O Auala e Faaaogā ai le Polosiua Tala Lelei Mai i le Atua!
Se Polosiua Fou e Fesoasoani i le Faia o Toe Asiga ma le Amataina o Suʻesuʻega Faale-Tusi Paia
1. O le ā le polosiua na tatala i le tauaofiaga itumalo ua mavae?
1 Sa matuā faafiafiaina i tatou ina ua tatala i le Tauaofiaga Itumalo “Ia Leoleoina Lou Loto!,” se polosiua fou e fesoasoani iā i tatou i le faia o toe asiga ma le amataina o suʻesuʻega. Ua suia e le Tala Lelei Mai i le Atua! le polosiua o le Manaʻomia. E talitutusa nei polosiua auā e pupuu ma tuusaʻo ona mataupu. E faigofie ona faaaogā le polosiua Tala Lelei Mai i le Atua! e faia ai suʻesuʻega faale-Tusi Paia i le faitotoʻa. E eseese nei polosiua, auā o loo talanoaina i le Manaʻomia agavaa e manaʻomia ona ausia e se Kerisiano, lea atonu e faigatā ona taliaina e tagata suʻesuʻe fou. Peitaʻi, o loo taulaʻi atu le polosiua Tala Lelei Mai i le Atua! i le tala lelei mai le Tusi Paia.—Galu. 15:35.
2. O le ā le fuafuaga o lenei polosiua?
2 O le ā le fuafuaga o lenei polosiua? Na talosagaina e uso se auala e faigofie ona tosina mai ai tagata i le upu moni, ona faaauau ai lea i le tusi Aʻoaʻoga Moni, le meafaigaluega autū mo le faia o suʻesuʻega. E manatu le toʻatele o tagata e faigatā ona suʻesuʻeina se tusi. Peitaʻi, e ono faigofie ona talia se suʻesuʻega faale-Tusi Paia, pe a faaaogā le polosiua. E faigofie foʻi ona faaliliuina le polosiua i le tele o gagana.
3. Aiseā e ese ai lenei polosiua mai i isi lomiga?
3 Vaega Eseese: Ua tusia le tele o a tatou lomiga i se auala e faigofie ona faitau e tagata, ma malamalama ai i le upu moni, e aunoa ma se tasi e fesoasoani i ai. Peitaʻi, ua saunia lenei polosiua o se taʻiala mo le faia o suʻesuʻega faale-Tusi Paia, lea e manaʻomia ai se tasi e fesoasoani atu. O lea, e lelei ona talanoaina se palakalafa e tasi pe lua, pe a ofoina atu lenei polosiua i tagata. O le pupuu o palakalafa, e mafai ai ona faia se talanoaga ma se tasi i le faitotoʻa po o le fale faigaluega foʻi. E lelei ona amata le suʻesuʻega i le mataupu 1, ae e mafai foʻi ona amata i so o se mataupu lava o le polosiua.
4. O le ā se vala i lenei polosiua e faamaonia ai o loo tatou aʻoaʻo atu mai le Tusi Paia?
4 O le tele o lomiga, e maua tali o fesili i le palakalafa. Peitaʻi i lenei polosiua, o le tele o tali o fesili e maua i le Tusi Paia. E sili atu ona naunau le toʻatele o tagata e aʻoaʻoina mai le Tusi Paia, nai lo o a tatou lomiga. O lea, e tatau ona faitau saʻo mai le Tusi Paia le tele o mau, auā e lē o mau uma o loo siiina mai i palakalafa. E fesoasoani lea i le tagata suʻesuʻe e iloa ai, o loo aʻoaʻoina i latou e Ieova.—Isa. 54:13.
