Tusia o Igoa i le Aʻoga o le Faiva Faatiokarate
1 Ua avea le Aʻoga o le Faiva Faatiokarate ma meafaigaluega e toleniina ai le faitau miliona o Molimau a Ieova e avea ma faifeau o le tala lelei. E toatele i tatou o loo manatua pea, pagā le popole ma le lē agavaa na tatou lagona ai ina ua faatoʻā tusia o tatou igoa i lenei aʻoga, a o le taimi nei, ua tatou ioeina ai ma le loto faafetai le mea ua faia e le aʻoga i lo tatou agaigai i luma faaleagaga i le avea o ni failauga ma o ni faiaʻoga o le Afioga a le Atua. (Faatusatusa i le Galuega 4:13.) Po ua tusia lou igoa i lenei aʻoga e sili ona lelei?
2 O ai e mafai ona tusia ai o latou igoa? Ua tali mai le itulau e 73 o le tusi, Organized to Accomplish Our Ministry: “O i latou uma o loo auaufaatasi ma le maelega ma le faapotopotoga, e mafai ona tusia igoa, e aofia ai ma tagata e fou mai lo latou auai i sauniga, pe afai ua latou ola i ni olaga e ogatusa ma mataupu silisili faa-Kerisiano.” Matou te valaauliaina i latou uma ua agavaa—o tane, fafine, ma tamaiti—ina ia ō atu i le ovasia o le aʻoga ma talosaga i ai ina ia tusia o latou igoa.
3 Polokalame mo le Aʻoga i le 1997: O le polokalame o le Aʻoga o le Faiva Faatiokarate mo le 1997, o le a aofia ai le tele o vala o aʻoaʻoga faale-Tusi Paia ma tagata o loo taʻua o latou igoa i le Tusi Paia, faapea ma le talafaasolopito o le faalapotopotoga. E faaopoopo i le faaleleia o lo tatou tomai e tautala ma aʻoaʻo atu ai, e aʻoaʻoina ai foi i tatou mai le tele o oloa tāua faaleagaga o loo maua i le polokalame faaleaʻoaʻoga i vaiaso taitasi. (Faata. 9:9) Afai tatou te sauniuni lelei mo le aʻoga, lea e aofia ai le faia o le faitau Tusi Paia faalevaiaso, ma le auai e lē aunoa, ona mafai lea ona tatou maua ai aogā sili faaleagaga mai le polokalame.
4 Mo le 1997, o le tele o faitau Tusi Paia mo le Tofiga Nu. 2 o le a pupuu atu nai lo o tausaga ua mavae. Pe a sauniuni la mo lenei tofiga, e tatau i le tagata aʻoga ona taimi lelei lana faitau tusi, ona fuafua lea po o le ā le tele o le lima minute o lana vaega lea o le a faaaogā mo upu tomua ma upu faaiu. O lenei mea, o le a mafai ai e le tagata aʻoga ona faaaogā atoa lona taimi, ma faaleleia ai e lē gata i lona tomai e faitau, a o le tomai e tautala atu ai ma le saunia lelei.—1 Timo. 4:13.
5 Ua faaopoopo foi i ai ma le molimau lē fuafuaina e mafai ona faaaogā mo faatulagaga i le Tofiga Nu. 3 lea e faavae mai le tusi o Le Poto. I lea, e mafai ai e se tuafafine ona filifili a lē o le faia o se toe asiga, o se suesuega faale-Tusi Paia i le aiga, ia po o le molimau atu lē fuafuaina e avea o se faatulagaga mo lenei tofiga. O le mea moni, e tatau ona tuu pea le faamamafa i le aʻoaʻo atu ma le uigā ae lē o le faatulagaga.
6 Ina ia fesoasoani i le ovasia o le aʻoga faapea foi tagata aʻoga, na tatalaina ai talu ai nei le tamai tusi faa-Samoa o le Auala e Faaleleia ai Lou Tomai i le Tautala ma le Aʻoaʻo Atu. O loo talanoaina ai uiga taitasi o le tautala lea o loo lisi atu i le pepa, Faatonutonuina o le Tautala. Pe a sauniunia a latou lauga, e tatau i tagata aʻoga ona iloilo ma le faaeteete le suesuega i le tamai tusi o loo talanoaina ai le uiga tau i le tautala lea ua tofia i latou e galue i ai. Ia mautinoa o loo aumai lau kopi o le tamai tusi i le aʻoga i vaiaso taitasi, ina ia mafai ai ona e mulimuli mai a o faaaogā e le ovasia o le aʻoga i le avatuina o fautuaga.
7 Pe afai e te maua le faaeaga e faia le lauga e aʻoaʻoina ai, meatāua o le Tusi Paia, po o se tofiga o se tagata aʻoga, e mafai ona faaalia lou talisapaia mo le Aʻoga o le Faiva Faatiokarate, i lou sauniuni lelei ma faataʻitaʻi lau vaega, e ala i le taulimaina ma le mautinoa ma le aasa, i lou lē ova taimi, i lou faalogologo ma faatatauina le fautuaga a le ovasia o le aʻoga, ma i lou taumafai pea e faataunuuina ma le faamaoni lou tofiga. O lea, o le tusia o lou igoa i le aʻoga, o le a faamaonia o se faamanuiaga e lē gata ia te oe, ae faapea foi ma le ʻau faalogologo.