Fuafua Nei e Auai i le Tauaofiaga Itumalo 1991 “O Ē Alolofa i le Saolotoga”

¹ I le matau atu i tulaga o le lalolagi i aso nei, e lē o se mea e ofo ai ona i le tele o atunuu, ua loa ona moomoo tagata mo se saolotoga e sili atu na i lo le saolotoga o loo ia i latou. Ae o fea e mafai ai ona maua le saolotoga moni? Na fetalai Iesu Keriso: “Afai tou te tumau pea i laʻu mataupu, o oʻu soo moni outou. E iloa foi e outou le mea moni, e tuu saʻoloto foi outou e le upu moni.” (Ioane 8:31, 32) O lenei saolotoga e lē o se ituaiga e gata mai, lea o loo faamoemoe i ai tagata pe a latou teena se tasi o taʻitaʻi faapolotiki po o se vaega faafaiga malo ona ua fiafia i le isi. Na i lo lena, ua ia pāʻia le ʻaa o faafitauli faaletagata. O le mea sa talanoaina e Iesu o le saolotoga mai le nofopologa i noanoataga o le agasala. (Vaai Ioane 8:24, 34-36.) O lea, pe a oo ina avea se tagata ma soʻo moni o Iesu Keriso, e iʻu ai i se suiga iloga o lona olaga, se tuusaolotoga.

² SE TAUAOFIAGA E TOLU ASO: Mo le Lala i Samoa i Sisifo, o le a tatou faia ai se faasologa e fa o Tauaofiaga Itumalo 1991 “O Ē Alolofa i le Saolotoga,” e pei ona mulimuli mai: Amerika Samoa, Community College, Mapusaga, Aokuso 9-11; Toga, Tongan National Centre, Nukuʻalofa, Aokuso 30-Setema 1; Samoa i Sisifo, Apia Park (Faa-Samoa) ma le Maota o le Malo (Faa-Peretania), Apia, Setema 27-29; Tuvalu, Maota o le Malo, Funafuti, Novema 1-3. O le a amata le vaega muamua i le 10:20 i le taeao o le Aso Faraile, ma o le a faamutaina le tauaofiaga e tusa o le 4 i le afiafi o le Aso Sa. O le a tauaaoina i vaega taitasi faamatalaga ua filifilia ma le faaeteete e matuā tāua i lo tatou soifua maloloina faaleagaga. E matalasi mataupu o le a faamatilatila ai le auala e mafai ai ona fai mo i tatou le saolotoga o loo faasino i ai i le Roma 8:21. O le a atiina aʻe faamatalaga e faagaee ai ma taulimaina i lauga, faataʻitaʻiga, faatalanoaga ma se tala.

³ Ia fai ma au faaiʻuga ia aua neʻi misia se vaega e tasi. Atonu o le a manaomia ai i lenei mea ni taulaga totino ma ni fetuutuunaiga i lau faasologa. E no tatau ai ona faia ni faatatauga faapitoa ma lou pule. Ua lafoaia e le toatele ni lelei tau tupe ina ia mafai ai ona auai i vaega uma. E mautinoa o le a faamanuia e Ieova i latou o ē avea lenei itu ma mataupu o tatalo faatauanau ma faamuamua se taumafaiga mai le loto ina ia iai i inā.—Luka 13:24.

⁴ IA VAVE TAUNUU: Ua lauiloa Molimau a Ieova mo a latou taumafaiga ina ia faatuatuaina ma tausisi i le taimi. (Luka 16:10) E tāua foi lenei pe a auai i le tauaofiaga itumalo. Ia vave taunuu i aso taitasi, ma nofoi a o leʻi amataina le polokalama. O le a manaomia ai i lea ona faaavanoa ia lava se taimi e vaavaai ai isi mea e manaomia ona uaʻi atu i ai, e pei o le pakaina o taavale ma le sailia o ni nofoa mo lou aiga.

