Le Toe Foi atu e Faagaee le Naunau Fiafia i le Tusi Paia
1 O nisi taimi tau te fetaiai ai i le auaunaga i le fanua ma tagata o ē tau iai sina naunau fiafia i le tala lelei ae ua tele naua mea e fai, ma lē mafai ai ona tatou talanoa ma i latou i le taimi tatou te asiasi atu ai. Po o tatou taumafai ea e toe foi atu i se isi taimi e tufa ia i latou le feau o le Malo? Atonu foi e manaia sa tatou talanoaga ma lē ona le fale, ae na te lē taliaina se lomiga. Pe tatou te toe foi atu ea e talanoa atili ma ia i le upu moni?
2 E tāua ona galueaiina maeaea la tatou oganuu ma toe tulitatao ē naunau fiafia uma tatou te ono fetaiai. Pe na o i latou ea e taliaina se tusi po o mekasini tatou te toe asiasi atu i ai? Afai o lea le tulaga, o le a tatou misia ai la ni tagata o loo naunau fiafia. E mautinoa tatou te lē mananao e faamasinoina se tasi e faapea ua lē aogā i ai nisi faalaeiauga faaleagaga, ona o lona lē talia o lomiga. (Faatusatusa i le Roma 14:4.) Atonu pe a uma la tatou asiasiga, e ono mafaufau lē e ona le fale i mea sa tatou taʻua, po o le talisapaia foi o la tatou taumafaiga e asiasi atu ia te ia. Atonu la o le a sili atu ai lona fiafia mai pe a tatou toe foi atu.
3 Pe a toe foi atu i se tagata sa tele ni ana feau sa fai, e te ono faapea atu:
◼ “Ua ou fiafia ua ta toe feiloai. Sa lē mafai se ta talanoaga i laʻu asiasiga talu ai, ona sa leai sou avanoa. Ou te mātau atu o oe o se tagata e tele naua au galuega, ma o le a faapuupuu foi la laʻu mataupu. E foliga mai e te manatu mamafa i le soifua maloloina lelei mo oe ma ē pele ia te oe. Ae, o e silafia ua folafola mai e le Atua lona faaiua o maʻi uma? Po ua lē ofoofogia ea lena tulaga? [Faataga mo se tali mai.] Seʻi mātau le manatu o i le palakalafa e 4 o lenei polosiua ua faaulutala ‘Faauta! Ou te Faia ia Fou Mea Uma Lava.’” Pe a lava le taimi, ia faitau le palakalafa ona iloilo lea o se mau e tasi mai mau o i le pito i lalo o le itulau e 4, lena o loo faaata mai ai tulaga i le lalolagi fou. Pe a tali lelei mai lē e ona le fale, atonu e mafai ona e amataina ai se suesuega faale-Tusi Paia i le aiga.
4 Pe a toe asiasi atu i se tasi na taliaina se sāvali, e mafai ona e fai atu se tala e pei o lenei:
◼ “I la ta feiloaiga talu ai, sa e taliaina ai se kopi o lenei sāvali ua faaulutalaina O Ai Moni o loo Pulea le Lalolagi? Po o faigata ea ona e talitonu, o Satani lea o loo puleaina lenei lalolagi? [Faataga mo se tali.] Seʻi mātau foi le uluai palakalafa i le itulau e 6.” Ia faitau le palakalafa, ona fesili atu lea: “Aisea ua manao ai Satani e faaseseina i tatou?” Pe a uma ona tali mai lē ona le fale, ona iloilo faatasi lea o le palakalafa lona fa i le itulau e 3. E mafai ona e talatalanoa maeaea pea i le sāvali, pe e te manao foi e faailoa atu le polosiua Po o Silasila Alofa mai ea le Atua ia i Tatou? ma talanoaina le palakalafa e 8 i le itulau e 13.
5 E iai se pogai lelei e tatau ai ona saʻo le vaai ma toe tulitatao le naunau na tatou maua i la tatou galuega talaʻi e tusa lava pe sa itiiti sina faailoaina mai. E tāua le manatu mamafa i isi, ia uunaia le loto e fesoasoani ia i latou ina ia aʻoaʻo le upu moni. Ua saunia e le faalapotopotoga a Ieova lomiga ma tuuina mai taulimaga e mafai ona fesoasoani ia i tatou e faaosofia ai le naunau o isi i o latou manaoga faaleagaga.—Mata. 5:3.
6 Afai sa manaia se lua talanoaga ma se tasi sa feoloolo sona naunau mai, aua neʻi galo ona toe foi atu i ai e atiina aʻe lena naunau. Atonu e iu ai i le amataina o se suesuega faale-Tusi Paia i le aiga, ma taitaiina ai se tasi i le ala i le ola. Matou te faalaeiauina tagata uma ina ia faaauau pea ona auai ma le mataalia i lenei galuega faasaoola.—1 Timo. 4:16.