Auai ma le Loto Atoa i le Faiva i le Fanua
Vaega 5: Aogā Faaʻoaina o le Auaunaga ma le Loto Atoa
1 Ua faaavanoa mai e Ieova i ana auauna loto atoa se sapalai e lē faatuaoia o aogā faaʻoaina. (Sala. 116:12) E mafai faapefea ona tatou olioli i se fua atoatoa o faamanuiaga mai ia Ieova i la tatou faiva? O ā aogā ua teuina mo i tatou? O le ā e tatau ona tatou faia e faamautinoa ai ia i tatou lava lana faamaoniga ma lona finagalo malie?
2 Manaomia se Taumafaiga Totino: E faalagolago le tele o loo e olioli ai i aogā ua foaiina mai e le Atua, i le tele o au taumafaiga totino ina ia faia le finagalo o le Atua. Na tusia e Paulo, e faatatau i le faiva: “E taitasi ma lona lava taui e maua, e tusa ma lana lava galuega.” (1 Kori. 3:8) O le mea lea, seʻi o tatou faia ai se sao atoatoa i le faiva i le mea tatou te mafaia. Sa maua e le aposetolo o Paulo le taui totino o le fesoasoani atu lea i le toatele o tagata, e oo lava i faapotopotoga uma, ina ia iloa le Atua. Maeu le olioli sa oo ia te ia i le matauina o loo latou tutū mausalī i le faatuatua! (1 Tesa. 2:19, 20) Atonu, o le a lē faatagaina oe e ou aiaiga ina ia auai atoatoa i le faiva e pei ona sa faia e Paulo. E ui i lea, pe lē o se faamanuiaga faaʻoaina ea le fesoasoani i se tagata po o se aiga foi o ē pei ni mamoe ina ia faavae mausalī i le ala i le ola? Maeu se faamalosiauga ina ia galulue mamafa i le faiva i lea fale ma lea fale ma sosoo atu ai le faia o toe asiga ma suesuega faale-Tusi Paia!
3 Isi Aogā: O se aogā tautele o le auauna ma le loto atoa e faapea, i le avea ma aumea faigaluega, o le a tosina vavalalata atu ai se tasi ia Ieova ma Iesu Keriso. (Mata. 11:29, 30; 1 Kori. 3:9) Maeu le olioli i le lagonaina o le fesoasoani mai o le agaga o le Atua ia te oe i le faiva! (Mata. 10:20; Ioane 14:26) E lē gata i lena, o le galulue maelega soosoo tauʻau ma isi i le faapotopotoga e faamalosia ai le fusi o le alofa ma le autasi.
4 E lē mafai ona tatou olioli atoatoa i aogā mai ia Ieova seʻi vaganā ua tatou lagolagoina atoatoa le faalapotopotoga o loo ia faaaogā e faataunuuina ai lona finagalo i nei aso e gata ai. (Faatusatusa 2 Tupu 10:15.) A tatou mulimuli totoʻa ma le loto atoa i le taʻitaʻiga ua tatou mauaina mai i le auala a le Atua ma toʻaaga e auai i galuega a le faapotopotoga, o le a puipuia faaleagaga ai i tatou mai togafiti taufaaʻoleʻole a Satani. E mafai ai ona tatou faia se sao e sili ona fuatele mai i le faiva.
5 O lenei faasologa o mataupu e lima ona vaega e uiga i le auai ma le loto atoa i le faiva i le fanua, ua faamatilatila ai le tele o mea moni o loo aofia ai. Pe o e manatua o ā ki i le atiina aʻe o le talisapaia mo Ieova, ia e uunaia ai se tagata ina ia auai ma le loto atoa? (Iulai) Aiseā e matuā manaomia ai sauniuniga mo le atiina aʻe o le maelega i le faiva i le fanua? O le ā le auala tatou te sauniuni ai? (Aokuso) E mafai faapefea e tagata talaʻi agavaa ona fesoasoani i isi ina ia auai ma le loto atoa? (Setema) E mafai faapefea i le faamaopoopoga lelei o le tagata lava ia ona fesoasoani ia i tatou ina ia auai ma le loto atoa i le faiva? (Oketopa) O e faatatauina ea ia faufautuaga?
6 Ua finagalo Ieova ina ia maua e i tatou lava aogā e ala i le usiusitai atu ia te ia. (Isaia 48:17) E lē gata i lena, o aogā o le auaunaga ma le loto atoa ua faasalafa atu ia i latou o ē faalogologo ia te oe. (1 Timo. 4:15,16) E mafai ona e mautinoa faapea a o e faaaogāina ma le tinoū oe lava i le galuega o loo faia, o le a silasila mai i ai Ieova ma ‘o le a e maua ai le taui, o le tofi lea,’ o le ola e faavavau.—Kolo. 3:23, 24.