⁵ O le auai i le tauaofiaga itumalo e aumaia ai ia i tatou se avanoa lelei e olioli ai i mafutaga tausaafia. Peitai e mafai e le ō faatasi ma uo i le leva o le po ona faalavelavea ai au taumafaiga e taunuu tonu i le taimi i le aso e sosoo ai. O le tele o le popole ma le lē mautonu e mafua mai i le tuai ona ala ma tau faananati ai i le taeao. Ina ia alofia lenei, e aogā ona faataatia se taimi talafeagai e momoe ai. I le pipii aʻiaʻi i se faasologa, o le a maua ai e tagata uma lava se moe lelei i le po ma sauni ai e vave usu i le aso e sosoo ai. O le a alofia e lenei le ono taunuu atu ua faagasolo le polokalama, lea e fai ma faalavelave ma atonu e faasoesa ia i latou ua leva ona nofoi. O le vave taunuu i aso taitasi o le a faaavanoa ai oe e mafuta faatasi ma ou uso ma tuafafine. O le alofa faa-Kerisiano ma le magafagafa, faatasi ma le faaaloalo mo Ieova ma mea faaleagaga ua ia saunia, e ao ona uunaia ai i tatou e faia le mea sili tatou te mafaia ina ia taunuu i le taimi tonu.

⁶ FAALOGOLOGO MA LE LĒ GASĒ: O le faalogologo o lona uiga, ia uaʻi moni atu lava o tatou mafaufau ma o tatou loto, faatasi ma o tatou taliga ma lo tatou malosi e malamalama ai. E manaomia ona tatou faalogologo ma ‘lagona le afioga a Ieova.’ (Iere. 2:4) Na poloaiina e Ieova Isaraelu i le Isaia 55:2: “Seʻi matuā faalogologo mai ia ia te au.” O le upu “matuā” ua faauigaina i le “taulaʻi aʻiaʻi po o le uaʻi naunau atu.” Afai tatou te uaʻi atu a o faagasolo le tauaofiaga, o le a tatou naunau ai la e “faalogo ma ave i fale nisi faamatalaga atili.” (Faata. 1:5, NW) Ina ia faalogo ma aʻoaʻoina i se tauaofiaga itumalo e masani a ona faaaluina ai se taumafaiga ma le mafaufau loloto e sili atu i lo le mea o loo faia i le Maota o le Malo. Aiseā? Ona e umi se taimi tatou te saofafaʻi ai, ma e sili atu ona tele faatosinaga ona o le aofaiga tele o tagata o loo auai. Afai tatou te lē uaʻi atu, o le a tatou faaogea ai la i tatou lava ma misia ai le mauaina o aogā atoatoa o le fafagaina faaleagaga susua ua saunia. (1 Pete. 2:2) O le ā la e mafai ona faia? O se mea fiafia le matauina o le toatele o sui usufono o le tauaofiaga ua atiina aʻe se masani lelei o le faia o faamaumauga o le polokalama. A o faasolo mai i lomiga nisi o lauga o le tauaofiaga itumalo, ae o isi e leai. E faalaeiauina tagata uma lava e fai ma sini le faia o ni faamaumauga pupuu i le taimi o le tauaofiaga itumalo ona o se auala lelei lena e ta mau ai lou uaʻi atu i mea o loo tautalagia.

⁷ E lē manaomia ona faauumi ma salafa faamaumauga. E masani a ona lava se fuaiupu e tasi pe lua mo se manatu autū. E oo foi i tamaiti laiti o le a tele ni mea latou te maua mai lauga ma fesoasoania e uaʻi atu pe afai e tuu i ai se ʻapi faamaumau ma se peni po o se penitala ina ia mafai ona latou faamauina i lalo manatu tāua a failauga ma mau autū po o manatu fou atonu e tauaaoina. Ua iloa e toeaina le aogā o le faia o ni faamaumauga ua faatulaga lelei mo le faafoeina o se autaluga fiafia o le polokalama o le tauaofiaga i le Sauniga o le Auaunaga pe a uma le tauaofiaga itumalo. Atonu foi,latou te mananao e taaofaia le tele o manatu sa aaoina i le tauaofiaga i la latou galuega tau aʻoaʻo atu ma faaleoleo mamoe.

