Ia Talaʻi ma le Poto
1 Ina ia maua le poto, e manaomia ona tatou malamalama i se mea e uiga i tagata ia o loo tatou talaʻi atu i ai. Aisea? Auā o lo tatou taulau i le pāʻia o loto o tagata, e faalagolago i lo tatou tomai e taulimaina le feau o le Malo i se auala e fetaui lelei ma o latou manaoga. I le masina o Ianuari, o le a tatou ofoina ai le tusi, Laʻu Tusi o Tala o Le Tusi Paia faatasi ma le tamai tusi “Lenei Tala Lelei o le Malo.” O fautuaga nei atonu e aogā.
2 Afai ua e filifili e ofo le tusi “Laʻu Tusi o Tala o Le Tusi Paia,” e mafai ona e faasino atu i le ata i le Tala e 71 ma faapea atu:
◼ “O le ata lenei, o se ata na tusia e le tusiata e faatatau i le mea o aʻoaʻo e le Tusi Paia e uiga i le fuafuaga a le Atua mo le lalolagi. O le ā lou manatu i se mea e manaomia ona faia e oe ma lou aiga ina ia mafai ai ona ola i le lalolagi parataiso? [Faatali mo se tali.] Ua faailoa mai e le Tusi Paia e faapea, ua toeitiiti ona faatinoina moni lea o le filemu ma le saogalemu i le lalolagi aoao, ma o le a toe faafoisia ai lena Parataiso. [Faitau le Salamo 37:10, 11.] E mafai e lenei tusi ona faailoa atu ia te oe le mea e manaomia ona e faia ina ia maua ai aogā mai le mea o le a faia e le Atua. Ou te fiafia e tuu le kopi lenei mo oe.” Afai e tali lelei mai, ona e faamatala puupuu lea i ai o le fuafuaga o meaalofa tauofo.
3 Afai e te faaaogaina le tamai tusi “Lenei Tala Lelei o le Malo,” e mafai ona e fai atu faapea:
◼ “Pe e te ioe ua fesagai le tagata i aso nei ma luʻi sa lei iloaina muamua e tupulaga ua mavae? [Faatali mo se tali.] O le ā sou manatu, aisea ua tupu ai lenei mea? [Faamālō mo le tali. Suʻe ma faitau le 2 Timoteo 3:1-3.] O fasi fuaiupu ia o le ‘lē faalogo i mātua’ ma ‘ē lē loto aiga,’ ua faamatalaina ai ma le saʻo uiga o le toatele i o tatou aso. Ae peitai, o le Atua lava lea na ia valoia mai nei faafitauli, ua ia tuuina mai foi ia i tatou taʻiala aogā e tusa ai ma mea o le a tutupu i le lumanai.” Faitau le palakalafa e 39 i le itulau e 23. Ofo le tamai tusi e aunoa ma se totogi, ma taʻu i ai le fuafuaga o meaalofa tauofo.
4 O se isi taulimaga e mafai ona faaaogā i le ofoina o le tusi “Laʻu Tusi o Tala o Le Tusi Paia,” e amata i le fesili lenei:
◼ “E toatele tagata i aso nei e talitonu e lē o manatu moni mai le Atua ia i tatou o tagata i le lalolagi ma o le a ia lē faia lava se mea i faafitauli ia o loo iai iinei. Po o lou lagona ea lena? [Faatali mo se tali.] Seʻi ou faitauina atu ia te oe le mea o fai mai ai lenei fesoasoani faale-Tusi Paia e uiga i le fuafuaga a le Atua mo tagata ma le lalolagi. [Faitau le palakalafa e 2 o le Tala e 115, o loo faasino i le Faaaliga 21:3, 4.] Ou te faamautinoa atu ia te oe e iai se mafuaaga aogā ua faapalepale ai le Atua i faafitauli ia o loo iai i le lalolagi. Afai e te fia iloa po o le ā lea mafuaaga, e lelei pe a e faitau i lenei tusi.” Afai e fai mai lē ona le fale o le a ia faitauina le tusi, ona tuu lea ma faailoa i ai le fuafuaga mo meaalofa tauofo.
5 Afai e te manao i se taulimaga puupuu e faaaogā ai le tamai tusi “Lenei Tala Lelei o le Malo,” e mafai ona e suʻe le tusi i le itulau e 16 ma fesili atu:
◼ “O le ā le mea o le a tupu i lo tatou lalolagi? E toatele o loo taumānatu e uiga i lenei mea. Pe e te manatu o le a mafai ona avea moni ma parataiso?” Faafetai i le tali a lē ona le fale, ma faitau faamatalaga amata i le palakalafa e 26, e faasino i le Salamo 37:11, 29 ma le Mataio 6:9, 10. Ofo atu i ai e mafai ona tuu le tamai tusi ma faamatala i ai le fuafuaga mo meaalofa tauofo.
6 O le malamalama lelei, o le a mafai ai ona tatou iloa manaoga ma faanaunauga o tagata tatou te feiloai atu i ai. Ua faamautinoaina i tatou e le Faataoto 16:23 e uiga i lenei mea i le faapea mai: “O le loto o le ua poto, e poto ai lona gutu; e faaopoopoina ai foi le poto i ona laugutu.”