Taulimaina ma le Tomai le Afioga o le Upu Moni
1 O lo tatou tomai i le faaaogāina o le Afioga a le Atua e mafai ona aafia ai le auala e tali mai ai tagata i le tala lelei. O lea, na faamalosia ai e Paulo le atiina aʻe o le tomai i le faiva, e faapea: “Ia e faia le mea aupito sili ina ia faamaonia ai oe e le Atua, o se tagata faigaluega e leai se mea e mā ai, na te taulimaina tonu le afioga o le upu moni.”—2 Timo. 2:15, NW.
2 E tatau ona atiina aʻe le tomai i le faaaogāina o le Tusi Paia. O le faataatia ese o se taimi mo le suesuega totino ma le auai i sauniga Kerisiano e matuā manaomia. Peitai, e tatau ona tatou faatinoina mea ua tatou aʻoaʻoina e ala i le faaaogāina e lē aunoa o le Tusi Paia i le faiva. O lenei mea e manaomia ai se taumafaiga faaauau pea, a o tatou sailia le fesoasoani ma le taʻitaʻiga a le Atua.—1 Ioane 3:22
3 Taulaʻi i le Afioga a le Atua: O se mea e tāua mo tagata ona iloa, o la tatou feau e lē tupuga mai ia i tatou lava ae mai le Afioga tusitusia a le Atua. (Ioane 7:18) O le faaalia i se tagata o le mea ua fetalai ai le Atua e uiga i se mataupu o i le Tusi Paia, e mafai ona telē sona aogā. Ua tosina mai tagata e tonu o latou loto i le feau malosi o le Tusi Paia. A o sili atu lo tatou faaaogāina o le Tusi Paia, o le a tatou tomai atili ai ma o le a mafai ai ona matuā folasia i isi le Afioga a le Atua, lea o le a aogā ia i latou.
4 O le toatele o tagata e lē masani ma le Tusi Paia. E tatau ai ona tatou faia e sili atu na i lo le tau ina faitau o le mau, pe a faaogāina. Ina ia mautinoa le auala e faailoa atu ai se mau, e manaomia se sauniuniga maeʻaeʻa. E mafai ona faaaogā ni fesili pe taʻua se faafitauli ina ia faagaee ai le naunau. E tatau foi, ona manatu i mea tatou te taʻua pe a maeʻa ona faitau le mau. Atonu e lē mafai ona puʻe e le tagata le manatu i le tau o le faatasi ona faitauina. O le toe taʻu faamamafaina o upu autū ma le faia o se faatatauga o le a goto ifo ai le manatu.—Vaai School Guidebook, suesuega 24 ma le 25.
5 Le Ofo: Pe a tatou maua ia Novema tagata o ē naunau faamaoni, o le a tatou ofoina ia i latou le polosiua “Faauta! Ou te Faia ia Fou Mea Uma Lava.” E mafai faapefea ona tatou faailoa atu i tagata lenei ofo? A maeʻa ona faailoa atu i tatou, e mafai ona tatou faapea atu: “I aso nei, e toatele ua vaavaai atu i tagata po o lomiga eseese mo se taʻitaʻiga. O le ā sou manatu o le ā le puna e sili ona lelei o taʻitaʻiga aogā? [Faataga mo se tali.] Manatu i le mea ua fai mai ai le Tusi Paia e uiga i le puna moni o le poto. [Faitau Faataoto 2:6, 7.] Ua faamaonia ma le faanoanoa le lē lava o le poto faaletagata, lea ua taʻitaʻia ai i le lē mautonu ma le loto atuatuvale. E ui i lea, o le poto o le Atua, ua faamaonia pea le maufaatuatuaina ma le aogā. [Faitau Isaia 48:17, 18.]O le mea lea, e ao ai ona tatou vaavaai atu i le Atua, o lē ua saunia le taʻitaʻiga manaomia e faafetaiaia ai faafitauli o loo tatou fesagaʻi.” Ona tatou sue lea i le itulau e 27 o le polosiua ma tataʻi atu i ai manatu i palakalafa e 52-53, ma faafesootai i ai.
6 Na faaaogā pea lava pea e Iesu le Tusi Paia e fesoasoani ai i tagata loto faamaoni ma taʻuseseina ai ē e tetee ia te ia. Sa avea ma masani a Paulo le ‘faamatalaina ma faamaonia i faamaumauga’ mea sa ia aʻoaʻoina atu. (Galuega 17:2, 3) O le a faateleina lo tatou mautinoa ma le olioli i le faiva a o tatou taumafai ma le naunautai ina ia matuā silisili atu ona tomai i le taulimaina o le Afioga o le upu moni.