⁸ IA AUTASI I PESE MA TATALO: O se vaega o la tatou tapuaiga e aofia ai le faapaiaina o Ieova e ala i le usuina o ona viiga, e pei foi ona sa faia e Iesu ma ona aposetolo. (Mareko 14:26) O le faamatalaga a Paulo i le 1 Korinito 14:15 e faatatau i pesega, e peiseaī e faaalia ai sa avea o se vala masani o le tapuaiga faa-Kerisiano. (Vaai foi La Tatou Faiva o le Malo o Fepuari 1991, itulau 7.) O tauaofiaga itumalo ua tatou maua ai se avanoa tutasi e autasi ai ma le faitau afe o o tatou uso ma tuafafine i le viia o Ieova i pesega atoa ma tatalo. Peitai, ua faaalia e nisi le leai o se faaaloalo mo ia vaega tāua o la tatou tapuaiga. E faapefea? E ala i le taunuu faaletatau i le tauaofiaga a o faia pe maeʻa foi le pese ma le tatalo. I le faaiʻuga o le polokalama, e tuua ai e nisi o latou nofoa a o usuina le pese pe a o leʻi faia le tatalo. Atonu e iai se mafuaaga lelei e faia ai faapea ae seāseā. Peitai, pe o se faaalia ea o le faaaloalo tatau ma le sapaitalia mo le laoai a Ieova pe afai e faaleamanaia e nisi le avanoa e pepese ai ma tatalo faatasi i le tau a ina mafai ai ona latou vave ō i a latou taavale pe aai?—Mata. 6:33.

⁹ E tatau ona faatinoina le faaeteete i le sailia o lelei totino, ae aua neʻi o tatou faatagaina le uiga fiamata muamua o le lalolagi po o mailei lē faaleatua e pei o le matapeapea ma le manatu faapito e fai ma lave i lo tatou agaʻigaʻi i luma faaleagaga. I tausaga talu ai nei, e toatele o tatou uso ma tuafafine i atunuu o Europa i Sasae sa faatoʻā olioli lava lea i le saolotoga e pepese ai ma tatalo. E pei a ona faamaniti tino ia i latou le mafai ona pepese ma tatalo i ni aofaiga tetele, seʻi tau foi la ina tatou faaalia lea lava agaga e tasi o le sapaitalia mo mea paia i le taimi nei ma aua lava neʻi manatu māmā i avanoa tatou te pepese ma tatalo faatasi ai.

¹⁰ A TATOU AMIO FAA-KERISIANO: O a tatou amio faaʻKerisiano ma foliga faaalia i tauaofiaga itumalo ua faaauau ai ona tatou aeaeina se talaaga lelei o ni Molimau a Ieova. Ua mafua lenei ona tatou te manatu mamafa i la tatou tapuaiga ia Ieova ma ona tatou te lē manatu i le auai i se tauaofiaga ua tau o se tafaoga faavafealoai. Pe a tatou aofaga potopoto mo na faatasiga faapitoa, e ao ona tatou tausisi i lo tatou mamalu faa-Kerisiano ma se lagona faaleagaga o le mafaufau e ala i le pulea o i tatou lava o ni faifeau i taimi uma.—1 Kori. 10:31-33.

¹¹ Afai e lē taulau ona tatou faia lenei mea, o le a afaina la ia i tatou le fiafiaga o isi, e oo foi ina tausuai ai ē fou. Pe tatou te amanaia ma faaleoina le sapaitalia e oo lava i sina faaaliga itiiti o le agalelei ia i tatou. E ao ona tatou nofo uta i isi o loo i o tatou autafa ma faaalia le faaaloalo ma le magafagafa. O tagata uma lava e ao ona sapaitalia faapea a amata loa le polokalama, o le taimi lea e faalogologo ai, ae lē o le fesavaliaʻi solo pe talanoa.—Teu. 31:12.