5. Aiseā e tāua ai ona sauniuni lelei le faiaʻoga?
5 E lē o faamatalaina mai i le polosiua le tele o mau. Aiseā? Ua fuafuaina lenei polosiua e faalaeiau le tagata suʻesuʻe e fesili, ma faaaogā ai e le faiaʻoga ona tomai o le aʻoaʻo atu. O lea, e tāua tele ona sauniuni lelei. Peitaʻi o le fautuaga: Aua le tautala soo. E tatou te fiafia e faamatala uiga o mau mai le Tusi Paia. Peitaʻi, e sili atu ona lelei pe a tuu le avanoa i le tagata suʻesuʻe e faamatala mai ai lona malamalamaga i se mau. O le faia o fesili i se auala faautauta, e fesoasoani lea i le tagata suʻesuʻe e iloa ai le uiga tonu o se mau.—Galu. 17:2.
6. E faapefea ona faaaogā lenei polosiua (a) pe a lē mautonu tagata i le Atua ma le Tusi Paia? (e) pe a talaʻi mai lea fale i lea fale? (i) e amata ai suʻesuʻega faale-Tusi Paia e ala i taulimaga tuusaʻo? (o) i le faia o toe asiga?
6 E mafai ona ofoina lenei polosiua i so o se taimi, e tusa lava po ua iai se ofo mo le masina. O le a fiafia le toʻatele e faaaogā lenei polosiua i taulimaga tuusaʻo, mo le amataina ai o suʻesuʻega faale-Tusi Paia i le faitotoʻa. E pei ona taʻua i le tauaofiaga itumalo, “e mautinoa o le a fesoasoani lenei polosiua i le faia o toe asiga!”—Tagaʻi i pusa o loo i le itulau e 5-7.
7. E faapefea ona e faaaogā le polosiua e faia ai se suʻesuʻega?
7 Le Auala e Faaaogā Ai: E mafai ona amata le talanoaga i le faitau o se fesili o loo matamata tetele i se mataupu. Ona faitau lea o le palakalafa ma mau o loo faasisipa. Ia fai atu fesili i se auala faautauta, e fesoasoani ai i le tagata suʻesuʻe e malamalama i le uiga o mau. A o leʻi talanoaina le isi fesili, ia toe fesili i le tagata suʻesuʻe e tali mai le fesili o loo talanoaina, ina ia faamautinoa ua ia malamalama. Atonu e lelei le talanoaina na o se fesili o loo matamata tetele se tasi i uluaʻi asiasiga. A o faagasolo taimi, atonu e mafai ona talanoaina se mataupu atoa.
8. O le ā e tatau ona ʻalofia pe a faitauina mau, ma aiseā?
8 E masani ona maua le tali mo fesili o loo matamata tetele, mai mau o loo faatonuina e “faitau.” Pe a faitau le mau, ʻalofia le faapea atu: “Na tusi le aposetolo o Paulo,” po o le “Mātau le faamatalaga a Ieremia.” E ono manatu ai le tagata suʻesuʻe, o loo tatou faitauina atu faamatalaga a tagata. O lea, e lelei pe a faapea atu: “Ua faapea mai le Afioga a le Atua,” po o le “Mātau le faamatalaga a le Tusi Paia.”
9. Pe e tatau ona faitauina mau uma o loo taʻua i le palakalafa?
9 Pe e tatau ona faitauina mau uma o loo taʻua i le palakalafa, pe e na o mau o loo faatonuina e “faitau”? E faalagolago i le tulaga o mea. E iai māfuaaga e aumaia ai isi mau i le palakalafa, auā o loo iai faamatalaga aogā. Ae atonu e lē lelei le faitau a le tagata suʻesuʻe, pe e leai foʻi sona taimi po o se naunau i le mataupu. O lea, e sili ai le talanoaina na o mau o loo faatonuina e “faitau.”
10. O le ā le taimi e mafai ai ona sui le suʻesuʻega i le tusi Aʻoaʻoga Moni?
10 Le Taimi e Sui ai i le Aʻoaʻoga Moni: Pe afai ua māeʻa le tele o talanoaga ma o loo faaauau pea ona faia le suʻesuʻega, e mafai loa ona sui i le Aʻoaʻoga Moni pe faaauau pea le polosiua o le Tala Lelei. O lea tulaga e faaaogā i ai le tōfā mamao a le tagata talaʻi. Pe afai o le a sui i le tusi Aʻoaʻoga Moni, po o lona uiga e tatau ona toe amata mai i le amataga? E leai ni tulafono i lenā vala, ma e eseese foʻi tulaga o tagata. Peitaʻi, e maua e le tele o tagata suʻesuʻe le tele o aogā, pe afai e toe talanoaina i le tusi Aʻoaʻoga Moni mataupu sa suʻesuʻeina i le polosiua.
