapea a o tatou totō ma faasūsū, o Ieova o lē na te faatupuina. Talosaga mo lana taʻitaʻiga a o leʻi faia le asiga. (1 Kori. 3:6; 2 Kori. 9:10) A o tatou fesoasoani atu e aʻoaʻoina isi, o loo tatou agaʻigaʻi totino ai foi tatou i luma.
6 O le laasaga tāua e sosoo ai o le amataina ma le faafoeina o se suesuega faale-Tusi Paia. Afai e te leʻi ausia lava lena tulaga i le taualumaga o lau faiva, ia faaauau ona faalatalata atu ia Ieova i le tatalo ma ole atu ia te ia e fesoasoani mai ia te oe e sailia ma fafaga i sē pei se mamoe. E mafai foi ona e iloa le aogā o le matauina o le auala e faafoeina ai e se faiaʻoga tomai se suesuega faale-Tusi Paia, ona faataʻitaʻi lea i ana auala e aʻoaʻo atu ai. Ia autalu foi, le faamatalaga i le aʻoaʻo atu ai. Ia autalu foi, le faamatalaga i le aʻoaʻo atu e pei o lena e maua i Le Olomatamata o Mati 1, 1985, itulau e 8-17. I le sauniunia la o oe lava, o le a e nofo sauni ai e faafoeina se suesuega pe a taliaina au tatalo.
FAATAATIA MA AUSIA SINI
7 O le ausiaina o sini ia uigā atili i le aʻoaʻo atu, faia o toe asiga, ma le faafoeina o suesuega e alu ai se taimi. Pe mafai ona e faataatia mo oe lava se isi sini, o le avea o se paeonia lagolago po o se paeonia sauatoa? A o faaauau ona e agaʻigaʻi i luma i le faiva, e mafai ona avea oe ma puna o faalaeiauga i isi. E anoanoai faamanuiaga mai ia Ieova e mafai ona fai mo oe pe afai e te lē nofo ai i le mea o loo e iai ae matuā agaʻigaʻi i luma.