¹² O se isi vaega e mafai ai e a tatou amio faa-Kerisiano ona faapaiaina Ieova le Atua, o a tatou feutagaʻiga ma isi o ē ua saunia mo i tatou se nofoaga e api ai. Afai tatou te nonofo i se fale mau totogi po o se faletalimalo, e ao ona tatou faaalia le sapaitalia ma le magafagafa i ē pulea faletalimalo, ia migao ae aua le soona tagisā. (Kala. 6:10) Ua aumaia ni fautuaga lelei e faatatau i amioga tatau i faletalimalo. A o toatele na tali lelei mai ma taumafai ma le faamaoni e felagolagomai atoatoa ma ē pulea faletalimalo, ae o se mea e faalotovaivai ai le matauina o se vaaiga sese agaʻi i Molimau a Ieova o loo faaauau pea i nisi nofoaga. Aiseā?

¹³ O se mataupu e faapopoleina ai i latou o loo pulea faletalimalo ona ua ō ese nisi Molimau mai faletalimalo ae tuua o latou potu i se tulaga e lē fia vaai i ai. E ao ona faaalia le tumamā ma le magafagafa e lē gata i o tatou laei ma amio ae faapea foi i le auala tatou te taulimaina ai mea totino a isi. Pe iai ea se pogai e ao ai ona lē tuua se potu mau totogi i se tulaga lelei ma le mamā? O amioga faaletaupulea e faaleagaina ai lo tatou igoa lelei. I tauaofiaga itumalo o loo sau, e ao ia i tatou uma ona fai ma a tatou faaiʻuga ia pulea i tatou lava ina ia “viia ai i mea uma lava talu o i latou le mataupu a le Atua lo tatou Faaola.”—Tito 2:10.

¹⁴ MO MĀTUA: Ua valaaulia foi ma faatalitalia tamaiti laiti ma ē talavou e auai i le Tauaofiaga Itumalo “O Ē Alolofa i le Saolotoga.” E mafai e le saolotoga ua ofoina mai e le lalolagi ona taʻitaʻi ai i lo latou oti faaleagaga, e pei lava ona leiloa ia Atamu le saolotoga na tuu mai i le fanau a tagata i le amataga. Ua saunia e le faalapotopotoga alofa a Ieova ni mafuaaga saʻo mo i tatou uma i lenei mataupu. E faalaeiauina i tatou i le vaai atu i talavou o ē ua aʻoaʻoina e uaʻi totoʻa atu i sauniga faaʻKerisiano uma lava ma o ni ē e matuā naunau i le polokalama o le tauaofiaga. (Sala. 148:12,13) Ae o le tele lava e faalagolago i le faaaʻoaʻoga ma le faatonutonuga a mātua. O le toatele o ē talavou ua lelei ona aʻoaʻoina e faia ni faamaumauga. Afai e te leʻi aʻoaʻoina lava lau fanau i le auala e fai ai faamaumauga, aiseā la e le faaaogā ai le taimi o loo totoe a o lumanai le tauaofiaga e faia ai faapea? E oo foi i le au laiti e mafai ona faalaeiau e tusi i lalo mau sii ma upu autū e fesootai i ai sa latou faalogo a o faaleoina mai e failauga. Ua fuafuaina e nisi mātua e autalu manatu autū mai le polokalama pe a taunuu atu i le mea o loo latou faamautu i ai pe a o malaga atu foi i le aiga.

¹⁵ O le mea moni, e toatele mātua e malamalama faapea o le vaivaiga faalenatura o fanau o le fia taaalo. E lē lava lo latou poto masani i le olaga, ma e leʻi taʻumatuaina i latou. O le mea lea, e tatau ai ona aʻoaʻoina i latou po o afea e uaʻi totoʻa atu ai ma le auala e pulea ai i latou lava i sauniga. Ua manaomia ai i lenei le vaavaaiga lelei a o latou mātua. O nisi mātua e fai si faatalalē i lenei itu. I isi taimi, e ui ina atonu o loo faaalia e mātua le faaaloalo tatau ia Ieova a o faia le tatalo, ae o loo taaalo a latou fanau ma faasoesa i isi. E ao a i mātua ona iloa mea o loo faia e a latou fanau e oo lava i le taimi o tatalo. O ā foi a latou mea o fai pe a tuua o latou nofoa i le taimi o le polokalama? Pe o tuufau fanau a o faia po o le maeʻa foi o le polokalama o le tauaofiaga?—Faata. 29:15.