11. Aiseā e tatau ai ona faaaogā lelei lenei polosiua fou?
11 O loo tatou ola ma soifua i se lalolagi ua seāseā toe faalogoina ai ni tala lelei. O lea, o se faaeaga mo i tatou le faailoa atu o le tala lelei ua pule le Malo o le Atua i le taimi nei. E lē gata i lea, o se lalolagi fou e ola ai tagata amiotonu i le lumanaʻi. (Mata. 24:14; 2 Pete. 3:13) E mautinoa o le toʻatele e faalogo i lenā tala lelei o le a faapea mai: “Maʻeu le matagofie i luga o mauga o vae o lē e aumaia le tala lelei, o lē e folafolaina atu le filemu, o lē e aumaia le tala lelei i mea e sili ona lelei, o lē e folafolaina atu le faaolataga, o lē ua faapea atu i Siona: ʻUa fai lou Atua ma tupu!’” (Isa. 52:7) Tau ina ia tatou faaaogā lenei polosiua e faailoa atu ai le tala lelei mai le Atua, i ē o loo galala faaleagaga.
[Pusa i le itulau 5]
Pe a Lē Mautonu Tagata i le Atua ma le Tusi Paia:
● I nisi o vaipanoa, ua iloa e le ʻautalaʻi e tele ina taofia talanoaga ma tagata pe a faaaogā faaupuga e pei o le “Atua” ma le “Tusi Paia.” Pe afai o le tulaga lenā, atonu e lelei le talanoa i mataupu o loo atugalu ai tagata o le oganuu. O se faataʻitaʻiga, o le manaʻomia o se faigāmalo lelei, faaleleia faiā faaleaiga, faapea nisi vala e ono faapopoleina ai tagata i le lumanaʻi. A o faagasolo taimi, e mafai ona faaaogā le polosiua Tala Lelei, e iloilo ai faamaoniga o loo soifua le Atua faapea le māfuaaga e maufaatuatuaina ai le Tusi Paia.
[Pusa i le itulau 6]
Pe a Talaʻi Mai Lea Fale i Lea Fale:
● “Na ou asiasi mai e faailoa atu le auala faigofie, e aʻoaʻoina ai e faatatau i le fuafuaga a le Atua mo le lumanaʻi. Pe na iai se taimi na e tomānatu ai, faamata o le a aveesea e le Atua o tatou mafatiaga? [Faatali mo se tali.] O loo iai i lenei polosiua le tali o lenā fesili mai le Tusi Paia. [Tuu i ai le polosiua, ona faitau lea o le palakalafa muamua o le mataupu 1, faapea ma le Ieremia 29:11.] E tusa ai o nei faamatalaga, pe e te talitonu e finagalo le Atua e tatou te maua se lumanaʻi fiafia? [Faatali mo se tali.] E mafai ona tuu ma oe lenei polosiua pe a e finagalo i ai. Pe a ou toe asiasi mai, e mafai ona taʻua talanoaina le palakalafa lona lua ina ia tali ai le fesili, ʻE faapefea ona aveesea e le Atua o tatou mafatiaga?’ (Pe afai o loo iai pea se avanoa o lē ona le fale e faia ai se talanoaga umi i le uluaʻi asiasiga, atonu e mafai ona faitau ma talanoaina le palakalafa lona lua, faapea mau e tolu o loo iai. Ia fai se fuafuaga e toe foʻi e talanoa le fesili lona lua i lenā lava mataupu.)
