Manaomia ona Saili le Fanau a Tagata i le Atua
1 I lenei 20 senituri, ua matuā toatele lava tagata ua ausulusulu solo ona o taua, mafatiaga, ma omiga tau tamaoaiga. Ma ona o femalagaiga ma fesootaiga vavave, ua foliga mai ai ua laitiiti le lalolagi. Ua aumaia ai e lenei mea vaega o lotu eseese ina ia matuā vavalalata. O lea, ua masani ai ona taʻua lotu i tala feaveai faapea o loo aafia ai ola o tagata i so o se mea.
2 Ua aafia foi la tatou galuega talaʻi. O se mea ua masani ai le feiloai atu i tagata lotu tatou te lē iloa.
3 Ina ia fesoasoani ia i tatou e mauaina se malamalamaga i isi lotu ma o latou talaaga faasolopito, ua saunia ai mo i tatou le tusi Mankind’s Search for God. O loo taliina ai le faitau selau o fesili e uiga i talitonuga faavae o lotu tetele a le lalolagi. O le a tatou faaaogāina lenei tusi i la tatou faiva i le masina o Iuni mo i latou o ē tautatala i le faa-Peretania. O ā ni mataupu mai lenei fesoasoani aogā e mafai ona tatou faamatilatilaina e faalaeiau ai tagata loto faamaoni ina ia aʻoaʻo atili e uiga i le Atua?
4 O se tasi o fesili faavae o loo tauaaoina i le tusi atoa o le: Pe e iai ea se solu e lē mafai ona oti o le tagata, e sao mai lona oti ma ola ai pea i se isi olaga mulimuli ane ai? E toetoe lava o lotu uma latou te aʻoaʻoina lena manatu, a lē o le tasi o le isi. O isi fesili ua aumaia i le tusi: E iai ea se nofoaga e taʻua o hele e faapuapuagatia ai tagata? O le ā le faamoemoe moni mo ē ua maliliu? Pe na o le toatasi ea le Atua, po o iai ni atua se toatele? E mafai ona tataʻi atu manatu i fesili o loo i itulau e 17-18 o le tusi. E tusa foi pe tatou te talanoa ma se tagata e lē talitonu i le Atua, pe faapaupau, e mafai i fesili e 4 ma le 5 ona faagaee ai lona naunau, ma ono iʻu ai i se talanoaga aogā.
5 E manaomia uma lava e le fanau a tagata ona saili i le Atua ma ia sailia lona finagalo malie i le taimi nei. Ua faaalia i mea tutupu i le lalolagi faapea ua vave tele le oo mai o Amaketo. O le taimi lenei mo gaoioiga maelega. Maeu se faaeaga ua tatou maua o le timaʻia lea o isi ina ia saili nei ia Ieova, a o mafai ona maua o ia! (Isaia 55:6, 7) E mafai faapefea ona fesoasoani le tusi Mankind’s Search for God i tagata i la latou sailiga mo le Atua? Ua saunia ai faamatalaga faatupu manatu mo tagata e eseese o latou talaaga. Mo se faaaʻoaʻoga, ua faasino atu e le palakalafa e 26 i le itulau e 297 i tagata Musalimi faapea e lē o aʻoaʻoina e le Lotu Kerisiano moni le aʻoaʻoga o le Tolutasi. Mo i latou o ē lē malamalama i le faa-Peretania, o le a tatou ofoina atu i ai le tamai tusi e 32 ona itulau, o “Lenei Tala Lelei o le Malo.”
6 Ua ia i tatou mafuaaga uma e tatau ai ona maelega e uiga i le taulimaina o nei tusi. Afai tatou te masani lelei ma mea o loo iai, o le a tatou maua ai la avanoa e faagaeeina ai tagata loto faamaoni e toatele e eseese o latou talaaga faalelotu. Talosia ia tatou faaalia le maelega mo lenei auaunaga.
7 O Ieova o ia o se Atua aao foai ma le alofa mutimutivale. Maeu le agalelei o lana valaaulia ina ia aʻoaʻoina e uiga ia te ia! Atonu o le a toatele atili ai i latou e avea ma ē e vivii atu ia Ieova. Faatasi ma le fesoasoani a le tusi Mankind’s Search for God, po o le tamai tusi o “Lenei Tala Lelei o le Malo,” o le a mafai ai ona tatou fesoasoani atu i le toatele o i Kerisinetoma atoa ma i latou e ō mai i talaaga e lē faaKerisiano ma le lē faaleatua ina ia amata ona tapuai ia Ieova i “le agaga ma le faamaoni.” (Ioane 4:23, 24) Talosia ia tatou finafinau i le sailia o ē o loo saili mo le upu moni ma faamalosia la latou faiā ma le Atua o le upu moni. E mafai ona maua o ia!