Tauaveina la Tatou Lava Amo o Avega Tauave
1 O le manatu e faatatau i avega tauave e foliga mai ua gāpatia ai tagata i aso nei. E toatele ua taumafai e alofia. O le iʻuga, ua lafoaia ai e tane avā, tuutiaʻi ai e tinā a latou fanau, mumusu ai talavou mai aʻoga, ma ua feʻalofaʻi ai tagātanuu i le totogia o lafoga. E faaauau pea e lē uma le lisi o gaoioiga ua lē taunapa e fai. O se tagata e taunapa, e maufaatuatuaina o ia, e lolo gofie ma e mafai ona ia tali atu mo lana amio. O le mea lea, ua taʻua manino ai i le Afioga a le Atua faapea o Kerisiano ia “taitoatasi ma [ave] i lana lava [avega].” (Kala. 6:5) Maeu la le talafeagai ona faapea o le matua o le fonotaga matagaluega mo le tausaga faaleauaunaga 1992 o le “Tauaveina la Tatou Lava Amo o Avega Tauave”! O le a amata lenei faasologa ia Setema. E ao ia i tatou uma lava ona faia ni fuafuaga maumaututū ina ia auai.
2 E ala i lauga, manatu faagee loto, faataʻitaʻiga, tala i mea tutupu, ma faatalanoaga, o le a faaauivi manino mai ai e le polokalama o lenei fonotaga matagaluega matagofie, avega tauave eseese ua ia i tatou uma lava o ni Kerisiano. I le afiafi o le Aso Toonai, o le a tolaulauina ai se lauga faasolo e fa ona vaega e faamatala ai pe mafai faapefea e i tatou uma lava ona tausia ma le olioli a tatou avega tauave. Ua iai foi i o tatou tagata talavou se avega tauave e faatinoina, ma o le lauga a le ovasia matagaluega i le afiafi o le Aso Toonai o le a faapitoa ona taulaʻi atu ia i latou. O le a iai foi i le Aso Toonai se avanoa mo ē fou ua tuuina atu ina ia papatisoina. O i latou uma ua fuafua e papatiso i le fonotaga matagaluega e ao ona muai faailoa atu i le ovasia taʻitaʻi a o lava le taimi ina ia mafai ai ona faia se sauniuniga mo lenei tulaga.
3 I le taeao o le Aso Sa o le a taulaʻi atu ai se isi lauga faasolo e fa ona vaega i la tatou avega tauave faa-Kerisiano ia talaʻi. Mulimuli ane, i le afiafi o le Aso Sa, o le a tauaaoina ai e le ovasia itumalo le lauga lautele ua faaulutalaina “Le Lalolagi Fou a le Atua—O Ai o le a Agavaa e Ulu atu i Ai?” Ia mataʻalia e valaaulia tagata naunau fou uma e faalogologo i lenei lauga.
4 O i tatou uma lava o le a mananao e faatulaga a tatou fuafuaga ina ia auai ma maua aogā atoatoa mai lenei polokalama matagofie e lua aso. O le a faailoa atu e la outou ovasia matagaluega le nofoaga ma aso ua fuafuaina mo la outou faapotopotoga.