Faatatauga o le Suesuega Tau Tusi a le Faapotopotoga
Vaega 3: Le Taulaʻiga mo le Faiva i le Fanua
1 E faaopoopo i le saunia o se nofoaga mo le suesuega tau tusi, e mafai foi ona avea le nofoaga o le Suesuega Tau Tusi a le Faapotopotoga ma nofoaga e feiloai ai mo le auaunaga i le fanua. E ao ona talafeagai taimi o na faatasiga mo le toatele o tagata talaʻi, ma e ao ona ofo atu ai i na feiloaiga ni fesoasoani aogā i le faamaopoopoina o tagata talaʻi mo le auaunaga i le fanua.
2 O vaega e faamaopoopoina lelei mo le suesuega ma le auaunaga e atiina aʻe ai faaleagaga. O ai na te leʻi maua se aogā i faalaeiauga po o faufautuaga i le auala e faafoe ai teteega, le auala e amata ai se talanoaga, le auala e ofo ai se suesuega faale-Tusi Paia, po o se mea e talanoaina i se toe asiga? Ua saunia e uso o tagata talaʻi ma paeonia i le nofoaga mo le suesuega tau tusi sea fesoasoani.—Kala. 6:9, 10.
3 Le Matafaioi a le Taʻitaʻi: O le taʻitaʻi o le Suesuega Tau Tusi a le Faapotopotoga e taʻimua ma e paʻū i ai le faamaopoopoina o le galuega a le vaega. E faifai pea ona galulue faatasi o ia ma tagata talaʻi i le fanua. (1 Pete. 5:2, 3) O faatasiga e lelei ona saunia mo le auaunaga e mafai ona avatu ai faatonuga faale-Tusi Paia ma e aogā e faaauupega ai le vaega mo le fanua. E masani a ona sili atu i suesuega tau tusi taitasi ona faia a latou lava faatasiga mo le auaunaga i le fanua i lo le potopoto faatasi o vaega uma i se nofoaga e tasi. Peitai, e mafai ona tuufaatasi ni vaega laiti se lua pe afai e tatau ai. A sosoo atu le auaunaga i le fanua i le Suesuega o Le Olomatamata, e ao la ona faapuupuu le faatasiga mo le auaunaga i le fanua. Mulimuli ane, o le a vaaia e taʻitaʻi taitasi o suesuega tau tusi lana lava vaega.
4 O faatatauga faifai pea mo le auaunaga i le fanua e faalaeiau ai le auai e lē aunoa i le faiva. Afai e faia le faatasiga mo le auaunaga i le taimi ma le nofoaga ua faatulagaina, o le a fuafua faatatau la i ai tagata talaʻi, ma faalaeiauina i le iloa faapea o le a iai se oganuu e avanoa ma isi e galulue faatasi. (Faatusatusa Luka 10:1.) E tusa foi pe lē auai atu le taʻitaʻi o le suesuega, ae na te saunia lava se oganuu ma faia faatatauga mo le vaega. (om itu. 44-45) Afai e lē maua se uso agavaa e taʻitaʻia le faatasiga mo le auaunaga, e mafai e le taʻitaʻi ona tofia se tuafafine e faia lenei mea. (om itu. 77-78; km 3/88 itu. 3) O le a alofia le fenuminumiai pe a feiloai e lē aunoa le vaega i lona taimi ma le nofoaga masani mo le auaunaga. E ao ona muai faasilasila so o se fetuunaiga lē tumau i lenei tulaga i se vaiaso pe afai e mafai.
5 Manaomia le Folagolagomai: E ao i tagata uma ona tauivi ina ia faia se sao uigā i vala eseese o le faiva i le fanua. E mafai ona tausolomua tagata talaʻi i le sauniuni faatasi i vaega faataʻitaʻi, e ala i le faaaogāina o teteega moni ma aiaiga e foliga mai e mapuna aʻe i le oganuu.—Faata. 27:17.
6 Pe e te manao e iai se tagata talaʻi agavaa e fesoasoani atu ia te oe ina ia tomai atili i le galuega o le faia o soʻo? Afai o lea, ia talanoa ma le taʻitaʻi o lau Suesuega Tau Tusi a le Faapotopotoga. Atonu e mafai ona ia fuafua mo se tagata talaʻi agavaa e fesoasoani atu ia te oe. Ina ia maua se aogā, ia faatatauina ma le tinoū faufautuaga na maua ma ia tausi i fuafuaga na faia.
7 O i latou na tofia e le taʻitaʻi o le suesuega tau tusi ina ia fesoasoani atu e ao ona mau fesoasoania ma fefulifulisaʻi i mea latou te faatalitalia. Ua faaalia i mea tutupu faapea e sili atu ona lelei i latou e iai se vaaiga mautinoa ma le paleni o le auaunaga i le fanua ma o ē ua iai manatu aogā, i le aʻoaʻoina o isi. (km 7/79 itu. 3-4; km 8/79 itu. 3-4) E ao ona avatu le faamālō e lē aunoa a o faia se agaʻigaʻi i luma. Mulimuli ane e mafai ona faataatia isi sini.—Faatusatusa Luka 19:17-19.
8 Tatou te manano e fesoasoani atu i le tasi ma le isi ina ia uigā i le talaʻiga o le tala lelei ma le faia o soʻo. Ua faamaonia e tulaga e sili ona leaga o le lalolagi le faanatinati o lenei galuega. O loo aafia ai ola, ma o loo faatelevaveina e Ieova le aoaoina. (Isaia 60:22) A o teuina i o tatou manatu le faiva ua tuuina mai ia i tatou, o le a tatou galulue vavalalata ai la ma la tatou Suesuega Tau Tusi a le Faapotopotoga e faataunuu atoatoa lo tatou tofiga a o apoapoaia ma faalaeiau le tasi i le isi.—Roma 12:6-8; 2 Timo. 4:1, 2, 5.