¹⁶ I nisi tulaga e tuufau ai fanau i vaitaele o faletalimalo a o la e iai mātua i le potu, pe ō e faiʻaiga, po o le aafia foi i nisi gaoioiga. E lē tatau lenei mea. Sa matuā le aʻoaʻia ma lē taupulea gaoioiga a nisi tamaiti ma oo ai ina le āva i uso ma tuafafine matutua o ē na taumafai e faatonutonu i latou i se auala agalelei. O na amioga lē taupulea ma e lē tatau mo Kerisiano, e masani ona avea ma iʻuga o le tuusaoloto ma le leai o se aʻoaʻiga i le aiga. E mautinoa e ao ona faasaʻoina. E ao i mātua Kerisiano uma ona avatu se vaavaaiga totoʻa i a latou fanau i taimi uma a o latou tausia aʻe i ‘latou i aʻoaʻiga ma apoapoaiga a Ieova.’—Efe. 6:4.

¹⁷ SAPAITALIA LOU FELAGOLAGOMAI ATOATOA: Ua faia ni fuafuaga mamao ina ia iloa ai ua lava ma totoe nofoa mo tagata uma e auai i le tauaofiaga. E talosagaina lou felagolagomai atoatoa i le mataupu o le taofia o nofoa. Faamolemole ia teu i manatu NA O SUI LAVA O LOU AIGA MA NISI O Ē TOU TE MALAGA FAATASI MAI I LAU TAAVALE E MAFAI ONA TAOFIA I AI NOFOA. Faamolemole aua le faaleoleoa nofoa mo isi. I nisi taimi, e faaleoleo ai nofoa faaopoopo mo se tasi e lē o mautinoa. O se lē alofa lenei ma le tau faasese i le au tautua ma isi o loo tau vaavaai mo ni nofoa avanoa. I le ōgatasi ma le fautuaga a le Tusi Paia, e ao ona tatou tauivi e faaalia le alofa faaleuso ma felagolagomai atoatoa ma le faatatauga ua iai mo le taofia o nofoa. E leai se tasi e faatagaina i ai ni nofoa se tele na i lo nofoa ua manaomia e lona aiga po o se vaega na ō mai faatasi i se taavale ona e faapea e lē totogia nofoa. Faamolemole ia felagolagomai atoatoa ma le au tautua a o latou faataunuuina lo latou tofiga mo le lelei o ē uma e auai.—2 Pete. 1:7.

¹⁸ E fautuaina faapea ia faaaogā le faautaga lelei i le aumaia o mea totino i le nofoaga o le tauaofiaga. I taimi ua mavae, na aumai ai e nisi pusa faamalūlū lapopoa po o isi mea tetele e lē mafai ona ofi i lato o o latou nofoa. Na tuua nei mea i va e savavali ai po o luga o nofoa. Ua faōa ai i lenei mea nofoa mo isi, ma i nisi taimi ua solia ai aiaiga tau tineimu ma le saogalemu. E manaomia ona tatou faaalia le magafagafa i na mataupu.

