Pe Mafai ona Sili atu Nisi Mea E te Faia e Āva ai ia Ieova?
1 O le fesili lena e matuā tāua ia i tatou uma ona manatunatu i ai. Ona o ni ē e faaaʻoaʻo faamaoni i lo tatou Matai, o Iesu Keriso, ua tatou āva ai i lo tatou Atua i aso nei, e ala i le faalauiloa faalauaitele atu o lona suafa. O la tatou tiute tauave lenei pe afai tatou te fia maua le finagalo malie o le Atua. (Mare. 13:10; Luka 4:18; Galu. 4:20; Epe. 13:15) Maeu se faaeaga lē mafaamatalaina—ioe, o se mamalu—e faaoo atu lenei tala lelei i “mamoe” o loo taapeape solo pea, o ē e iai se taimi ona avea lea ma vaega o le lafu atoa a Ieova!—Ioane 10:16.
2 Pe tou te mafaia ma lau fanau ona faia atili nisi mea e āva atu ai ia Ieova, i le faateleina lea o la outou faiva? Ua matuā faateleina i le lalolagi aoao, le aofaiga o o outou uso ma tuafāfine o loo ulu atu i le auaunaga faapaeonia. I le masina o Aperila 1992, sa iai i le Iunaite Setete se tumutumuga e 172,145 o ē na i le auaunaga paeonia faapito, paeonia sauatoa, po o le paeonia lagolago, lea ua sili atu lona toatele na i lo le faitau aofai o tagatanuu o Samoa i Sisifo. Pe ua e manatunatu totino ea oe lava i le faapaeonia? Pe e te faalaeiauina lau fanau ina ia tuliloaina se galuega i le faiva faataimi atoa?
3 Aiseā e lē fefulifulisai ai ou lava faalogona e faatatau i le auaunaga paeonia? I so o se taimi lava e talanoaina ai lea mataupu, pe vave ea ona e faapea mai ona o ou tulaga e lē mafai ai ona e auauna o se faifeau paeonia? E moni e lē mafai e tagata uma ona paeonia. E toatele nisi ua lē mafai ona auauna faataimi atoa ona o ni tiute tauave faale-Tusi Paia ma isi foi tapulaa. (1 Timo. 5:8) Ae pe sa e iloiloina faatasi ma le tatalo i se taimi lata mai nei lea mataupu? Pe ua tou talanoaina faatasi ma le aiga le mataupu, ina ia iloa pe o iai lava se isi e toatasi o le aiga e mafai ona paeonia? I le lomiga o Le Olomatamata o Setema 1, 1983, na taʻua ai lenei faamatalaga faatupu manatu i le itulau e 17: “Ma le moni lava, e ao i faifeau Kerisiano taitasi ona mafaufau ma le tatalo pe mata e mafai e ia ona paeonia pe leai. Fai mai se tasi ulugalii i Aferika i Saute o ē na paeonia mo tausaga e sefululima: ‘Pe aiseā na ma paeonia ai? Pe mafai ea ona ma taʻuamiotonuina i maʻua i luma o Ieova pe ana fai ma te lē faia faapea?’ E toatele o ē lē paeonia e mafai ona fesili i lenei foi fesili: ‘Pe e mafai ea ona taʻuamiotonuina aʻu i luma o Ieova pe a lē o aʻu o se paeonia?’ ”
4 I le isi mataupu o Le Olomatamata faa-Peretania o loo talanoaina ai le mataupu lea, ua faapenei se manatu o iai: “E tatau ona tatou taitoatasi ma faamaoni ia i tatou lava. Pe e te faapea mai ea, ‘E manao i ai le loto, a o le tino ua vaivai’? Ae pe o manao moni ea i ai le loto? Seʻi soia tatou te avea vaivaiga o le tino e fai ma faamolemolega o le lē o manao i ai o le loto.”—w-E 8/15/78 itu. 23.
