E Iai Aafiaga Malolosi o Aʻoaʻoga Mai le Atua
1 Maeu se faaeaga mo i tatou o le mauaina o faatonuga mai Lē na Foafoaina i tatou, o Ieova le Atua! (Sala. 50:1; Isa. 30:20e) I aso nei, o loo gasolo ane ai le motu o tagata e toatele mai atunuu uma i lona mauga, o lona uiga o lana tapuaiga mamā ina ia aʻoaʻoina e ia. (Mika 4:2) E faitau miliona isi tagata o loo i aʻoga o loo faasilisilia ai mafaufauga o tagata ma le poto faalelalolagi. Peitai, o le poto na te lē amanaiaina Ieova ma lana Afioga tusia, o le vale lea i le silafaga a le Atua, ma o i latou foi o loo taitaiina e lena poto e valelea i latou.—Sala. 14:1; 1 Kori. 1:25.
2 I la tatou tauaofiaga itumalo o le a faia nei, o le a tatou iloiloina ai i se auala tutasi le malosi o aʻoaʻoga mai le Atua. O le a taaofaia le polokalama atoa e le matua “Aʻoaʻoga Mai le Atua.” O le a tatou aʻoaʻoina ai e faapea o le Afioga a le Atua faatasi ma lona agaga o loo autasia ai i tatou o se auuso i le lalolagi aoao, fafau aʻe ai o tatou uiga totino, puipuia ai i tatou mai aʻoaʻoga faatemoni, ma aʻoaʻoina ai i tatou ina ia avea ma faifeau e sili ona lelei. E faapefea la ona aogā totino ia te oe nei aʻoaʻoga mai le Atua?
3 Aogā i Olaga o Kerisiano: Ua fesoasoani aʻoaʻoga mai le Atua e taaina ai o tatou loto fuatiaifo. O tagata uma lava na fananau mai ma se loto fuatiaifo, ae ao ona aʻoaʻoina ina ia taitaia ai i tatou i le ala amiotonu ma se auaunaga e fiafia mai i ai Ieova. (Sala. 19:7, 8; Roma 2:15) E lē o fafau aʻe mafaufauga o tagata o le lalolagi i le Afioga a le Atua, ma o lea ua latou fenuminumiai ai ma lē mautonu i le mea ua tonu ma le mea ua sese. Ua aliae mai faafitauli tau amio mamā ona o le tautū o tagata e faia le mea ua tonu i o latou lava manatu. Ua mananao le tele o tagata i se saolotoga atoatoa latou te filifilia ai o latou lava ala. Latou te lē fia taliaina le puna o le poto moni. (Sala. 111:10; Iere. 8:9; Tani. 2:21) Ae ua mafai e aʻoaʻoga mai le Atua ona foia na finauga mo i tatou, ma ua tatou tumau ai i le autasi o ni tagata o le Atua ona o loo ia aʻoaʻoina i tatou. Ua tatou fesagai nei ma se lumanai mautinoa ma se loto fuatiaifo lelei, i le auai pea i la tatou faiva.
4 Ua fesoasoani ia i tatou aʻoaʻoga mai le Atua e teena ai “matagi uma lava o matāupu.” (Efe. 4:14) E lē faagaeetia i tatou i suesuega i filosofia, lea e avea ai tagata ma ē e vaavaai masei, e faamalosia ai le manatu faapito ma oo atu ai i le paʻū maulalo tau amio. Tatou te fiafia e aʻoaʻoina i tatou e Ieova, ma o lea ua tatou alofia ai le faanoanoa ma le lotomomomo ua aafia ai le tele o isi tagata. O tulafono ma lapataiga a Ieova ua pei o ‘se upu i o tatou tua,’ o loo faapea mai: “O le ala lava lenei, ia outou savavali ai.”—Isa. 30:21.
5 A Tatou Sauniga ma le Faiva: Tatou te manatu i le Eperu 10:23-25 o se faatonuga mai le Atua. I sauniga a le faapotopotoga, e aʻoaʻoina ai i tatou e Ieova. Pe o fai ea ma a tatou masani le auai pea i sauniga, pe tatou te manatu i ai faapea e lē tāua? Ia manatua, o le auaufaatasi o se vaega o la tatou tapuaiga. E lē tatau ona manatu i ai o se mea e pule ai lava oe. E lē tatau ona tatou taumafai e misia se vaega o lenei polokalama o le fafagaina faaleagaga ua saunia e Ieova mo i tatou.
6 Na tatalo Mose i le Atua e faapea: “Ia faapea ona e aʻoaʻo mai ia i matou e faitauina o matou aso, ina ia maua ai le poto i o matou loto.” (Sala. 90:12) Pe e faapea foi a tatou tatalo? Pe tatou te talisapaia ea le tāua o aso taitasi? Afai tatou te faia faapea, o le a tatou “maua ai le poto i o tatou loto” i le faaaogāina o aso taitasi i se auala uigā, e faapaiaina ai lo tatou Aʻoaʻo Sili, o Ieova le Atua. O le a fesoasoani tele aʻoaʻoga mai le Atua ia i tatou i le faataunuuina o lea tulaga.