Ia Iloa e Tagata Uma ua Latalata le Saogalemu i le Lalolagi Aoao
1 Ua toeitiiti, ona faavaeina lea e le “Alii o le filemu” le filemu moni ma le saogalemu i le lalolagi aoao. O lo tatou faatuatua i lenei folafolaga a le Tusi Paia e ao ona uunaia ai i tatou e fetufaai ai ma isi. (Isaia 9:6, 7; Mika 4:3, 4) I masina o Ianuari ma Fepuari, o le a tatou ofoina ai le tusi Le Manuia Moni ma Le Saogalemu—Mai le a Le Puna? Afai e tautala lē ona le fale i le faa-Peretania, e mafai ona tatou ofoina i ai so o se tusi faa-Peretania e 192 itulau na lomia i le 1983 pe i tua atu, po o le tusi Worldwide Security Under the “Prince of Peace.”
2 I le itulau e 4 o lenei lomiga o La Tatou Faiva o le Malo, ua matou faailoa atu ai le tele o faatomuaga atonu e te manao e faaaogā i le faiva ia Ianuari. E tolu faafesootaiga atonu e aogā i le tataʻia o manatu o tagata o aiga i le tusi Manuia Moni ma Le Saogalemu po o le tusi Worldwide Security ua fautuaina i palakalafa o loo mulimuli mai.
3 Faafesootaiga Nu. 1: A maeʻa lau faatomuaga, ia sue i le itulau e 13 o le tusi Worldwide Security ma faapea atu: “Ua siiina mai le Isaia 9:6, 7, i upu taitasi mai le Tusi Paia i lenei uluai palakalafa. Seʻi oʻu faitau atu ia te oe.” Ona e fesili lea: “O ai le ‘Alii o le Filemu’?” Faataga mo se tali, ona faaauau lea: “Ua faailoa mai ma le manino e lenei tusi le ‘Alii o le Filemu’ ma ua faamatala ai le auala o le a ia aumaia ai le filemu aoao i le lalolagi i o tatou aso. Faamata e te naunau e faitau i ai, ma pe e te fia aʻoaʻoina atili e uiga i le lalolagi fou ua folafolaina mai?” Atonu e te filifilia pe ao ona tuu le tusi i le tagata, e faalagolago i le tali mai.
4 Faafesootaiga Nu. 2: A maeʻa le faitauina o le Isaia 9:6, 7, ona sue lea i le itulau e 4 o le tusi Manuia Moni ma Le Saogalemu (po o le itulau e 4 o le tusi Worldwide Security) ma fesili i lē ona le fale: “O ā tulaga filemu o loo e vaaia i lenei ata?” Faataga mo se tali, ona faaauau lea e faapea: “O loo iai le filemu i le va o tagata ma le filemu ma meaola. Atonu e manatu nisi faapea o le a aumaia e pulega faaletagata sea filemu. Peitai, o le filemu moni ma le saogalemu e pei ona valoia i le Tusi Paia e tatau ona mai le Atua, ae lē mai tagata. E te lē ioe ea i ai?” Faataga mo se tali, ona faitau lea o ni manatu i le palakalafa e 10 i le itulau e 7 o le tusi Manuia Moni ma Le Saogalemu (afai o loo e faatomuaina le tusi Worldwide Security, faitau le palakalafa e 4 i le itulau e 5) ma faamatala faapea ua taliina e lenei tusi fesili e tele e uiga i le auala o le a aumaia ai e le Atua le filemu i le lalolagi. Afai e naunau moni lē ona le fale i le feau o le Malo ma manao e faitau le tusi, ona ofo atu lea ia te ia.
5 Faafesootaiga Nu. 3: I nofoaga o loo iai tagata e mafuli e faasoesa, ma e lē faatagaina oe e faaiʻuina lau taulimaga, atonu e te faaaogāina le faafeiloaiga lenei faatasi ma le tusi Worldwide Security: “E mafai ona ou fesili atu ia te oe i se fesili?” Afai e ioe i ai lē ona le fale, ia faaauau: “Na fetalai Iesu i le Mataio 28:19, 20 faapea o i latou e mulimuli atu ia te ia, o le a faia ni soʻo mai atunuu uma. O le fesili la: Pe e tatau ona faaliliuina le lalolagi atoa a o leʻi pule o ia o le ‘Alii o le Filemu’? O le ā sou manatu?” Faataga mo se tali, ona faapea atu lea: “O le tali a le Tusi Paia i lena fesili o loo maua i inei i le itulau e 21.” Ona faitau lea o le palakalafa e 2 i le itulau e 21, ma faasino atu i le auala ua taliina ai lena fesili e mau o loo iai i lenei tusi, atoa ma le tele o isi fesili e uiga i le saogalemu i le lalolagi aoao ma le ‘Alii o le Filemu.’
6 E mafai ona e filifilia se faatomuaga e te fiafia i ai mai le itulau e 4 o La Tatou Faiva o le Malo. Atonu e te mauaina se faafesootaiga patino e tasi o le a e fiafia e faaaogā, pe a uma ona autaluina faafesootaiga o iai i lenei mataupu. Faaalu se taimi e faataʻitaʻi ai lau faatomuaga ma le faafesootaiga a o leʻi alu atu i le auaunaga i le fanua. O lau sauniuniga ma lou talitonuga totino faapea o le a oo mai le filemu moni ma le saogalemu e ala i le ‘Alii o le Filemu’ ma lona Malo, o le a faaopoopo atu lea i lou faatauanau ma le maelega i le ofoina o le tusi Manuia Moni ma Le Saogalemu po o le tusi Worldwide Security.