Auai i le Faatelega o le Malo

¹ E pei ona sa iai i le uluai senituri, ua faapea foi ona faataunuuina upu a le perofeta o Isaia i aso nei: “O le nuu sa savavali i le pouliuli, ua latou iloa le malamalama tele; . . . Ua e faatoateleina le nuu, ua e faateleina lo latou fiafia, latou te fiafia i ou luma, e pei ona fiafia i le seleselegāsaito.” Ioe, o loo agaʻi i luma le faatelega o le Malo! Ua pule Iesu Keriso! Ma e pei ona faaauau mai le valoaga: “E leai se mea e gata mai ai ona tele o lona malo ma le filemu o lona malo”—Isaia 9:2, 3, 7.

² O loo agaʻigaʻi i luma le galuega o faugafale i le tele o lala, e faapea foi i Patterson ma Purukulini i le Iunaite Setete. I Patterson, ua maeʻa ona fausia fale uma e fitu o le Patterson Inn—o se faletalimalo e 150 potu, ua faatuina e lē mamao teisi mai le ofisa autū o aʻoaʻoga. O le ofisa autū o aʻoaʻoga o le a faia aʻe i fale e 17. I le taimi nei, e lua fale o le fausaga tuufaatasi ua maeaʻa, e fa o loo fausia pea, ae lima isi o le a amata i le 1992. O le a fausia fale faaiʻu e ono, i se taimi mulimuli. Ma i Purukulini, e tele galuega ua maeʻa ona faia i le faatuina aʻe o le nofoaga e nonofo ai e 30 fogafale. Ua maeʻa uma ona tala i lalo le fale tuai sa i le fanua, maeʻa ona sua ma faataatia galuega o le faavae. Na amata ia Iulai ona faatuina le tino o le fale. Ia Setema na amata ai le galuega o le faataatitiaina o piliki. O loo faamoemoe e oo atu i le tau faaiʻuiʻuga o le 1991, ua maeʻa uluai fogafale e 12, e aofia ai le ofisa i luma, le potu ai, ma le umukuka, mo le faaaogāina.

³ Fale Fou mo le Lala i Samoa i Sisifo: Matou te fiafia ona ua mafai ona saunia se vaaiga a le tusiata o le lala fou i lenei sulu. O loo lelei le faagasologa o le galuega ma matou te faamoemoe o le a avatu e lenei lipoti ia te oe se faamatalaga lata mai o mea o loo tutupu i Siusega. Na faatoʻā amata lava le galuega i le fanua ia Iulai ina ua aveesea e le masini sua palapala le tele o maa ma amata ai ona faalaugatasi le fanua. Ia Aokuso, na faatū ai le ofisa i le fanua ma se tasi o fale lē tumau na faatūina. O loo avea nei lea fale o se nofoaga lē tumau mo uso e toavalu o le au faufale, a o faatalitali mo le faamaeʻaina o le fale taavale lea o le a avea ma uluai fausaga tumau. O le a faaaogā lea o se nofoaga e nonofo ai le aufaigaluega e toʻa tolusefulu seia maeʻa le galuega.

⁴ Na fausia se fale telē e tuu ai mea ma o loo iai nei le tele o mea na auina mai i lala e pei o Ausetalia ma Niu Sila. O loo iai foi i lenei fale se vaega ua faataatia ese e fai ma potu uelo ma se isi mo le teuina ai o mea faigaluega. Ua lelei nei la ona saunia uso mo le galuega o le fusaga o le a faia i masina o loo sau. E tele galuega sa faamaeʻaina ia Setema. Sa eliina ma faatumu i simā le faavae mo le fale taavale, ua uma ona faia le fola ma ua amata le galuega o le faataatitiaina o poloka. Pe tusa o le ogatotonu o Tesema o le a maeʻa ai lenei fale ina ia nonofo ai uso ma tuafāfine o loo galulue i le fausaga.

⁵ Ua eliina se lua tele e alu i ai le vai o le fale atoa, o se galuega sa manaomia ai le onosai ma se taumafaiga tele a uso atoa ma masini eseese ona o le tele o maa lapopoa sa tau i ai a o eliina. I le faaiʻuga o Oketopa, na aumaia ai i le fanua se masini vili vai ma amata ai ona viliina se lua mo se vai. Ua faia lenei mea ina ia saunia ai vai mālū mo le fale atoa o le lala, ma aveesea ai le manaoga mo le faalagolago i se sapalai o vai e sua ma pē. O loo solosolo lelei foi le fausiaina ma le faatutūina o pou ma puipui mo le pa simā. O lea, ia Tesema pe a iloiloina lenei sulu i faapotopotoga, ua tatau ona faamaeʻaina le fale taavale ma faaaogā e nonofo ai; o le a saunia e le vaieli le tele o vai mālū; o le a faasolosolo pea le fausiaina ma le faatūina o le pa, ma o le a amata ai loa le galuega i le faavae o le faletele o le lala.

