Auai ma le Loto Atoa i le Faiva i le Fanua
Vaega 4: Faamaopoopo e Faamaeʻaina ia Tatou Faiva ma le Uigā
1 O le auai ma le loto atoa i le faiva i le lautele e manaomia ai se faamaopoopoga lelei o le tagata lava ia. Ua faataatia e Iesu se faaaʻoaʻoga tulagaese mo la tatou galuega tau le auaunaga i aso nei. (Luka 10:1,2; Galu. 1:8) E mafai foi ona tatou aʻoaʻoina se mea i le auala sa faataunuu ai e ona soʻo o le uluai senituri la latou faiva. (Galu. 5:42; 2 Timo. 4:5) Ae e mafai faapefea ona sili atu lou faamaopoopo ma olioli ai i iʻuga lelei faapena i aso nei?
2 Faatulaga le Taimi mo le Auaunaga i le Fanua: O la tatou faiva e lē o se mea e tau ina fai po o se vala e tupu faafuaseʻi i lo tatou olaga. E le mafai ona tupu faafuaseʻi le aofaiga o le taimi tatou te tuutoina i le faataunuuina o la tatou faiva. Ina ia faamaopoopoina la tatou faiva ma le uigā, e tatau ona tatou faataatia ese se taimi mo ona vala eseese. (Efe. 5:15,16) Ua iloa e le toatele o tagata talaʻi le aogā o le faataatia o se sini pe fia itula o le a latou tuutoina i le faiva i masina taitasi. E masani ona manaomia ai e lenei mea ona faatulaga a latou meafai ina ia auai i le auaunaga i le fanua i vaiaso taitasi. E ao i mātua Kerisiano ona fesoasoani i a latou fanau e faatulaga le taimi ina ia auai pea i vala eseese o le auaunaga i le fanua.—Teu. 6:7; Faata. 22:6.
3 Faataatia Sini Aogā: O sini e moni, o le a aumaia ia te oe se mea e tepa taulaʻi atu i ai. A taunuu lou sini, o le a oo ia te oe le olioli i le faataulauina o se mea. (Faata. 13:12) Ua apoapoai mai le aposetolo o Paulo: “A o le mea ua tatou oo i ai, ia savavali [pea ma le maopoopo i lea lava faasologa].” (Fili. 3:16) E tusa ai ma vala uma lava o lou agaʻigaʻi i luma faaleagaga, e ao ona aumaia e lau galuega i le fanua ni faamaoniga o se faasologa maopoopo.
4 Mo se faaaʻoaʻoga, pe o telē ea sau sapalai o sāvali ma tamaʻi pepa o faasilasilaga? O e tausia ea se sapalai e lava ma totoe o mekasini fou o loo iai, ma pe o iai ea i se tulaga lelei? O e faaaogā tatau ea pepa e faamaumau ai lea fale ma lea fale, e ala i le faaaogāina o se pepa e tasi e faamau ai ē naunau ma le isi pepa mo i latou e lē o iai i aiga?
5 A o leʻi auai i le faiva, ia faaalu le taimi e autalu ai le Mataupu mo Talanoaga o loo iai. Faamaʻoti manatu e talanoa i ai mai le lomiga o loo ofo, ma sauniuni e faaaogā ia manatu ma le uigā e faagaee ai le naunau. Ia sauniuni foi, e faaaogā le tusi mo le auaunaga i le fanua o le Reasoning From the Scriptures. E mafai foi ona e sue vave i nisi o le anoanoai o ana faufautuaga, i le va o le isi fale ma le isi fale. O le faatatauina o ia manatu aogā o le a faaleleia ai le uigā o lau faiva.
6 O le faia o se sao atoatoa i ‘le galuega paia o le tala lelei’ i nei aso e gata ai o se faaeaga e faamanuiaina. (Roma 15:16) E ao ona tatou tauivi e faamaeʻa la tatou faiva e ala i le avatuina o le molimau sili tatou te mafaia, “o le fua lea o tatou laugutu.” (Epe. 13:15; faatusatusa Hosea 14:2.) Ina ia faia lenei mea, seʻi o tatou faatulagaina le taimi mo se sao faifai pea i le auaunaga i le fanua ma ia faatutūina ni sini talafeagai e mafai ai ona tatou faamaeʻaina la tatou faiva mo le viiga o Ieova.