Pusa Fesili

◼ E mafai faapefea e le ovasia o le auaunaga ona vaavaaia le galuega a auauna o le faiva i le taulimaina o matagaluega o tusi ma mekasini?

O itu e naunau i ai le ovasia o le auaunaga, e lē gata mai lea i asiasiga i vaega o suesuega tau tusi i se faavae faalemasina ma le fuafuaina o faatasiga faifai pea mo le auaunaga i le fanua. E naunautaʻi lenei toeaina maelega i mea uma lava e mafai ona aafia ai le agaʻigaʻi i luma o le galuega talaʻi i le oganuu tofia a le faapotopotoga.

O le a ia faamautinoaina i masina taitasi ua iai se aofaiga tele o lomiga mo le tauiviga ma ia lava ma totoe mekasini e maua ma iai i se tulaga e sili ona lelei. O le itu lena na te vaavaaia ai le tele o avega tauave a auauna o le faiva ua tofia e taulimaina matagaluega o tusi ma mekasini.

E patino lava ona uaʻi atu le ovasia o le auaunaga i faasilasilaga o lomiga mo tauiviga e sosoo ai pe a faailoa mai i La Tatou Faiva o le Malo. E galulue vavalalata o ia ma le uso o loo vaaia tusi ina ia mautinoa ai ua lava ma totoe le aofaiga o lomiga o le a maua mo le faaaogāina, ae e tatau foi ona la faaeteete ia aua le soona talosagaina. Afai o le a faaaogāina se lomiga i le fanua mo le taimi muamua po ua toeitiiti foi ona suesueina lea e le faapotopotoga, e ao ona iloiloina na mea pe a auina atu se talosaga i le Sosaiete. Afai sa ofoina muamua se lomiga, o le a faaalia la i le lipoti o le auaunaga i le fanua a le faapotopotoga mo le tauiviga ua mavae po o lava ni tusi o iai. O le mea moni, e ao foi ona iloiloina mea e pei o le aofaiga o tagata talaʻi o le a auauna o ni paeonia lagolago mo le masina, le tuputupu aʻe o le aofai o tagata talaʻi atoa ma paeonia sauatoa sa iai talu mai le taimi mulimuli na ofoina ai se lomiga. E ao ona maua lomiga a o leʻi amataina ma faaiʻuina sauniga. E ao foi ona teu faalelei pusa o lomiga i se nofoaga mamā ma malu, ma teu i se auala e lē faaleagaina ai.

O le a felagolagomai foi le ovasia o le auaunaga ma le uso o loo vaaia le matagaluega o mekasini. Mai lea taimi i lea taimi, e ao ai i le ovasia o le auaunaga ma le uso o loo taulimaina mekasini ona faatusatusa le tele o mekasini o loo talosagaina mo masina taitasi ma le tele o mekasini o loo taliaina moni i le faiva. Atonu e ao i nisi o tagata talaʻi ona faaitiitia le aofaiga o a latou mekasini na talosagaina pe afai o loo faulalaʻi ai pea i o latou aiga. E lē tatau ona māumauina mekasini.

A o teu pea i le mafaufau na mataupu silisili, e ao i le ovasia o le auaunaga ona ia siakiina totino le aofaiga o lomiga mo le tauiviga ua talosagaina e le faapotopotoga i le Literature Request Form (S(d)-14). Ona ia avatu ai loa lea o le pepa i le failautusi a le faapotopotoga, o lē na te siakiina ma le faaeteete le isi vaega o le pepa, ma uaʻi totoʻa atu i le aofaiga o mea e talosaga faapitoa o loo lisi atu ai.

O le mea moni, e fai si tele o galuega tusitusi e manaomia, ina ia tausia lelei ai matagaluega o tusi ma mekasini. Afai e iai ni fesili a uso ua tofia i ai, e uiga i lo latou faaaogāina o pepa ma le tausia o faamaumauga, o le a fiafia le failautusi e fesoasoani atu i lenei vala o la latou galuega.