5 O Mātua e Mananao ina ia Manuia a Latou Fanau: Ua faamautinoa mai i tatou e le Faataoto 15:20: “O le atalii poto e faafiafia e ia le tamā.” E lē mafesiligia le olioli o mātua o loo auauna i le Atua, pe a tuliloaina e o latou atalii ma afafine se olaga o le tuutoina i le auaunaga ia Ieova. Peitai, o le a lē faafuaseʻi ona filifilia e lau fanau se auala atamai. E malolosi tele faatosinaga a lenei lalolagi. Mātua e, o mea lua te faatāuaina, o mea foi na e faatāuaina e la oulua fanau. Afai e masani pea ona lua tautatala faaviivii i aogā o le auaunaga faataimi atoa, afai lua te faalaeiauina la oulua fanau laiti e faauō atu i paeonia faamaoni, afai ua lua matuā faamautinoa atu o le faiva faataimi atoa, o le galuega sili lea ona mamalu e mafai ona faia e la oulua fanau, o lenei la uiga lelei, e mautinoa o le a iai sona taaʻiga tele i lau fanau. Fesoasoani ia i latou ina ia talisapaia le tāua o le taʻuleleia mai e Ieova na i lo le taʻuleleia mai e tagata.
6 Talavou e, ua faamatilatila mai i le Faataoto 22:1 le filifiliga e ao ona tou faia: “Ia sili le manao ina ia taʻuleleia i le manao i le oloa e tele; ma le agalelei, ia sili le manao i lea i le ario ma le auro.” O le ā le ituaiga o igoa e te manao e taʻuleleia ai oe? Seʻi mafaufau i tane ma fafine ua tatou faitau i ai i le Tusi Paia, o ē sa taʻuleleia e le Atua ona o la latou auaunaga faamaoni. Sa iai Luka, le fomaʻi sa alofagia, ma Enoka, o lē na mulimulituʻi i le Atua moni. Na aʻoaʻoina Samuelu i se aʻoaʻoga e sili ona lelei, i le amataina o lana auaunaga i le malumalu o Ieova mai lava i ona tausaga muʻa. Pe e te manatu ea na iai se taimi na salamō ai nei auauna faamaoni ona o filifiliga sa latou faia? Aiseā o le a latou salamō ai? Sa ola uma i latou na i ni olaga fiafia, sa tele ni iʻuga lelei na maua ai, ma sa olioli ai foi i latou. Ma sa finagalo malie pea Ieova ia i latou!—Sala. 110:3; 148:12, 13; Faata. 20:29a; 1 Timo. 4:8e.
7 Pe a iai ni iʻuga manuia i olaga o le fanau, e lagona e o latou mātua le mitamita. Ua matuā faateleina le tauia mai o a latou taumafaiga i le toleniina, le aʻoaʻiina, ma le aʻoaʻoina o lenei “tofi . . . mai ia Ieova.” (Sala. 127:3) Ae o le ā se isi mitamitaga e sili atu i so o se matua, pe afai e faia e sona atalii po o se afafine, mea uma na te mafaia ina ia āva ai ia Ieova? E toatele talavou i aso nei ua mulimuli atu i faataʻitaʻiga a Luka, Enoka, ma Samuelu, e pei ona faataʻitaʻia mai i lenei tusi: “Ua 16 oʻu tausaga. Na amata ona ou paeonia sauatoa . . . i le iva masina talu ona uma loʻu papatisoga, ma na amata mai ai lava i lena taimi ona faamanuia mai Ieova ia te aʻu. . . . E fesoasoani foi ia te oe le paeonia i le aʻoga. I le taimi muamua, sa ula aʻu uō i le vasega ona o aʻu o se Molimau. I le taimi nei, talu ai le tatau ona faia atili ni aʻu suesuega totino, ua mafai ai ona ou ‘faia atu se tali i lē o loo faifai mai ia te aʻu.’ ”
8 Aʻoaʻoga e Faaauupegaina ai se Tasi i le Faiva: O le tulaga lenei atonu tatou te iloiloina ai le fesili e faatatau i aʻoaʻoga faalelalolagi. O le itu lenei e matuā manaomia ai se vaaiga paleni. Ua faamatilatila mai i le polosiua o Mataupu mo Suesuega Mai “Le Olomatamata” Faa-Peretania 1992, itulau e 70, le mataupu “Aʻoaʻoga Faatasi ma se Fuafuaga.” I le fasi ulutala “Ia Lava le Aʻoaʻoga,” ua taʻua ai le manatu tāua lenei: “E ao i Kerisiano ona mafaia ona tausia i latou lava, e tusa lava po o i latou o ni faifeau paeonia e galulue faataimi atoa. (2 Tesalonia 3:10-12) . . . O le ā le tele o aʻoaʻoga e manaomia e se Kerisiano talavou ina ia mafai ai ona ia faaaloalo i nei mataupu silisili faale-Tusi Paia ma faafetaiaia ai ana matafaioi faa-Kerisiano? . . . O le ā le uiga o [totogi] e ‘talafeagai’ . . . mo i latou o ē mananao e avea ma faifeau paeonia o le tala lelei? O i latou na e masani ona manaomia ni galuega faavaitaimi ina ia alofia ai le tuuina atu ‘o se avega mamafa’ i luga o latou uso po o aiga.—1 Tesalonia 2:9.”
