E Aogā i Isi le Faaaogāina o Mekasini
1 Maeu so tatou fiafia i le mauaina o lomiga fou o Le Olomatamata ma le Awake! Tatou te faatauaina le avanoa ua tatou maua ina ia faitauina ai nei lomiga i se vave e mafai ai, ina ia aogā ia i tatou faamatalaga o loo auina mai ai. E lē gata i faamatalaga e aogā patino ia i tatou, ae lelei foi le sailia o ni manatu e ono faaaogā i le ofoina o mekasini i isi. Atonu tatou te mananao e faailoga ni vaega o le a fiafia tele i ai ē o loo nonofo i la tatou oganuu, po o le fai foi o ni faamaumauga i autafa o a tatou lomiga ina ia faamanatu mai ai ia i tatou manatu e ono talanoaina ma le auala e mafai ona tauaao atu ai le mataupu i tagata o lou lava vaipanoa.
2 O loo tumau pea le tāua o a tatou mekasini. E ui tatou te uai patino i le ofoina o mekasini fou, ae o le a lē faatalale ai foi i lomiga tuai, auā e lē o tuai ai fua mataupu o loo iai. Ia teu pea ni lomiga tuai i lau ato tusi, e faaleoleo ai pe a oo ina molimau atu. Atonu e aogā na kopi pe a iloa le manaoga patino o lē ona le fale. Afai e tuu se mekasini tuai, e fetaui lava le taʻu faapuupuu atu i lē ona le fale sona avanoa e faimeaalofa ai i le galuega i le lalolagi aoao.