Taulimaina o le Tala Lelei—Ofoina o Suesuega Faale-Tusi Paia i Aiga
1 Na faamanatu mai ia i tatou e le sulu o La Tatou Faiva o le Malo o Aokuso 1991 e uiga i la tatou avega tauave ia totō ma faasūsū i le galuega o le faia o soʻo o Keriso. Sa faaalia ai ia i tatou, e ao ona uunaia i tatou e faafoeina suesuega faale-Tusi Paia ona o lo tatou alolofa mo tagata o ē talilelei mai i le feau o le Malo. O le ofoina o suesuega faale-Tusi Paia i aiga o le a fesoasoani lea ia i tatou e faataunuuina la tatou tofiga o le faia o soʻo.—Mata. 28:19,20.
2 O se mea lelei le iloaina faapea o le toatele o i tatou ua amata ona faatinoina le faalaeiauga na aumaia. Ua faaalia i lipoti le faateleina atili o suesuega faale-Tusi Paia ua faafoeina. O le aofaiga o suesuega faale-Tusi Paia na lipotia mai i Amerika Samoa ma Samoa i Sisifo, e tusa ma le 14 pasene le faatelega i le 1991 ua sili atu ai i le tausaga faaleauaunaga o le 1990. O le mea mautinoa o i latou faatōʻa amata ona faafoeina ni suesuega mo le uluai taimi o loo olioli i le sao ua latou faia i le galuega o le faia o soʻo. Peitai e mafai faapefea ona toatele nisi e auai i lenei vala tauia o la tatou faiva?
3 Faaaogā le Ofo mo le Masina: O Novema o se masina e talafeagai faapitoa lava e saili ai ina ia amata ni suesuega fou faale-Tusi Paia. O le a tatou ofoina ai le polosiua “Faata! Ou te Faia ia Fou Mea Uma Lava.” O se auala lelei e atiina aʻe ai le naunau o lē ona le fale o le faaaogāina lea o faufautuaga o loo maua i le tusi Reasoning.
4 E mafai ona tatou ofoina atu le polosiua e ala i le faaaogāina o faatomuaga i itulau e 10-15 o le tusi Reasoning. E toetoe lava o faatomuaga uma o loo iai e mafai ona faafesootai ma le ofo o le polosiua “Faauta!” O le faalaeiauina o tagata e faitau i le polosiua “Faauta!” atonu e tatalaina ai le ala mo se suesuega faale-Tusi Paia.
5 I lalo o le tamai ulutala “Suesuega Faale-Tusi Paia i Aiga” i le itulau e 12 o le tusi Reasoning, o loo iai ni faufautuaga o le a aogā i le taʻitaʻia o manatu i le polosiua “Faauta!” Ia faalaeiau uma le faaaogāina o le polosiua i se auala faifai pea. Afai e te faaaogāina se faafeiloaiga tuusaʻo e amata ai se suesuega faale-Tusi Paia, e mafai ona e mulimuli i faufautuaga lelei o loo maua i La Tatou Faiva o le Malo o Setema 1991.
6 Faalagolago ia Ieova: Ina ia taulau i le galuega o le faia o suesuega faale-Tusi Paia, e tatau ona tatou manatua, o le taulau i le ofoina atu o suesuega faale-Tusi Paia, e na o le fesoasoani lava a Ieova e maua ai. Ua ia faatinoina le vaega autū i a tatou taumafaiga ina ia fesoasoani ai i tagata. (1 Kori. 3:6) O le mea lea, e ao ai ona tatou tatalo e lē gata e uiga i le sailia o se tasi tatou te suesue ae e uiga foi i le agaʻigaʻi i luma ua faia e tagata naunau tatou te maua. (Ioane 16:23) E tatau ona tatou manatua o i tatou o se “au faigaluega . . . faatasi ma le Atua.”—1 Kori. 3:9.