Vivii atu i le Atua o Foafoaga
1 O laufanua matagofie, lagoto felanulanuai, fetu fepulafi i le vanimonimo i le po, tausani mālie a manulele—o ai o e faamanū atu i ai ona o na mea matagofie? Ioe, ua uunaia i tatou e vivii atu i le Atua o foafoaga. Tatou te ioe faatasi ma le loto atoa i le folafolaga o loo i le Faaaliga 4:11. Ona o lona foafoaina o mea uma, e tatau ai ona tatou vivii atu ia Ieova le Atua.
2 E ui i ni faamaoniga o galuega o le foafoaga a le Atua, ae ua lagolagoina e tagata le manatu e faapea, na faafuaseʻi ona maua o le ola pe na mafua mai i le evolusione fenuminumiai. O lenei pepelo matuiā ua paʻū ma faaleagaina ai amio a tagata, ma o se faalumaina lea e inosia e Lē Sili na Foafoaina i tatou.—Fai. 12:1; Roma 1:20, 25.
3 I le avea ma auauna faamaoni a Ieova, e ao pea lava ona tatou faailoa atu le upu moni e uiga i Lē na Foafoaina i tatou, atoa ma ana galuega ofoofogia. O le a ofoina le tusi Life—How Did It Get Here? By Evolution or by Creation? i tagata uma lava o ē faaalia le naunau moni e aʻoaʻoina mea moni e faatatau i le amataga ma le fuafuaga o le ola. O lenei lomiga, e faaauupegaina ai i tatou ina ia puipuia ma le lototele le upu moni e faatatau i le amataga o le ola. Mo i latou o ē tautatala i le faa-Samoa, e mafai ona tatou faaaogāina le mataupu e 7 o le tusi Ola e Faavavau.
4 Oganuu Faapitoa: E ese mai i le molimau atu i lea fale ma lea fale, e mafai ona tatou faamuamua se taumafaiga faapitoa e talanoa ai ma tagata o ē e naunau patino i le mataupu o le evolusione po o le foafoaga, i le faafesootaia lea o i latou i o latou fale faigaluega po o le aʻoga. Mo se faaaʻoaʻoga, sa taulau ni Molimau talavou i le ofoina atu o le tusi Creation ina ua latou faaalia i o latou faiaʻoga i le aʻoga. Na avatu e se tasi o Molimau talavou (teine) i lona faiaʻoga se tusi Creation ma sa ofo ina ua ia matauina e lē gata ina suesue maeʻaeʻa e le faiaʻoga, ae ua amata foi ona faaaogā e fai ma faavae e aʻoaʻo ai le vasega. (w90 9/1 itu. 32; w-SM 10/1 itu. 32) Aiseā e te lē faalatalata atu ai i ou faiaʻoga taitoatasi ma aumea i le vasega o ē e te manatu o le a fiafia e faitau i lenei lomiga matagofie.
5 E mafai ona taulai atu se taumafaiga faapitoa i le ausia o tamaiti aʻoga i se kolisi, atoa ma faiaʻoga o loo nonofo pe faigaluega i lau oganuu. Ua talisapaia e tagata faapolofesa e pei o loia ma fomaʻi, le loloto o suesuega ma faamaoniga faamaumauina o loo maua i le tusi Creation. (yb87 itu. 54) Atonu foi e mananao i latou e te faalatalata atu i ai, ina ia maua lenei lomiga ua matagofie ona mamanuina, e fai ma tusi e tapā mo ni faamaumauga.
6 I se tulaga atamai, o le a tatou lē ofoina atu ai le tusi Creation i ē uma tatou te feiloai, ona e toatele tagata e matuā leai lava se naunau i lenei mataupu. Peitai, a o e talanoaina se manatu e tasi pe sili atu foi e aʻoaʻoina ai mai le tusi, ma atiina aʻe ai le faatuatua i Lē na Foafoaina mea, o le a e mauaina ai tagata tonu o ē mafuli atu i le mananao e aʻoaʻo atili. O i latou na tatou te mananao e ofo atu i ai le tusi Creation.
7 Talosia ia avea lenei meafaigaluega matagofie e lē gata ina ia fesoasoani ai i nisi tagata e toatele ia iloa le valea o le tala a le evolusione, ae ia fesoasoani ai foi ia te i latou e atiina aʻe le talisapaia mo le meaalofa o le ola. O le a faagaeeina e lenei tusi ia te i latou se faanaunauga ina ia ola e faavavau mo le viiga o Lē Foai ola ma o ia “o le na faia le lagi atoa ma le lalolagi.”—Sala. 146:6.