Felagolagomai ma Lo Tatou Faiaʻoga o Suesuega Tautusi a le Faapotopotoga
1 E tāua tele le vaega a le Suesuega Tautusi a le Faapotopotoga i le atiina aʻe o o tatou tomai i le avea o ni faifeau o le tala lelei. Ua fuafuaina ina ia faatulaga i ni vaega toalaiti suesuega tautusi a vaega, ina ia faalaeiauina ai se siomaga mafana pei se aiga, mo le suesueina o le Tusi Paia, ma se tasi o lomiga a le Sosaiete. Ua saunia foi i nei vaega toaitiiti ni faatulagaga aogā, e aʻoaʻoina ai i tatou ina ia sili atu ona uigā i le faiva i le fanua. Ua saunia lelei mo le mauaina e tagata taitoatasi faalaeiauga totino ma le uaʻi totoʻa atu, e ala i le faatulagaga o le suesuega tautusi. E mafai faapefea ona tatou felagolagomai atoatoa ma le faiaʻoga ma maua ai aogā mai lenei sauniuniga matagofie?
2 Se Sao Maelega i le Faiva i le Fanua: O le tasi o tiute tauave e sili ona tāua a le faiaʻoga o le suesuega tautusi, o le fesoasoani lea i sui uma o le vaega ina ia faia se sao maelega i le faiva. E tusa ai o lenei itu, ua faamanatu mai ai ia i tatou e la tatou tusi Our Ministry i le itulau e 44 faapea, “o lona auai e lē aunoa, o lona faaalia o le maelega ma lona aasa i le galuega i le fanua, o le a atagia mai i tagata talaʻi.” I nisi taimi o le a galulue faatasi ai le faiaʻoga i le auaunaga, ma sui o lona lava aiga, ae o le a fiafia foi o ia e ō faatasi ma isi i vala eseese o le faiva pe a talafeagai ma ana fuafuaga. Pe e mafai ona e lagolago e lē aunoa i faatasitasiga mo le faiva i le fanua? O lou faia faapea, o le a matuā talisapaia lava e le faiaʻoga o la outou suesuega tautusi ma isi tagata talaʻi.
3 Ua fuafuaina faatasitasiga mo le auaunaga i le fanua i nofoaga talafeagai, ina ia mafai ai e tagata uma ona faia se sao maelega i le galuega talaʻi. A o manatunatu i tulaga i la outou lava oganuu, o le a mananao ai vaega taitasi e vave amata i le faiva. E toatele tagata talaʻi ma paeonia ua taulau manuia ona o lo latou faaauau pea i le faiva e oo i le afiafi i le faaiʻuga o le vaiaso.
4 Pe e te manaomia ea se fesoasoani i nisi o vala o le faiva? Atonu e mafai e le faiaʻoga o la outou suesuega tautusi ona faatulaga se tagata talaʻi tomai i le vaega ina ia lua galulue faatasi. I le faaiʻuga o le masina, ia mautinoa ua vave ona avatu lau lipoti o le auaunaga i le fanua. O le a talisapaia foi e le faiaʻoga o suesuega tautusi ma le failautusi lou lagolagosua i lenei vala tāua.—Faatusatusa i le Luka 16:10.
5 Pe a Asiasia e le Ovasia o le Auaunaga le Vaega: E masani lava ona asiasia e le ovasia o le auaunaga se vaega e tasi o suesuega tautusi i masina taitasi, ina ia faalaeiau ai se gaoioiga e sili ona telē ma uigā i le faiva i le fanua. Ia uaʻi totoʻa atu i le lauga e 15 minute lea na te fofogaina atu i le faaiʻuga o le suesuega tautusi, auā o le a saunia ai i lena lauga se fautuaga patino, lea o le a fesoasoani e faaleleia ai le vaega i vala eseese o le galuega talaʻi. E naunau foi le ovasia o le auaunaga e galulue ma sui eseese o le suesuega tautusi i le faaiʻuga o le vaiaso. Ia mautinoa ua faaaogā lenei sauniuniga faapitoa, ina ia mafai ai ona e maua ni aogā mai lona poto masani ma lona tomai i le fanua.
6 O la tatou faaaʻoaʻoga totino o le felagolagomai ma lo tatou lotomalie e fesoasoani i ē faalēlava le poto masani, o le a fesoasoani e faatupuina ai se siomaga mafana ma faaleuō i le Suesuega Tautusi a le Faapotopotoga a o tatou ‘galulue mo le lelei o tagata uma lava, ae e faasili i ē aiga ma i tatou i le faatuatua.’—Kala. 6:10.