9 Afai e foliga mai e talafeagai ni aʻoaʻoga faaopoopo mo se tasi o loo fuafua e paeonia, ina ia fesoasoani ia te ia e tuliloaina le auaunaga faataimi atoa, ua fautua mai le polosiua o Mataupu mo Suesuega Mai “Le Olomatamata” Faa-Peretania 1992, itulau e 75 e faapea: “Pe afai e mafaia, e sili ona lelei mo se Molimau talavou, le faia o lenei laasaga a o nofo i le aiga, auā e mafai ai e lena itu ona tausisia pea le masani faa-Kerisiano o le faia o suesuega, le auai i sauniga, ma le galuega talaʻi.”
10 O se mea lenei na tupu i se talavou mai Aferika e 22 ona tausaga, o lē sa tatau ona auai i se aʻoga e aʻoaʻoina ai se matātā faapitoa, e ui lava sa faanaunau lona loto i le auaunaga paeonia. A o iai i lea aʻoga, sa avea o ia ma paeonia lagolago. Sa ulagia o ia e ana tupulaga, i le fai atu i ai e mautinoa lava o le a lē pasi ana suega. O lana tali masani lava ia i latou: “Ia muai saili le Malo o le Atua ma lana amiotonu.” I lona puleaina o ia lava, e alapō ai i taeao uma e faia ana sauniuniga o le aʻoga mo le lua itula, ona auai atu lea i le auaunaga i le fanua i le afiafi pe a tuua le vasega. Na matuā meia le aʻoga atoa ina ua tulaga tolu lenei talavou i se suega faapitoa e filifilia ai ni tamaiti aʻoga se toatolu e sili ona atamamai mo se faailoga faapitoa faasikolasipi. O le tamaitiiti na tulaga lua, o se tagata fiafia sa faia e lo tatou uso paeonia lana suesuega faale-Tusi Paia i le aʻoga. O le tamaitiiti na sili, o se isi foi Molimau talavou maelega i le aʻoga.
11 E Faia e Toeaina la Latou Vaega: O toeaina o le faapotopotoga, o ē ua mitamita ona o le galuega o loo faia e paeonia, ua latou saunia se faalaeiauga sili mo nei faifeau maelega. Ua fiafia toeaina e faia faapea auā ua latou iloa, o paeonia o ē galulue malolosi, ma manuia a latou galuega, o se faamanuiaga lea i so o se faapotopotoga. Pe a mavae se tausaga atoa po o le sili atu talu ona latou auauna faapaeonia sauatoa, ona agavaa ai lea o i latou na mo se isi aʻoaʻoga faaopoopo i le Aʻoga o le Auaunaga Faapaeonia. Ua faamaonia, o lea aʻoaʻoga o se meafaigaluega sili ona aogā i le faaleleia o le aasa o paeonia. E ui lava o loo iai paeonia i le muāau o le galuega, ae latou te manaomia foi ni faalaeiauga alofa, ma e ao i toeaina ona mataala e faataunuu lenei manaoga.—1 Pete. 5:1-3.
