Faatatauga o le Suesuega Tau Tusi a le Faapotopotoga
Vaega 4: Faaauau ona Atiina Aʻe le Tasi ma le Isi
1 E mafai e tagata taitoatasi i se Suesuega Tau Tusi a le Faapotopotoga ona faatinoina se vaega uigā i le tuputupu aʻe faaleagaga o isi i le vaega. Tatou te mananao uma lava e usiusitai i le poloaiga faale-Tusi Paia ia ‘manatunatu le tasi i le tasi i le alofa ma galuega lelei, ae maise lava ona ua lalata mai le iʻuga.’—Epe. 10:24, 25.
2 Fesoasoani le Tasi i le Isi: E mafai e tagata uma ona fesoasoani e faatupuina se siomaga mafana, ma faaleuo i le suesuega tau tusi. A faaalia e i tatou taitoatasi se naunau totino i isi sui, o le a saosaolaumea lea i le vavalalata o le vaega. Ua faatonuina i tatou i le Kalatia 6:10 “ia tatou agalelei, . . . i tagata uma lava, a e faasili i le aiga o le faatuatua.” Mo se faaaʻoaʻoga, pe e te matauina pe a mamaʻi ma lē auai i sauniga nisi mai le suesega tau tusi? Atonu e mafai ona e faafesootaia i latou i le telefoni pe asiasi totino ia i latou. E mafai i se agaga faapena i le vaega o le suesuega tau tusi ona tosina faatasi ai uso ia vavalalata.
3 Pe o manaomia ea e nisi se faalaeiauga ona o omiga i aso taitasi, avega tauave i le aiga, po o isi faafitauli? O le ā e mafai ona e faia e fesoasoani ai? Ia faia se taumafaiga faapitoa e faaauai isi i talanoaga i sauniga, ae lē na o le faafeiloaia o i latou. O nisi atonu e matamuli ae o loo vaavaai mo se tasi e talanoa i ai ma o le a tali mai pe afai e talanoa atu i ai. (uw itu. 137-138 Sa faalaeiau e le aposetolo o Paulo Kerisiano ia “faamafanafana i e loto iti, ia fesoasoani i e o vaivai, ia outou onosai i tagata uma lava.” (1 Tesa. 5:14) Afai e mafatia pe loto vaivai se tasi, maeu se faamafanafanaina pe afai e asiasi atu i ai ni uo pe ofo atu i ai se fesoasoani! E masani a, ona pau le mea o loo manaomia, o le tau ina iloa o loo manatu atu se tasi.
4 Tatou te mananao foi e felagolagomai ma faatatauga o le auaunaga i le fanua. E ao ona tatou taumafai e galulue ma tagata eseese o le vaega. (2 Kori. 6:11-13; 12:15) I nisi taimi atonu e talosagaina ai i tatou e le taʻitaʻi o le suesuega tau tusi e fesoasoani atu i se tasi. E faapefea ona e tali atu? E matuā faamalosia lava le vaega o le suesuega tau tusi pe a galulue faatasi tagata talaʻi ma paeonia i vala eseese o le galuega talaʻi ma le faia o soʻo.
5 Faaaʻoaʻoga Totino: O loo iai isi auala e mafai ai ona e saosaolaumea i le faatatauga o le suesuega tau tusi. E tāua lau faaaʻoaʻoga lelei. Mo se faataʻitaʻiga, e te faaalia le faaaloalo, pe a e laei e pei o loo e auai i se sauniga i le Maota o le Malo. Ua e faataatia ai se faaaʻoaʻoga mautinoa mo i latou o ē atonu ua atiina aʻe le masani o le faalēano i teuga. Pe o fai ma au masani le taunuu tonu i le taimi ina ia aua ai le faalavelave i le suesuega?
6 O le faatatauga o le Suesuega Tau Tusi a le Faapotopotoga o se sauniuniga alofa lea mai ia Ieova ua faapea ona manaomia ai la tatou lagolagosua atoatoa. (Isaia 40:11) O le nofoaga lea e mafai ai ona tatou maua le fesoasoani totino ma saosaolaumea ai i le faafouina faaleagaga o isi. O lea, seʻi “feapoapoai ai, ma ia fefaamafanafanai” i tatou uma lava e ala i le lagolagoina atoatoa o lenei faatatauga.—1 Tesa. 5:11.