● “O le toʻatele e tatalo, aemaise lava pe a feagai ma faafitauli. O le ā sou manatu? [Faatali mo se tali.] Pe e te manatu e faafofoga le Atua i tatalo uma, pe e iai nisi tatalo e lē fiafia i ai lona finagalo? [Faatali mo se tali.] I le polosiua lenei, ua faaalia ai le auala e tali ai i le Tusi Paia na fesili. [Ave le polosiua i le tagata, ma talanoaina le uluaʻi palakalafa o le mataupu 12 ma mau o loo faatonu e “faitau.”] Pe e lē faafiafiaina i tatou i le iloa o loo naunau le Atua e faafofoga mai iā i tatou? Peitaʻi, ina ia maua aogā atoatoa mai tatalo, e tatau ona tatou iloa lelei le Atua. [Suʻe i le mataupu e lua ma faasino i ai ulutala o loo iai.] Pe a fetaui ma oe, ou te fiafia e tuu lenei polosiua, ma ou te toe foʻi mai ma iloiloina tali o nei fesili mai le Tusi Paia.”
● “O le toʻatele ua popole i le tulaga o le lalolagi i aso nei. Pe e te manatu e iai se taimi o le a faaleleia ai le tulaga o le lalolagi? [Faatali mo se tali.] E ofo le toʻatele ona ua iai i le Tusi Paia tala lelei e mafai ona aumaia ai le faamoemoe. O nisi nei o fesili o loo maua i le Tusi Paia o latou tali.” Tuu i le tagata le polosiua, ma valaaulia o ia e filifili se fesili mai le pito i tua o le polosiua e fiafia i ai. Ia suʻe i le mataupu ma faataʻitaʻi le auala e faia ai le suʻesuʻega. Ia fai fuafuaga e toe foʻi ma iloiloina isi fesili i lenā mataupu.
[Pusa i le itulau 7]
Faataʻitaʻi Taulimaga Tuusaʻo:
● “Ua ou fiafia e asiasi mai e faailoa atu se tasi o auala e iloiloina ai le Tusi Paia. O lenei polosiua e 15 mataupu, ua faailoa mai ai po o fea i le Tusi Paia e maua ai tali o nisi o fesili tāua. [Faaali i le tagata le faavaa pito i luma ma le pito i tua o le polosiua.] Pe e te fia malamalama atili e faatatau i le Tusi Paia? [Faatali mo se tali.] Seʻi oʻu faaali atu iā te oe le faigofie o le talanoaina o mataupu o lenei polosiua. [Iloilo le palakalafa muamua o le fesili lona tolu i le mataupu e tolu, ma faitau le Faaaliga 21:4, 5. Pe a talafeagai, ia iloilo le palakalafa e sosoo ai faapea mau o loo iai.] E mafai ona tuu le polosiua ma oe, ae ou te fiafia e toe foʻi mai e faataʻitaʻi le suʻesuʻeina o le Tusi Paia i lenei auala. E mafai ona faaauau pe a e finagalo iai. Ou te asiasi mai i se isi taimi, e iloiloina le mataupu muamua, e lē umi auā e tasi lava le itulau.”
[Pusa i le itulau 7]
Faailoa Atu le Polosiua i se Toe Asiga:
● “Ua ou fiafia e toe asiasi mai iā te oe. O loo iā te aʻu se polosiua e maua ai tali o le tele o fesili tāua. [Ia tuu i le tagata le polosiua, ma valaaulia o ia e tagaʻi i le pito i tua o le polosiua.] O lē fea o mataupu nei e te fiafia i ai? [Faatali mo se tali, ona suʻe lea i le mataupu.] Seʻi oʻu faaali atu iā te oe le auala e faaaogā ai lenei polosiua e saʻili ai tali mai le Tusi Paia.” Faataʻitaʻi le auala e faia ai le suʻesuʻega e ala i le iloiloina o se palakalafa se tasi pe lua, faapea ma mau o loo faatonuina e “faitau.” O lenā ua e amataina se suʻesuʻega faale-Tusi Paia. Ia tuu le polosiua i le tagata e ona le fale, ma faia fuafuaga e toe foʻi e asia o ia. Pe a māeʻa ona suʻesuʻe se mataupu, ona tuu lea i le tagata e ona le fale e filifili le isi mataupu e sosoo ai, pe amata mai loa i le amataga.