Taulimaina o le Tala Lelei—Ia Uigā Atili e Ala i le Faalogologo
1 Ina ia uigā i latou faiva, e tatau ona tatou manatua e lē tutusa uma ni tagata se toalua. E tofu a le tagata ma tomai eseese i le olaga, ma e eseese foi mea totino e pupū ma faanaunau i ai. O le luʻi, o le avea lea o le feau o le Malo ma mea totino, o lona uiga, ia faailoa i le tagata o loo tatou talanoa le mea e uiga i ai mo ia lava. Ina ia uigā le faia o lenei mea, e tatau foi ona tatou faalogologo ma le lē gāsē.
2 E toatele tagata talaʻi ua faaaogāina ma le faautauta fesili i a latou faatomuaga, ma ua fesoasoani lenei e faaaafia ai lē ona le fale i le talanoaga. E sili atu ona uigā fesili faatupu manatu e lē faalumaina ai lē ona le fale. Ae a tautala lē ona le fale, e matuā tāua ona tatou faalogologo i le mea o loo ia tautalagia. O le faalogologo e faaalia ai le alofa ma le faaaloalo i tuaoi, ma o le faia faapea tatou te maua ai le malamalama i mafaufauga o le tagata. O le iloaina o aiaiga o le tagata e mafai ai ona tatou ootia, ma tuua ai i tatou lava i lona tulaga. Ona mafai loa lea ona tatou fetufaʻai ma ia le faamafanafanaga ma le faamoemoe mai le Tusi Paia.
IA FETUUTUUNAI
3 Na apoapoai mai le aposetolo o Paulo: “Suesue le auala sili e talanoa ai ma tagata taitoatasi lua te feiloai.” (Kolo. 4:6, New English Bible) E ui ina tatou te lē muai iloa le mea tonu e ono fai mai ai se tagata, ae ua tatou masani ma faafitauli o loo fesagaʻi ma le toatele o tagata i aso nei. O lea, e mafai ai ona tatou “suesue” ma sauniunia le mafaufau e tali atu ai i tulaga eseese.
4 Mo se faaaʻoaʻoga, atonu ua tatou sauniuni e felafolafoai i le mataupu o le filemu i le lalolagi, ae teʻi ua fai mai lē ona le fale ua uma ma lana galuega. Pe ao ea ona tatou faaleamanaia lena faamatalaga? E lē masalomia, o loo mamafa i lona mafaufau ma le loto le mataupu e uiga i le tausia o lona aiga. E mafai faapefea ona e tali atu i ona manaoga? E mafai ona e ootia faatasi ma ia, i le faaalia o le manatu mamafa moni mo lona tulaga. Ona faasino lea ma le agalelei ona manatu i mau ua folasia ai le auala o le a saunia ai e le pulega a le Atua galuega mo le faamalieina o i tatou ma o tatou manaoga uma.—Isaia 65:17, 21, 22, 24.
5 Atonu pe tatou te iloa o lea tagata po o se sui o lona aiga sa leʻi mamao atu ona aafia fua i se solitulafono pe mafatia ona o le faamasinogaletonu. O lo tatou manatu ootia ma le naunau totino i ia tulaga atonu e faatoafilemu ai le loto o le tagata, ma mafai ai ona faailoa atu ia te ia faapea o loo matuā silafia e Ieova le Atua nei faafitauli tigā ma ua toeitiiti ona ia gaoioi lea e aveesea amioleaga uma.—Vaai le Reasoning From the Scriptures, itulau 10, 12, 229-321.
6 E masani a ona leaga faiā i le va o tagata ona e lē lelei a latou fesootaʻiga. A tautala le tasi, ae atonu e lē uai moni atu i ai le mafaufau ma le loto o le isi. O sea masani leaga tau faalogologo e mafai ona iʻu feeseeseaʻiga ma misia ai avanoa e fesoasoani ai i se tasi. I le atiina aʻe o se masani lelei e faalogologo ma le faaaloalo, e mafai ai ona tatou taulimaina le tala lelei ia uigā atili, e faaatagia atu ai le naunau lē manatu faapito o Ieova i isi, ma fesoasoani ai i isi e atiina aʻe se faiā lelei ma Lē na Foafoaina i tatou e alofa faapea ma ona tagata.—Iako. 1:19; g74 11/22 itu. 21-23.