Pusa Fesili

◼ O le ā le tele e ao ai i fanau laiti a mātua Kerisiano ona auai i le faiva i le fanua a o leʻi avea i latou ma tagata talaʻi e leʻi papatisoina?

E mananao mātua Kerisiano i a latou fanau ina ia tutupu aʻe e avea ma auauna taʻumatuaina, ma tuutoina atu a Ieova.(1 Samu. 2:18, 26: Luka 2:40) E oo foi i le tau amataga o uluai tausaga, e ao i fanau a aiga Kerisiano ona mafai ona avatu ni faamatalaga manino e puipuia ai lo latou faatuatua ua faavae i le Tusi Paia. O le a vave le tuputupu aʻe faaleagaga o fanau a o latou ō faatasi ma o latou mātua i le faiva i le fanua, a o tamameamea. Peitai e tāua mo ē talavou ona uunaia mai o latou loto, ina ia latou olioli ai i le auaunaga i le fanua, ia faanaunau e avea ma tagata talaʻi e leʻi papatisoina, ma ia faaauau pea ona auai i le galuega talaʻi o le Malo. E manaomia ai se toleniga ma le faaeteete mai mātua. (1 Timo. 4:6; 2 Timo. 2:15) E mafai foi ona fesoasoani i ai isi tagata talaʻi agavaa pe afai e ioe i ai mātua.—Tagai i le Our Ministry, itulau e 99-100.

A ō faatasi fanau amiolelei ma o latou mātua Kerisiano i le galuega i lea fale ma lea fale, o le a latou aʻoaʻoina ai le auala e galulue ai i le faiva. Peitai o le a lē avea i latou ma tagata talaʻi e leʻi papatisoina seʻi vaganā ua latou atiina aʻe le agavaa ma le tomai mo i latou lava. O le a mafai e mātua Kerisiano ona filifili po o le ā le tele e ao ai ona auai se tamaitiiti i le avatuina o se molimau a o latou galulue faatasi. E lē tatau i fanau o ē e leʻi avea ma tagata talaʻi e leʻi papatisoina ona faia ni toe asiga na o i latou lava pe ō faatasi foi ma isi tamaiti i le auaunaga i le fanua. E mafai e mātua ona sauniunia a latou fanau mo le auaunaga i le fanua ma ia faatagaina i latou e faia se sao i auala eseese, e pei o le faitauina o se mau, le ofoina o se sāvali po o se mekasini, po o le faaalia foi i lē ona le fale o se ata mai se tasi o lomiga. A o tuputupu aʻe se tamaitiiti e avea ma tagata matua, atonu e mafai ona faateleina sona sao i le talanoaga.

A lelei le toleniga, ona mafai ai lea e ē talavou ona aʻoaʻo ina ia talisapaia le uigā o le faiva, a o latou tali atu i le taʻitaʻiga a o latou mātua ma pulea ai i latou lava i se auala maopoopo. E lē tatau i mātua ona tuu a latou fanau o ē e leʻi avea ma tagata talaʻi e leʻi papatisoina i le faatasiga mo le auaunaga i le fanua, i le manatu faapea o le a vaaia i latou e isi. O mātua e manatu mamafa, latou te amanaia la latou avega tauave totino o le faatonutonuina o le galuega a a latou fanau. O le mea moni, ua naunau isi tagata talaʻi maufaatuatuaina, ina ia fesoasoani atu i le toleniina o fanau laiti i le faapotopotoga o ē e faaalia le naunau moni e auauna ia Ieova i le faiva.