¹⁹ Ua iai se suiga atili o le a faia i faatatauga o le saunia o mea taumafa i lenei tausaga. E pei ona sa faia i fonotaga matagaluega, e ao i tagata uma ona fuafua e aumaia a latou lava mea taumafa i le tauaofiaga mo le ʻaiga o le aoauli, auā e leai ni meaʻai o le a saunia i le tauaofiaga. Peitai, o le a maua fua vai vevela ma vai inu malūlū mo i latou e auai i le tauaofiaga. Maeu se sauniuniga lelei o lenei itu. O lenei faatatauga o le a faamāmā avega ai i le tauaofiaga mo le manuia o tagata uma. E lē taumatea o sea agaalofa i le vaega a le faalapotopotoga a le Atua o le a uunaia ai i tatou ma le loto faafetai e faaleoina atu lo tatou sapaitalia i ni auala e aogā. (Faata. 11:25) Faamolemole ia faaeteete aua le faamaimauina vai inu po o isi sauniuniga o le tauaofiaga. Tatou te lē mananao e melea le agaalofa ua faaalia, ma solia ai mataupu silisili faale-Tusi Paia.—Ioane 6:12.

²⁰ Ma le mautinoa, e sapaitalia e tagata o Ieova le mafai ona faapotopoto faatasi i ni maota matagofie ina ia maua ai aogā mai le polokalama faaleagaga ua saunia. Tatou te sapaitalia foi auaunaga e tele ma avanoa ua saunia i na faatasitasiga. I se tulaga matuā faaeteete ma i se aofaiga tele o tupe ua faaalu e le Sosaiete, ua faia ai ni faatatauga ia lava ma totoe nofoa, faapipii mea faaleotele leo taugata, saunia o vai vevela ma vai inu malūlū, ma le taulimaina o isi mau faatatauga ma auaunaga ina ia avea ai le auai i le tauaofiaga o se mea e olioli ai ma faafouina faaleagaga.

²¹ O ia tupe faaalu ua ufitia lea i lau foai faameaalofa ma le lagolagosua i le galuega a le Sosaiete i le lalolagi aoao. Afai e te filifili e saini mai se siaki, e mafai ona totogi agaʻi i “Molimau a Ieova.” Ina ia faigofie mo oe, o le a faatutū solo pusa mo meaalofa ua manino ona faailoga i le maota o le tauaofiaga. E matuā talisapaia meaalofa uma, ma e fia faafetai mamao atu ai le Sosaiete mo lo outou limafoai ma le lagolagosua faatasi i faanaunauga o le Malo i lenei auala. Na faaalia mai e se tasi tagata le talisapaia i se aofiaga faameaalofa e lē mailoa: ‘E foliga mai e matuā manaia tele le iloa, ua tuu mai i la matou faitalia—e tuu i le loloto o lo matou lava talisapaia. O lea faatasi ma le loto faafetai ua uunaia ai o matou lagona e ofo atu se mea e sili na i lo le mea e masani ai.’ Matou te mautinoa o le a uunaia tagata uma ia lagona la latou avega tauave taitoatasi e faatatau i nei tupe faaalu ma felagolagomai atoatoa ai e tofu sao i le mamao e faataga ai e o latou aiaiga.—Luka 6:38.

²² AFIO MAI I LE TAUAOFIAGA ITUMALO “O Ē ALOLOFA I LE SAOLOTOGA”! I le auai i le Tauaofiaga Itumalo “O Ē Alolofa i le Saolotoga” ma uaʻi totoʻa atu i le polokalama, o le a faateleina ai lo tatou talisapaia mo le saolotoga e ala mai ia Keriso ma mo le faaaogāina tatau o lo tatou saolotoga faa-Kerisiano. Fai nei au fuafuaga ina ia auai mo le pese amata ma ia auai i vaega uma lava seia oo i le tatalo faaiʻu i le afiafi o le Aso Sa.

[Pusa i le itulau 6]

Faamanatu o le Tauaofiaga Itumalo

API: E toaitiiti a outou o le a manaomia ni api e faamautu i ai ona a tou lē nonofo i lo tou aiga i le taimi o le tauaofiaga i lou lava atunuu po o le faia foi o au lava faatatauga e nonofo ma ni uo. Peitai, afai o e fuafua e auai i se tasi o isi tauaofiaga ma manao e fuafua sou api e le tauaofiaga, faamolemole tusi mai auiliiliga i se tusi ma ia saini mai ai le failautusi a lau faapotopotoga. Auina mai lenei i le Ofisa o le Lala ma o le a matou auina atu i le matagaluega o api o le tauaofiaga o le a e auai atu i ai.