12 E mafai faapefea ona faagaee e toeaina le galuega paeonia? O se tulaga lelei e amata ai, o le fuafua mai lea taimi i lea taimi po o ai e mafai ona ausiaina lenei faaeaga. E mafai ona talanoa atu toeaina i nisi o ē e foliga o loo i se tulaga talafeagai e paeonia ai, e aofia ai le toatele o loo paeonia lagolago faifai pea, o ni tagata ua faamalōlō mai a latou galuega, o avā nofoaiga, ma tamaiti aʻoga. E ui ina lē faamalosia se tasi e auai, ae o i latou o ē o loo iai le faanaunauga ae o loo faatalatū pea, ma itiiti se faalaeiauga o latou maua, e ao ona latou mautinoa, o le auaunaga paeonia o se mea latou te mafaia.
13 Pe a faalaeiau atu ia i latou o loo fia talosaga, e ao i toeaina ona manatua, e lē tau manaomia mo lē o talosaga ona paeonia lagolago mo le tele o ni masina ona faatoʻā avea lea o se paeonia sauatoa. (km-SM 8/86 faaopoopoga pala. 24-26) O le mea moni, o le a mananao toeaina ina ia mautinoa lelei o loo iai lē ua talosaga i se tulaga na te mafaia ai ona ausia itula manaomia.
14 Pe a maeʻa ona autaluina e le Komiti o le Auaunaga a le Faapotopotoga le talosaga, ma ua iloiloina totoʻa e le failautusi ina ia mautinoa ua tali uma fesili, ona tatau lea ona lafo faavave atu loa i le Sosaiete.
15 E ao i le failautusi ona faafesootaia i taimi uma toeaina i so o se faafitauli e ono tutupu i paeonia. E tāua tele lenei manatu i faapotopotoga o loo toatele a latou paeonia. E lē gata i le autaluina o le galuega a paeonia i le iʻuga o le tausaga faaleauaunaga, e pei ona manaomia mai i le Congregation Analysis Report (S-10), ae e ao foi i le failautusi ona faia se la feiloaiga ma le ovasia o le auaunaga i le amataga lava o Mati ina ia iloa po o ai o loo faaletonu i le ausiaina o itula manaomia ma ua manaomia i ai se fesoasoani totino. (Tagai i Faasilasilaga i La Tatou Faiva o le Malo o Fepuari 1993.) Afai e lē faatuai le avatuina o le fesoasoani, ona mafai lea e le paeonia ona faamaeʻaina ma le manuia le tausaga faaleauaunaga.
16 O le vaega tele o paeonia fou o ni talavou pe e leʻi leva foi i le upu moni. O lo latou agaga naunau fiafia e mautinoa lo tatou olioli ai! Peitai o loo manaomia pea e i latou nei o loo fou se toleniga ina ia atiina aʻe ai le tomai i le galuega mai lea fale i lea fale, i le faia o ni toe asiga e aogā, ma i le aʻoaʻo atu ai i suesuega faale-Tusi Paia. Afai e lē o avatuina lenei toleniga, atonu la pe a mavae le tausaga e tasi pe ā, ae amata toe faavaivai le tagata fou, ma mulimuli ane ai motusia lana auaunaga paeonia, ona o le leai o ni iʻuga lelei i le faiva. O toeaina e mataala, e mafai ona latou iiteina ni nai faafitauli laiti po o le amata faagesegese i le faia o le galuega. Afai la e vave ona uaʻi atu i ai ma fesoasoani i le paeonia i lona faafitauli, ona mafai lea ona ia olioli mo le tele o tausaga i se auaunaga e fuatele mai.
17 Pe Mafai ona E Fagota i Ogasami Fou? O nisi o soʻo o Iesu o ni faifaiva. I nisi taimi, e aʻe se fagotaga i le po atoa, ae e leai lava ni iʻa i a latou upega. (Ioane 21:3) I nisi vaega o lenei atunuu ua faia ai mo le tele o tausaga le ‘faiga faiva mo tagata,’ atonu ua manatu ai nisi paeonia, ua lē o toe tele ni “iʻa” o loo totoe ai i “ogasami” a la latou faapotopotoga. (Mata. 4:19) I le faaeseesega, po ua lē o faafiafiaina ea i tatou e faitau atu i tala mai isi atunuu o loo faia ai e tagata talaʻi ma paeonia le tele o suesuega faale-Tusi Paia? E matuā manino mai le olioli ua tofo i ai paeonia ma misionare i nei atunuu. (Mataupu mo Suesuega Mai “Le Olomatamata” Faa-Peretania 1992 itu. 24 pala. 15) O lea, afai o iai ni paeonia o loo galulue mamafa, e mafai ona toe fetuunai atu i se isi vaega o le atunuu po o se motu o lata ane o loo tele ai le manaomia, e tatau ona latou talanoaina lenei mataupu ma lo latou ofisa o le lālā a o leʻi faia lena fesiitaiga.
