Faaalia le Lagolagosua mo Paeonia

¹ Ua lauiloa tagata o le Atua i lo latou auai ma le maelega i le faiva. E ui ina e lē o iai i tagata uma aiaiga e faatagaina ai i latou e paeonia, ae ao ona tatou tauivi e atiina aʻe le agaga paeonia, ia auai ma le loto atoa i mea tatou te faia. Tatou te olioli faatasi ma faalaeiauina le toatele o ē ua mafai ona ulu atu i le auaunaga paeonia.

² O le avea ma tumau ai o se paeonia o se laasaga telē. O loo tauaveina e paeonia se vaega tele o le galuega talaʻi ma le aʻoaʻo atu. E lē mafai ona faataunuuina lenei mea seʻi vaganā le anoanoai o taumafaiga ma le faataulagaina. E mafai faapefea e isi ona lagolagosua ma faalaeiauina nei auauna faataimi atoa maelega?

³ Mea e Mafai ona Fai: E manaomia e paeonia le lagolagosua a toeaina. Ua saunia le tele o faalaeiauga pe a galulue faatasi toeaina ma paeonia. E toatele toeaina ua taumafai e galulue ma paeonia taitasi i le faapotopotoga, a itiiti mai o le faatasi i le tausaga. I lenei auala e mafai ai e toeaina ona avatu le faamālō mo mea o loo faia e paeonia ma fesoasoani ai ia i latou e agaʻigaʻi atili i luma. Atonu e manaomia e paeonia ona fetuutuunai a latou faasologa ina ia auai i le auaunaga i taimi e avanoa ai toeaina. O le a mananao foi toeaina, e faamautinoa ua lava ma totoe le oganuu o loo iai mo vaega. E mafai ona fuafua ni faatasiga faaopoopo mo le auaunaga i le fanua i afiafi po o afiafipo ina ia talafeagai ai ma faasologa a paeonia. O le a faapitoa ona moni o lenei mea i masina ia e toatele ai le aofai o paeonia lagolago.—Isaia 40:11.

⁴ O loo iai auauna o le faiva i se tulaga lelei e fesoasoani ai i paeonia e ala i le lagolagoina o i latou i le faiva ma i le tausia ma le tinoū o faatatauga a le faapotopotoga. E talisapaia e tuafāfine paeonia le iai o ni uso e taʻitaʻia le faamaopoopoina o vaega i le auaunaga i le fanua. E mafai e i latou o loo taulimaina tusi ma mekasini ona faamautinoa ua lava ma totoe sapalai o loo maua. O le vaaia lelei o ia itu, o le a mafai ai e paeonia ona uaʻi totoʻa atu i la latou faiva.

⁵ E Mafai e Tagata Uma ona Fesoasoani: E mafai e tagata talaʻi ona fesoasoani atu e ala i le faaavanoaina atili o i latou lava e galulue ma paeonia. Ua olioli paeonia i le ō faatasi ma le lagolago atu a isi tagata talaʻi. Atonu e mafai ona e fuafua e galulue ma paeonia e faatasi i le vaiaso pe faalua i le masina. E mafai foi ona fetufaai mea faaletino ma paeonia, ma e matuā talisapaia lava e paeonia lenei limafoai.—Fili. 4:14-19.

⁶ E tele mea e mafai ona faia e aiga e fesoasoani ai i o latou sui o loo paeonia. E masani lava, ona mafai ona toe fetuunai galuega i le aiga ina ia faaavanoa ai se toatasi pe sili atu foi ni sui o le aiga e paeonia. Sa iai se tuafafine e toatolu lana fanau, ma e faigaluega i aso e lua o le vaiaso. E fesoasoani i ai lana fanau tama e ala i le faia o faatau ma le faia o galuega i le fale. E fesoasoani le tamateine i le faamamāina o mea ma le saunia o kuka. Talu mai lona faauuga, ua amata foi e le tamateine ona paeonia, e auauaʻi o la aso faigaluega ma lona tinā. O sea felagolagomai i totonu o le aiga ua mafai ai e le toatele ona paeonia ma aumaia ai faamanuiaga i le aiga.

⁷ O paeonia tinoū ua faamaonia le avea o i latou lava o se faamanuiaga i le faapotopotoga i le tele o auala. O lo latou maelega ma faaaʻoaʻoga, ua faalaeiauina ai le toatele ina ia faia mea e sili atu i le auaunaga. O le mea mautinoa, e ao ona tatou mananao e faia mea tatou te mafaia e lagolagoina ai i latou. O na taumafaiga autasi e aumaia ai le olioli i tagata uma ma iʻu ai i le viiga ia Ieova.