Tausia o Manaoga Faaleagaga o Ē Logonoa
1 Ua faateleina se aofaiga o ē logonoa ua uai atu i le Leoleo Mamoe Lelei, ma ua maua ai e i latou se faiā tuutoina atu ma Ieova le Atua. (Ioa. 10:3, 11) O isi tagata i le faapotopotoga, ae maise lava o toeaina, e tatau ona mataala i manaoga faaleagaga o o tatou uso ma tuafāfine e logonoa.
2 Faafetaiaia o Manaoga o Ē Logonoa: Ua faia fuafuaga ina ia faamatala ai sauniga a le faapotopotoga i le gagana e faaaogā ai taga, i so o se faapotopotoga o iai ni faamatalaupu agavaa. Afai e leai se tasi i le faapotopotoga e iloa lena gagana, atonu e talafeagai le faasino atu o tagata logonoa i se faapotopotoga e latalata ane o loo faia ai lena auaunaga. O le mea moni, afai e lē o faia se fuafuaga faapea i lau faapotopotoga, atonu la e lelei mo tagata talaʻi ua tofia mo lea auaunaga, ona auauai e nonofo faatasi ma tagata logonoa ma faailoa i ai faamaumauga o manatu autū sa talanoaina.
3 Fuafuaga a le Matagaluega ma le Faapotopotoga: O fuafuaga mo le faamatalaina o le gagana e faaaogā ai taga i fonotaga a matagaluega ma fonotaga o aso faapitoa, e faatulaga e le ovasia o le matagaluega. Atonu o le a filifilia se toeaina po o se auauna o le faiva ua agavaa e faamaopoopoina lea vaega. E mafai ona tofia nisi uso ma tuafāfine agavaa e auauai i le faamatalaina o le polokalama o le fonotaga. O le faatulagaga foi lena e tasi e ao ona faia i faapotopotoga, ina ia mautinoa ai o loo lelei ona tausia manaoga o ē logonoa.
4 E lelei mo ē logonoa ona alaala i se nofoaga e mafai ona latou iloa lelei atu ai le faamatalaupu ma le pulelaa. E tāua le faia faapea i sauniga a le faapotopotoga, ma i fonotaga matagaluega. Ua fautuaina le faamatalaupu e alaala i se nofoa pe a toalaiti tagata logonoa e iai i sauniga a le faapotopotoga. Afai e mafai, e lelei i toeaina ona talanoa atu i se uso logonoa e taumatuaina, mo ni fautuaga patino i faatulagaga fetaui o o latou nofoa.
5 Afai o iai se toeaina po o se auauna o le faiva e agavaa i le faamatalaupu, ma pe afai ua talafeagai foi lea tulaga ma le aofaiga o uso ma tuafāfine logonoa, atonu la o le a filifili toeaina pe e ao ona faia atoa nisi sauniga i le gagana e faaaogā ai taga. Atonu e lelei ona faia lea fuafuaga i le Suesuega Tau Tusi a le Faapotopotoga, o le sauniga muamua lea faalevaiaso. Afai e mananao le faapotopotoga e faia nisi sauniga o sauniga e lima faalevaiaso i lena lava gagana, (po o se isi lava gagana e ese mai le gagana Samoa), e ao la i toeaina ona logo le Sosaiete e tusa ai ma lo latou manaoga. E ao ona matauina, o le toatele o tagata matutua e logona i le Iunaite Setete ma ona vaipanoa, e sili atu ia i latou le Gagana Amerika e Faaaogā ai Taga; o isi atunuu e iai lava a latou gagana e faaaogā ai taga.
6 E ui o fesootaiga a ē logonoa ma ē e lelei le faalogo e ono manaomia ai ni taumafaiga faapitoa a vaega uma e lua, ae e ao foi i ē uma o le faapotopotoga ona taumafai e faamasani le tasi i le isi, ina ia mafai ai ona iai se feofoofoaiga moni o faalaeiauga. (Epe. 10:24) O le iai o lena agaga i le auuso, o le a mafana ai foi le faalogona o ē fou mai.