Ia Onosai ma Faimea Maeʻa i le Faiva
1 Sa tausisia e le aposetolo o Paulo se uiga mataala i avega tauave i luma o Ieova ina ia onosai ma faimea maeʻa a o ia talaʻia le tala lelei i ē uma o le a faalogo. Sa ia taʻu atu ma le mautinoa i ovasia na aofaga ane mai Efeso: “Ou te le manatua se tasi mea, o loʻu lava ola foi ou te le naunau i ai, seʻi ou faauma loʻu momoʻe ma le olioli, atoa ma le faiva ua ou maua mai le Alii o Iesu, ou te molitino atu le tala lelei o le alofa tunoa o le Atua.” (Galu. 20:24) Pe o tatou lagona ea le manaoga ua lafo mai ia i tatou ina ia faia foi faapena?—1 Kori. 9:16.
I OGANUU E MASANI ONA GALUEAIINA
2 E faapitoa lava ona manaomia le onosai pe afai e masani ona galueaiina la tatou oganuu. E ui ina faatuaoia le oganuu, ae ao ona uunaia i tatou e asiasi pea lava pea i ai. Ia faamuamua se taumafaiga e faafesootai ai ē uma o loo mau i aiga taitasi, ma fesoasoani faasolosolo i tagata loto naunau moni e sapaitalia le faamoemoe ua faavae i le Tusi Paia o le Malo o le Atua.
3 A galueaiina soo la tatou oganuu, o se isi aogā o le onosai e mafai ai ona tatou faamasani totino ma tagata o aiga. E mafai i lenei mea ona latou lagona atili ai le toʻa e faaavanoa mai o latou aiga. O loo iai ni faufautuaga e sili ona lelei i le tusi Reasoning e mafai ona tatou faaaogā e feauauai ai a tatou faatomuaga i oganuu e masani ona galueaiina.—Vaai le tusi Reasoning, itulau 9-15.
4 Atonu e iai taimi tatou te asiasi atu ai i tagata o ē, a o faaalia mai sina naunau, ae lē taliaina a tatou lomiga. E ao faapefea ona tatou tali atu? O lo tatou taumafai e faimea maeʻa o le a uunaia ai i tatou e finafinau i le atiina aʻe o lena naunau. I le galueaiina o mea ua totoina i o latou loto atonu o le a uunaia ai i latou i se taimi mulimuli e talia se suesuega faale-Tusi Paia. Na faia e se tasi uso ni asiasiga i se tagata fiafia o se aiga e aunoa ma se lomiga na tuu ai mo ni vaiaso sosoo se lima. I le asiasiga lona ono, na talia ai e lē ona le fale ni lomiga, ma mulimuli ane sa amataina ai se suesuega faale-Tusi Paia.
OFOINA O LE POLOSIUA TOLUTASI
5 O la tatou Mataupu mo Talanoaga ia Iulai o le “Pe Ao ona E Talitonu i le Tolutasi?” Ua fuafuaina faapitoa lenei mataupu e tataʻi atu ai i le polosiua Tolutasi. Ona o lea ua tatou suesueina nei le polosiua i Suesuega Tau Tusi a le Faapotopotoga, ua tatou masani ai la ma mea o loo iai ma e tele ni manatu talafeagai e talanoa i ai e mafai ona tatou maua ai e faaaogā faatasi ma le Mataupu mo Talanoaga.
6 Mo se faaaʻoaʻoga, e mafai ona tatou faailoa atu i tatou ona faapea atu lea: “O i tatou uma lava tatou te mananao e tapuai i le Atua i le auala ua i talia. Ina ia faia faapea, ua faaalia i lana Afioga, e tatau ona tatou iloa le upu moni e faatatau ia te ia. Matau lenei mea i le Ioane 4:23. [Faitau.] O se tasi o upu moni tāua o le Tusi Paia, o le faiā lea a Iesu Keriso ma lona Tamā. Pe o i laʻua ea o se peresona e toatasi, po o ni peresona eseese se toalua? Sa faaalia e Iesu le matuā tāua tele ona maua o le tali saʻo i lenei fesili, ona e aafia ai lo tatou faaolataga. [Faitau Ioane 17:3.] Ioe, ina ia maua le ola e faavavau e manaomia ona tatou matuā iloa lelei le Atua atoa ma lē na ia auina mai, o Iesu. O le toatele o tagata o loo ō i lotu e talitonu faapea o Iesu Keriso o le Atua e Ona le Malosi Uma lava ma ua latou faaalia le tele o le faaaloalo mo ia. Afai e moni o lona tulaga lea, e tatau la ona tatou tapuai atu ia te ia. Peitai, afai o ia o le alo o le Atua ma na foafoaina e le Atua, o le a sese la ona avatu ia te ia le tapuaiga e tatau ona avatu i lona Tamā. Ua talanoaina manatu faale-Tusi Paia, o talafaasolopito ma isi faamatalaga e uiga i ia mataupu i lenei polosiua Pe Ao ona E Talitonu i le Tolutasi?” Mulimuli ane e mafai ona e faalaeiauina lē ona le fale e faitau le polosiua, i le faaalia ia te ia o le lisi o mea o loo iai i le itulau e 2. Afai e talafeagai, sue i se manatu patino i le polosiua.
7 I le onosai ma faimea maeʻa i le ufitiaina o la tatou oganuu i le tala lelei o le a iʻu ai ina faaolaina i latou o ē faalogo ia i tatou. (1 Timo. 4:16) Ua utiuti le taimi! O le mea lea, tau lava ina ia tatou faaalia le onosai ma avatu maeʻaeʻa le molimau a o faia so tatou sao atoatoa i le talaʻia o lenei feau o le faaolataga.