O Ē Faasusulu Atu le Malamalama i Tuaoi
1 Ina ua maeʻa ona auai i le tauaofiaga itumalo i lenei tausaga, ua sili atu nei lo tatou iloa o le manaoga ina ia avea ma ē faasusulu atu le malamalama i o tatou tuaoi. (Mata. 5:14) A o tatou toe manatunatu i faamatalaga uma sa tauaaoina i le polokalama ma taumafai e faatatauina i o tatou olaga i aso fai soo, ua fesoasoani ai ia i tatou ina ia tosina vavalalata atu ia Ieova i le tapuaiga moni, ma ia fesoasoani ai foi i isi ina ia aʻoaʻo e uiga i folafolaga a Ieova.
2 Na faateleina o tatou avanoa e faasusulu atu ai le malamalama, ina ua oo i le faaiʻuga o le vaega i le taeao o le Aso Faraile, sa tatalaina ai le sāvali ua faaulutalaina Po o le a Faasaoina ea Lenei Lalolagi? i le faa-Samoa ma le faa-Peretania. Sa matuā aogā tele faataʻitaʻiga i le taeao o le Aso Toonai i le faaalia ai o le auala e mafai ona faaaogā ai lenei sāvali. Faatasi ma lenei sāvali, sa faia ai se faasilasilaga faapea e tolu isi sāvali ua toeitiiti ona maua foi lea i le faa-Samoa ma le faa-Peretania. O ulutala o na sāvali o le Faamafanafanaga mo Ē Loto Mafatia, Olioli i le Olaga Faaleaiga, ma le O Ai Moni o loo Pulea le Lalolagi? Na aumaia ai se faalaeiauga ina ia tatou ō ma ave nei meafaigaluega e faigofie ona tāpā, ina ia faaaogā i avanoa e aliaʻi mai.
3 I le faaiʻuga o le lauga, “Faasaoina i le Faaalia mai o Iesu Keriso” i le afiafi o le Aso Toonai, na tatalaina ai se polosiua fou ua faaulutalaina Po o Silasila Alofa Mai ea le Atua ia i Tatou? i le faa-Samoa ma le faa-Peretania. O lenei polosiua e felanulanuai atoa, ma ua matagofie ona mamanuina, o le a fesoasoani lea e taliina ai le tele o fesili ua fesiligia e tagata, e pei o le: Aiseā ua faatagaina ai e le Atua puapuaga? Po o le a faamutaina ea puapuaga? E faapefea ona tatou iloa ua tatou iai i aso e gata ai? O le a faapefea ona faaliliuina le lalolagi e fai ma parataiso? E mafai faapefea ona tatou maua le ola e faavavau i le lalolagi fou a le Atua? O le a avea lenei polosiua o se mea faigaluega e sili ona lelei mo le amataina o suesuega fou.
4 Maeu lo tatou loto faafetai mo le fau ma soloi o meaʻai faaleagaga na tatou maua i le Tauaofiaga Itumalo “O Ē Faasusulu Atu le Malamalama”! Talosia, ia avea ma a tatou filifiliga o ni ē faasusulu atu le malamalama faaleagaga o le Atua, ia faaalia atu lo tatou talisapaia mai le loto e ala i le faatatauina ma le loto faamaoni o mea na tatou aʻoaʻoina ma le faaaogāina ma le tinoū o nei lomiga matagofie sa tatalaina, e fesoasoani atu ai i tagata i so o se mea ina ia iloa ma auauna ia Ieova.