NOFOA FAATAAVALE O PEPE: E ui ina e seāseā faaaogāina ia mea i atumotu, ae atonu o loo e manao e aumai i le tauaofiaga. Afai o lea, faamolemole aua le faatuina i polotito, i va e feoai ai, po o le va o laina nofoa, ona e faasaina lenei e tulafono faatineimu. Mulimuli i faatonuga a le au tautua i le mea e ao ona e tuua ai ina ia lē faalavelave ai i isi o loo auai i le tauaofiaga ma lo latou ui atu i le vaega o nofoa.

PAPATISOGA: E ao i sui papatiso ona taumafai e iai i o latou nofoa i le vaega ua faailogaina a o leʻi amata le polokalama i le taeao o le Aso Toonai. O tagata taitoatasi ua fuafua e papatiso e ao ona aumai se ofu taele onomea ma se solo. A maeʻa le lauga o le papatisoga ma le tatalo a le failauga, o le a avatu e le taʻitaʻifono o lena vaega ni faatonuga pupuu i sui papatiso ona taloina loa lea mo le pese. E amata i le fuaiupu mulimuli, ona faasino e tautua sui papatiso i le itu e faatofu ai po o taavale e ave ai i latou i inā, a o faauma e isi o le aofia ona usu le pese. Ona o le papatisoga o se faailoga o le tuuina atu o se tasi e patino, ma o se mataupu totino i le va o le tagata ma Ieova, ua leai la se sauniuniga mo le mea ua taʻua o papatisoga fai-paga lea e toalua pe sili atu foi sui papatiso e faauōuō pe uulima a o papatiso.

AUAUNAGA TAUOFO: E manaomia fesoasoani tauofo mo le sologa lelei o taualumaga o le tauaofiaga itumalo. E tusa foi pe na o se vaega o le tauaofiaga e mafai ona e galue ai, e matuā talisapaia lava lau auaunaga. Afai e mafai ona e lagolagosua, faamolemole logo i le Matagaluega o Auaunaga Tauofo pe a e taunuu i le tauaofiaga. E mafai foi e fanau i lalo ifo o le 16 tausaga le matutua ona saosaolaumea mo le taulau o le tauaofiaga, ae manaomia ona latou galulue faatasi ma se matua po o se isi tagata matua na te vaaia.

PINE FATAFATA: Faamolemole ia laei mai pine fatafata ua fuafuaina faapitoa mo le tauaofiaga ma pe a malaga atu pe tuua foi le nofoaga o le tauaofiaga. E masani lava ona mafai ai ona tatou avatu se molimau lelei a o femalagaai. I le mataulia o oe o se sui usufono e ala i se pine fatafata ua tusia manino o le a faafaigofie ai ona faafoe le faatatauga ua faafaigofieina mo le saunia o vai vevela ma vai inu malūlū. E ao ona maua pine fatafata e ala i lau faapotopotoga, auā o le a lē maua i tauaofiaga.

UPU LAPATAI: Po o fea lava e te paka ai, e ao ona loka lau taavale i taimi uma ma aua lava neʻi tuua ai se mea e iloa atu i totonu. Loka au mea totino i tua o lau taavale, pe a tatau ai. Ia leoleo foi i tagata gaoi ma ē seʻia mea mai taga, o ē tosina ane i faatasiga tetele. E aofia i lenei le lē tuua o so o se mea tāua i luga o nofoa i tauaofiaga. Faamolemole ia faaeteete.

Ua lipotia mai faapea i nisi faletalimalo ua faigofie ona maua ai le avanoa mo ata televise e iai amioga leaga po o ata matagā foi. Ua faamatilatila e lenei mea le manaoga ia alofia le tuufau o tamaiti e matamata i le televise i nei fale e nonofo ai.