Faaaogā le Tusi Paia i le Auaunaga i le Fanua
1 E mafai ona iai se aafiaga malosi o upu faagaeeina o le Tusi Paia i luga o tagata. Ona o lenei mafuaaga, sa faaaogā tatau ai e Kerisiano o le uluai senituri le Tusi Paia ina ua folafolaina atu le tala lelei. Sa ‘lauga atu Paulo mai le Tusi Paia,’ i le faamalamalamaina ma faamaonia o ona manatu i tala faamaumau. (Galu. 17: 2,3) Ina ua molimau atu Apolo, i tagata Iutaia, sa ia “faasino atu i Tusi, o Iesu o le Keriso lea.”—Galu. 18: 24-28.
2 O loo mulimuli Molimau a Ieova o aso nei i lena faaaʻoaʻoga. E pei ona taʻua i le Olomatamata o Novema 1, 1986, itulau e 20: “A o latou auai i le faiva mo le lautele, latou te mananao ia iloa e tagata o le feau o loo latou faailoa e le mai ia i latou lava a e mai le afioga a le Atua lava ia. O lea ua latou [faaaogā tuusao ai le Tusi Paia, e faitauina atu] i isi pe a talafeagai.” O e faaaogāina atoatoa ea le Tusi Paia i lau faiva?
LE AUALA E UIGĀ AI
3 Aiseā ua matuā uigā ai le Tusi Paia? Auā o le Afioga ia a le Atua ma “o loo faamasino foi i manatu ma filifiliga o le loto.” (Eph. 4:12) O le a folasia lava i lumamea uunaiga moni o tagata taitoatasi pe a faailoaina i ai le upu moni o le Tusi Paia. Ua tosina i ai tagata loto faamaoni. Mo se faaaʻoaʻoga, sa fesiligia se ulugalii talavou o ē sa vave ona agaʻigaʻi i luma i le auaunaga ia Ieova pe aiseā na vave ai ona la tali mai i le tala lelei. O le la tali? “Ona o le Tusi Paia.” Ina ua taʻitaʻia o la manatu i le Tusi Paia, e tagata talaʻi o ē na asiasi ane ia i laʻua, sa la iloatino ai le siufofoga o “le leoleo mamoe lelei.”—Ioane 10:14; w-E 6/1/78 itu. 22-23.
4 Pe e te lagona i nisi taimi le lē lava taoso i le faaaogāina o lau Tusi Paia i le auaunaga i le fanua? O se polokalama lelei tau suesuega totino, e aofia ai le sauniuni ma auai i sauniga uma a le faapotopotoga, o le a faaauupegaina ai oe mo galuega lelei uma lava ma faaopoopo atu ai ia te oe le mautinoa. (2 Timo. 3:16,17) E mafai e au soa i le auaunaga atoa ma sui o le aiga ona faataʻitaʻi e le tasi i le isi le Mataupu mo Talanoaga. O loo aofia foi, i le tele o faatomuaga i itulau e 9-15 o le tusi Reasoning le faitauina o se mau i le amataga o le talanoaga. Aiseā e lē faataʻitaʻi ai nisi o na mea? Faaaogā manatu e aogā ma puʻe le naunau o tagata i lau oganuu.
FAAAOGĀ LE UTAGA POTO
5 E iai taimi tatou te mananao ai e valaaulia lē ona le fale e aumai lana lava kopi o le Tusi Paia ma sue faatasi ai se mau ma i tatou. Ia faaaogā le utaga poto i tulaga faapena. (Vaai le tusi Reasoning, itulau 67, palakalafa 3, ma le itulau 279, palakalafa 2.) A manaomia ona faapuupuu, e mafai ona tatou filifili e faitau na o se mau e tasi i la tatou Mataupu mo Talanoaga. Pe afai foi e manino mai o loo pisi lē ona le fale, atonu e na ona tatou oto atu lava i ai o se fuaiupu talafeagai, ma faailoa atu i lē ona le fale e mai i le Tusi Paia. Sa leʻi maua e Iesu ma le au aposetolo ni a latou kopi totino o Tusitusiga Eperu latou te ō ma ave i le talaʻiga. E ui i lea sa tele ina latou otoina mai i latou. E ao foi ia i tatou ona faia se taumafaiga e taulotoina ai mau ina ia teu i o tatou mafaufau mo le faaaogāina i la tatou faiva.
6 Sa tomatauina e Paulo Timoteo ina ia ‘tonu ona taulimaina le upu moni.’ (2 Timo. 2:15) E faatatau foi lea apoapoaiga e tasi ia i tatou i aso nei. Tatou te mananao e faaaʻoaʻo ia Iesu ma le au aposetolo i le faaaogāina pea o le Tusi Paia i la tatou faiva i le fanua. Ia faitau ai i taimi uma lava e mafai ai, ae afai e tatau, ia oto mai mea o loo e manatua. O lo tatou faia o lenei mea ma le uigā o le a faamanino atu ai, o i tatou o ni faifeau a le Atua ma o la tatou feau e faavae mausalī i lana Afioga.