Galueaiina le Naunau i le Feau o le Malo
1 Ua mavae atu sina taimi—atonu e tasi pe lua ni aso, po o se vaiaso foi—talu ona lua talanoa ma se tasi o lē na faaalia le naunau i le feau o le Malo. E tusa lava pe sa ia taliaina se lomiga pe leai, ae e tāua ona galueaiina so o se naunau i le vave e mafai ai.
2 Ia autalu faamaumauga sa e faia ma le faaeteete pe a mavae le uluai asiasiga. Ma, pe a tapena lau ato talaʻi, ia mautinoa e faaaofia ai se kopi o le lomiga na e tuua, ina ia mafai ai ona e toe tapā i le taimi o le toe asiga.
Afai na e tuua le polosiua “Faauta!” e mafai ona e faapea atu:
◼ “Ua ou fiafia ua ta toe feiloai. I la ta talanoaga i le taimi ua mavae, na ou faailoa atu ai ia te oe le faavaa o le polosiua lenei, ma na ta faitauina ai se mau mai le Tusi Paia e faamaonia ai faapea, e ala i lona Malo, o le a saunia ai e le Atua galuega ma fale mo tagata uma lava. Peitai, na folafola mai foi e le Atua o le a faaiʻuina maʻi, olaga matua, atoa foi ma le oti. Pe e faigatā ea ona e talitonu i lena mea? [Faataga mo se tali a lē ona le fale.] Ia matau le manatu lenei i le palakalafa e 4 o le polosiua na ou tuua mo oe.” Faitau le palakalafa, ma iloiloina se mau e tasi pe lua ua lisiina mai i lalo o le itulau. O lena ua amataina ai se suesuega faale-Tusi Paia!
3 Ina ia saunia le ala mo se toe asiga i le lumanai, e mafai ona e faaiʻuina le talanoaga e faapea:
◼ “O le mea moni, o mea uma lava ua ta talanoaina, e mai i le Tusi Paia, peitai, e toatele tagata o loo tau mānatu pe faamata e mafai moni lava ona latou talitonu i mea ua fai mai ai le Tusi Paia. O le isi la taimi ou te toe asiasi mai ai, ou te manao e faaaluina ni nai minute ta te iloiloina ai lena mataupu.” A e toe asiasi atu la e galueaiina le naunau, ona faaauau lea o le talanoaga i lalo o le tamai ulutala “O le Tusi e Faamatala ai le Parataiso,” e amata i le palakalafa e 5 o le polosiua.
4 I Oganuu e Lē Tele ni Lomiga e Tuu Ai: E mafai ona faaaogāina le taulimaga masani lava e tasi pe a asiasi atu i tagata o ē faaalia le naunau ae e lē taliaina se lomiga. E mafai foi ona e toe suʻe i le polosiua na e ofoina i le taimi o le talanoaga ua mavae. Atonu e manaomia ona asiasi atu pea i ai ma faaaogā le Tusi Paia atoa ma lau kopi totino o le polosiua a o leʻi taliaina e lē ona le fale se polosiua. Afai e te tuua ai lomiga o Le Olomatamata o Iulai 1 po o Iulai 15, ona suʻe lea i mataupu e fesootai i ai o loo i le polosiua “Faauta!” pe a e toe foi atu e galueaiina le naunau.
5 O toe asiga lelei e taʻitaʻia atu ai i se suesuega faale-Tusi Paia i le polosiua o le Malo, e mafai ona sauniunia mai le mataupu o loo i itulau e 154-156 o le tusi Reasoning. Pe e mafai foi ona amataina se suesuega faale-Tusi Paia e ala i le faia o le fesili: “O e silafia ea e lua faamoemoe o loo aumaia e le Tusi Paia? O le tasi o le ola e faavavau lea i le lalolagi. O loo faamatalaina e lenei polosiua le auala o le a taulau ai lena mea.” Ona suʻe lea i le itulau e 15 o le polosiua, ma faitau atu i ai mau e tolu na o loo sii mai ai.
6 Afai na e tuua ai ni mekasini se lua, se tusi, po o se polosiua pe na o se lua talanoaga manaia lava o le Tusi Paia sa faia ma se tasi, ua ia te oe la le avega tauave ina ia galueaiina ai lena naunau. Matou te faalaeiauina outou uma lava e faataatia ese sina taimi ia Iulai ina ia auai i lenei galuega faasaoola.—1 Timo. 4:16.