⁶ Ae ā masina o loo sau? O le a faaauau pea ona matou gaosia o pou ma puipui mo le pa ma faatutūina faataamilo atoa i le 7.5 eka o le fanua o le lala. A o leʻi oo ina amata tetele le vaitau o timuga, o loo matou faamoemoe e faamaeʻa ona faatulaga le fola simā o le faletele, atoa ma auala simā uma e ui atu ai taavale. Ona faaauau ai lea ona teuteuina o le laufanua. Ona o le fausaga o le tino o le faletele e faia aʻe i uamea ma laupapa puipui ua gaosia i simā, e ao la ona vave lona faatūina. O le mea moni, a maeʻa le tino i fafo o le fale, o le a iai pea le tele o galuega faaiʻu e tatau ona faia. Talu ai ona e toetoe lava o mea uma o loo faaaogā ua auina mai fafo, e tele se faamaopoopoga e manaomia ina ia mautinoa ai ua otaina mea uma, auina mai ma sauni e faapipiiina i le taimi tonu. Tatou te vaavaai atu ia Ieova e faaauau pea ona faamanuia i taumafaiga a ē uma ua aafia ai i lenei tofiga ofoofogia.

⁷ E toʻa 49 uso ma tuafāfine o loo galulue i le aiga Peteli ma le Au Faufale. O le toʻa luasefulutasi o i latou ia, o uso ma tuafāfine o loo Galulue i le polokalama o le International Volunteer Construction Worker o ē ua ō mai i Ausetalia, Kanata, Niu Sila, ma le Iunaite Setete. O le isi toʻa 16 o ni tagata faufale tauofo mai Samoa i Sisifo ma Amerika Samoa, ae e toʻa 12 o loo i le aiga Peteli. I nisi masina o loo sosoo ai o le a faaauau pea ona faatoateleina lo matou aiga ona e toatele tagata tauofo e ō mai i Hawaii, Ausetalia, Niu Sila ma isi atunuu e fesoasoani mo se vaitaimi puupuu e mai le lua vaiaso i le lua masina. E moni, o se mea e olioli ai ma faalaeiau ai, le iai o le toatele nauā o ē galulue i le fanua o le lala. E mafai ona e tepa taulai atu i sulu o La Tatou Faiva o le Malo i le lumanai, ia o le a e iloa ai faamatalaga lata mai i le agaʻigaʻi i luma o le galuega o le fausaga.

⁸ O le ā e Mafai ona E Faia?: Ua maeʻa ona faia e uso ma tuafāfine le tele o mea. Mo se faaaʻoaʻoga, i masina e fa faatoʻā mavae atu e silia ma le 500 tagata tauofo mai Samoa i Sisifo ma Amerika Samoa ua ō mai e fesoasoani i le galuega i Aso Faraile ma Aso Toonai. E matuā talisapaia lava na galuega o le alofa, ma e fia faafetai atu ai le Sosaiete i tagata uma mo le lagolagosua matagofie.—Epe. 13:16.

⁹ E tusa foi pe lē mafai ona e sau ma galue i le galuega, e tele pea mea e mafai ona e faia. O se tasi o auala matuā tāua e fesoasoani ai, e ala i foai tauofo e fesoasoani ai i tupe faaalu. O ni faaaʻoaʻoga faale-Tusi Paia o lenei mea, o le fausiaina o le fale fetafai i ona po o Mose ma le malumalu na fauina e ala i le taʻitaʻiga a Solomona. Sa uunaia e Ieova loto o tagata ina ia saunia mea uma sa manaomia. (Eso. 35:4-6, 21, 22; 36:3-6; 1 No. 29:3-9) I o tatou aso, ua fai meaalofa atu ai tagata taitoatasi, o faapotopotoga, ma matagaluega mo ia galuega o le fausiaina, ia o le a lē masalomia le iai o se vaega tāua i le faatelega o le folafolaina o le Malo i le lalolagi aoao. Pe mafai ona e auai i le lagolagoina o lenei galuega ofoofogia o le faatelega? Afai e te mafaia, faamolemole ia auina mai na meaalofa i le ofisa o le lala.

¹⁰ E tusa pe mafai ona e tauofo e galue i le galuega faufale i le fanua po o le foai e ala i tupe, pe leai foi, tatou te mafai uma lava ona tatalo mo le manuia o nei galuega o le fausiaina o fale ina ia mafai ai ona faalauteleina faanaunauga o le Malo o le Atua i le lalolagi aoao. Talosia ia faatamaoaigaina e lo tatou Tamā faalelagi i tatou uma lava a o tatou taumafai e faamaeʻa lenei galuega.