18 O le uluai mafuaaga lava atonu e paeonia ai nisi ona ua latou iloa o le mea saʻo lea e tatau ona fai, peitai e tau mānatu pe o le a latou taulau manuia ai. Atonu e talosaga, ae o loo masalosalo lava ma lē mautonu. I le amataga lava la, atonu e itiiti ni āuga lelei latou te maua mai i le fanua. Peitai a o faagasolo taimi, e faateleina lo latou tomai, ma ua vaaia foi le faamanuia a Ieova i la latou galuega. O le iʻuga, na faatuputupulaia lo latou olioli ma le mautinoa. Ua faamaonia e nisi, o le paeonia ua pei o se sitepu lea e laa atu ai i le auaunaga Peteli, le aʻoaʻoina i Kiliata ma le galuega faamisionare, le Aʻoga e Aʻoaʻoina ai i le Faiva, e oo foi i le galuega femalagaai.
19 Atonu e te lē mafai ona alu atu i se isi atunuu po o le faamanuiaga e aʻoaʻoina ai i Kiliata, peitai o loo iai pea avanoa e fagota ai i isi ogasami i lenei lava atunuu pe afai e lē o matuā fua mai lau oganuu o loo e iai nei. Atonu e manaomia ai i lena fesiitaiga ona toe fetuutuunai laasaga o lou olaga, peitai o le a matuā sili ona tele taui faaleagaga.—Mata. 6:19-21.
20 Pe afai foi e talafeagai ma ou tulaga, atonu e te mafai ona fesoasoani atu i se faapotopotoga i la outou lava matagaluega o loo latalata ane. Afai e te agavaa, o le a fiafia la outou ovasia matagaluega e taʻu atu ia te oe nisi o faapotopotoga o iai i le matagaluega o le a latou mauaina ni aogā mai se isi paeonia.
21 Ua mafai e nisi paeonia ma tagata talaʻi ona auauna mo manaoga i la latou lava oganuu, a o latou nonofo ai pea i o latou aiga. Atonu latou te malamalama i se isi gagana. Pe ua e mātauina i lau oganuu e iai se vaega tele o tagata e tautatala i se isi gagana? Pe atonu ea e mafai ona e faaleleia lau faa-Peretania ina ia atili uigā ai i le faiva? O i latou e malamalama i se isi gagana e ono avea o se fesoasoani sili i le faaooina atu o le feau o le Malo i ituaiga uma o tagata. E ui lava o se luʻi tele lenei tulaga, ae e mafai foi ona faamaonia le matuā tauia.—1 Timo. 2:4; Tito 2:11.
22 Afai o loo e faia nei mea uma e te mafaia e āva ai ia Ieova, ia olioli la i faaeaga o le auaunaga ua ia te oe. Afai e te manatu e mafai ona e faia nisi mea e sili atu, ia taʻu atu ia Ieova lea mataupu e ala i le tatalo. Ia matuā iloilo ma le mautinoa po o ā ni suiga e mafai e ou tulaga ona faatagaina ai oe e faia. Ia talanoa au fuafuaga ma se toeaina o lē o loo iai se agaga faapaeonia, po o le talanoa foi ma le ovasia matagaluega. Pe a maeʻa ona e faia se filifiliga mautū faatasi ma le tatalo, ia vave loa ona faatino, ma ia e faatuatua i le folafolaga a Ieova e faapea, o le a āva mai o ia, ia i latou o ē āva atu ia te ia.—Epe. 13:5, 6; 1 Samu. 2:30.