Faailoa atu le Mankind’s Search for God
1 E manatu le toatele i aso nei faapea, o a latou filifiliga i lotu, o se mataupu lea e matuā patino lava ia i latou. O lea, e mafai ai ona avea o se luʻi le talanoa atu i o tatou tuaoi e uiga i lenei mataupu. Ae, ua ia i tatou nei le tusi o le Mankind’s Search for God, lea ua faamaonia le avea ma fesoasoani aogā i le talaʻiga i tagata e eseese o latou talaaga faalelotu.
2 O le ā la sau tala e fai e faagaee ai le naunau o lē ona le fale e faitau i lenei tusi? O ā ni manatu po o ni vala o le a e faamatilatilaina ina ia tosina ai i ē faapea mai o ni Kerisiano? ia i latou e lē faaKerisiano o latou talitonuga? po o i latou e lē faatuatua? O le a fesoasoani ia i tatou faufautuaga o loo mulimuli mai ina ia sauniuni ai e faailoa atu i o tatou tuaoi le manaoga ia “saili ia Ieova” ma ia “valaau ia te ia manū o latalata mai o ia.” (Isaia 55:6) E mafai ona fetuutuunai faufautuaga i tulaga o lau oganuu.
3 Aiseā e Iloiloina ai Mea Tatou te Fai atu Ai?: Ona o le toatele o tagata ua taʻutino mai, ua faamalieina i a latou lotu ma e lē o naunau e suia, atonu e manaomia ai ona fai faatatau a tatou faatomuaga ina ia fesoasoani ai i lē ona le fale e iloiloina mea tatou te fai atu ai faatasi ma se mafaufau fetālaʻi.
4 A uma se faafeiloaiga talafeagai, e mafai ona e fai atu:
◼ “I talatalanoaga ma o matou tuaoi, ua matou iloa ai e toatele tagata ua faamalieina i a latou lotu ma e lē mananao e suia. Ae afai e faaalu e tagata le taimi e iloiloina ai talitonuga o isi, pe e te manatu ea e mafai ona taʻitaʻi ai i se malamalamaga e sili atu ma faaitiitia ai le feainai i le lalolagi? [Faataga lē ona le fale e tali mai.] Matau le mea ua fai mai ai le Tusi Paia e uiga ia i latou o ē alolofa i le Atua ma le auala e ao ai ona latou manatu i isi.” A uma ona faitau le Galuega 17:26, 27, ia tataʻi atu manatu i le palakalafa e 15 ma le 16 i le itulau e 10 o le tusi Mankind’s Search for God.
5 Ua iloa e le toatele faapea o le suʻe atu i se mataupu i le tusi o loo talanoaina ai le lotu a lē ona le fale o le a tosina mai ai ona manatu. Ia matau le auala e mafai ona fai ai.
6 A uma ona faailoa atu oe, atonu e te faapea atu:
◼ “Ona o le tele naʻuā o lotu i aso nei, ua e manatunatu ea pe mafai faapefea ona tatou mautinoa e talia e le Atua la tatou lotu?” A uma ona tali mai lē ona le fale, ona tataʻi lea o ona manatu i le pusa o loo i le itulau e 377 o le tusi Mankind’s Search for God, lena o loo faaalia ai auala e sefulu e iloa ai le lotu moni, ae maise lava ia matau le auala lona 7. Fesili i lē ona le fale pe e ioe faapea, e ao i ē o loo faia le lotu moni ona iai lena lagona e uiga i isi lanu ma atunuu. A lava le taimi, ia suʻe i mau e tolu o loo sii mai ai. Ona faaiʻu lea i le taʻua faapea, o isi mafuaaga e iva o loo aumaia ai, e faapena foi ona lagolagoina faale-Tusi Paia.
7 Pe a e Faaaogāina le Tamai Tusi o le “Tala Lelei”: Ona e toatele tagata o loo talitonu faapea e ō i le lagi pe a latou maliliu, e mafai la ona amata lau talanoaga i le faapea atu: “Ina ua matou talanoa atu e uiga i le ola e faavavau, e toatele tagata e manatu faapea o le olaga lena i le lagi. Pe e te manao ea e alu i le lagi pe a e maliu? [Faataga mo se tali.] Ou te fiafia e faailoa atu ia te oe se mau faagaee loto i le Tusi Paia, o loo taʻua ai tagata e ola e faavavau i inei lava i le lalolagi.” A maeʻa ona faitau le Salamo 37:11, 29, e mafai ona e faapea atu: “Ia matau le mea ua fai mai ai lenei tamai tusi e uiga i lena mau.” Ona faitau lea o le palakalafa e 26 i le itulau e 16 o le tamai tusi, o le Tala Lelei.
8 I le faaaogāina o sosooga uigā e faailoa atu ai le tusi Mankind’s Search for God, po o le tamai tusi, o le Tala Lelei, atonu e mafai ai ona tatou fesoasoani atu i tagata o ē tatou te talanoa ina ia saili mo le Atua moni e toatasi, o Ieova.