Pe E te Faatāuaina a Tatou Lomiga?

¹ O le pogai e tāua ai taimane ma isi maa tāua, e lē na o lo latou matagofie, ae ona o lo latou suʻe gatā foi ma le eli gatā. O le poto e uiga ia Ieova ma Iesu Keriso, e matuā sili atu ai foi lona tāua, ma o a tatou lomiga, ua na o le pau ia o lomiga i le lalolagi o loo loloto ona faamatalaina ai naʻoa faaleagaga, ma e ala i le atamai mai le Atua. (Roma 11:33; Fili. 3:8) E mafai la faapefea ona tatou faaalia le talisapaia moni mo a tatou lomiga?

² E toatele tagata taitoatasi ma aiga ua lē aunoa ona latou faataatia ese se meaalofa e ave i le Maota o le Malo ma tuu i se tasi o pusa ua faailogaina, o “Meaalofa mo le Galuega a le Sosaiete i le Lalolagi Aoao—Mataio 24:14.” Ua foaiina atu foi e tagata taitoatasi ni meaalofa faaopoopo mo le galuega i le lalolagi aoao, pe a ave a latou ota o lomiga po o mekasini, ma pe a latou tuuina atu meaalofa na maua mai i le faiva i le fanua.

³ O se isi auala e faaalia ai le talisapaia, o le filifili lelei lea i le ofoina atu o lomiga i tagata tatou te feiloai i le auaunaga i le fanua. O le a tatou lē manatu e tuuina atu se taimane taugata i se tamameamea, o lē e lē mafai ona malamalama i lona tāua. Tatou te lē avatua foi la lomiga tāua. Tatou te lē avatua foi la lomiga tāua i tagata o ē latou te lē talisapaia mea faaleagaga. (Faatusatusa i le Eperu 12:16.) O le tuuina atu ma le agaalofa o i tatou lava ma a tatou lomiga, e ao ona pulea i se uiga faautauta. Pe e loto malie ea lē ona le fale e talatalanoa? Pe e uaʻi mai ea o ia pe a tatou tautala atu, e tali mai ea i fesili tatou te fesiligia, ma mulimuli mai a o tatou faitauina le Tusi Paia? Afai e faaalia se naunau faapena, ona tatou fiafia lea e tuu atu i ai se lomiga talafeagai. Pe a tatou faia suesuega i a tatou lomiga, o le a fesoasoani ai i tagata ina ia iloaina mea o loo aʻoaʻo e le Tusi Paia ma ua tatalaina ai le avanoa mo i latou e atiina aʻe ai se faiā ma Ieova. O le aogā moni e maua mai i a tatou lomiga, e faamautinoa lea e le auala o loo faaaogāina ai.

⁴ E lē o faataunuuina e lomiga o loo taatitia i fata o le Maota o le Malo po o tatou fale, lo latou fuafuaga, ma ua lē o iloatino ai lo latou aogā. E oo foi i lomiga tuai o mekasini, polosiua, tuufaatasiga o tusi, ma sāvali, e ao ona faaaogā tatau. O anafea le taimi mulimuli na tatou faia ai se faitauga tusitusia o le aofaiga o lomiga ua uma ona tatou maua? Atonu o le a tatou maofa i le iloa o loo fau ai le tele o tusi. Po o lelei ea lomiga o loo tatou faaaogā—e lē o pologā itulau i le leva ona taatitia, o masaesae ea, pe palapalā? Afai o lea, e ao la ona tatou faia taumafaiga uma ina ia tufa atu ai i le faiva i le fanua. E mafai ona tuu lomiga ua masaesae mo le faaaogāina totino pe faatamaʻia foi i se auala talafeagai. E tusa lava foi po o tatou uaʻi autū atu i le ofo o loo iai, ae atonu tatou te filifili i nisi taimi e faaaogā se lomiga e ese.

⁵ Ia manatunatu pea ma le faaeteete i le tele o lomiga e te manaomia moni mo le tufatufaina atu. Ua tatau ai ona faia se faaiʻuga lelei. A o matuā manaomia se aofaiga e lava ma totoe, ae maise lava pe afai o loo e paeonia, e lē tau manaomia fua ona e tausia se aofaiga tele o lomiga mo oe, talu ai e tele lomiga e mafai ona maua i le Maota o le Malo a o leʻi amataina ma faaiʻuina sauniga. Ia lava ma totoe ni lomiga e te alu ma ave ina ia amata ai le masina ma ia ave atili nisi a o faasolo ina uma au lomiga.

⁶ O le a sili atu ona aogā a tatou lomiga pe a tuu atu i lima o tagata o ē talisapaia le upu moni o le Afioga a le Atua. Talosia ia tatou atamamai ma faautauta uma i le faaaogāina o mea ua saunia, e faaalia ai lo tatou faatāuaina tele o a tatou lomiga.