Ia Aʻoaʻoina Oe Lava Ia Avea le Tuutoina i le Atua ma Ou Sini
1 O le Aʻoga o le Faiva Faatiokarate, ua aʻoaʻoina ai i tatou ina ia agaʻigaʻi i luma i le ‘taulimaina ma le saʻo o le upu moni.’ (2 Timo. 2:15) Po o e auai i ai? Afai e leai, ae ua e agavaa, aiseā e lē taumafai ai ia maua aogā mai lenei sauniuniga lelei e ala i le tusia nei loa o lou igoa?
2 O se vala tāua o le aʻoga, o le polokalama lea o le faitau Tusi Paia faalevaiaso. E ao i lau faasologa o suesuega totino ona faaaofia ai mataupu tofia mo le faitau Tusi Paia ina ia mafai ai ona e faitauina le Tusi Paia atoa i le gasologa o le taimi.
3 E amata i le faasologa o le aʻoga i le 1993, o le faitau Tusi Paia lea e aofia i le Lauga Nu. 2, o le a faitauina atoa e aunoa ma se faalavelavea i ni manatu faaogatotonu. O le uiga o lenei mea, o le tagata aʻoga e taulimaina lenei lauga, o le a ia faaaofia ai se faamalamalamaga i na o ana upu tomua, ma upu faaiʻu. O le uso e tofia mo mea tāua o le Tusi Paia, e ao ona itiiti ni ana faamatalaga mai fuaiupu ua tofia mo le Lauga Nu. 2 ina ia mafai ai e le failauga mo lena lauga ona fausia aʻe atoatoa ana faamatalaga i le faitau Tusi Paia.
4 O le a faailoga e le ovasia o le aʻoga le Pepa e Faatonu ai le Lauga Nu. 2, 3, ma le 4. E lē faatalitalia o ia e mulimuli i le faasologa o faatonuga o i le pepa faatonu, ae e mafai ona ia fai atu se fautuaga patino i manatu e manaomia ona faaleleia ai le tagata aʻoga. E lē manaomia ona faailogaina le pepa faatonu a le failauga o tofia i ai le Lauga Nu. 1, e ui i lea, e ono mafai ona avatu i ai se fautuaga patino pe a manaomia.
5 O i latou uma ua agavaa, e ao ona maua atoatoa aogā mai sauniuniga faaleagaga ua saunia e Ieova, e aofia ai ma le toleniga ua ofoina mai i le Aʻoga o le Faiva Faatiokarate. O lena toleniga e mafai ona iʻu ai i se faiva e sili ona fua tele.—1 Timo. 4:7.