Auai i Sauniga—O se Avega Tauave Uigā

¹ O faapeī le uigā ia te oe o le auai i sauniga? O se fesili faatupu manatu lea fesili, a ea? E lē taumate o le toatele lava o i tatou e faapea mai tatou te talisapaia sauniga. E ui i lea, ua faaalia mai i lipoti lata mai nei le paʻū i lalo o le aofai o tagata e auai i sauniga i le tele o faapotopotoga. O le ā le pogai? Po o faatagaina ea e nisi o i tatou galuega faaletino e lē o manaomia, le vaivai, o meaaoga, po o sina maʻi o le tino, po o sina faaletonu o le tau e taofia mai ai lo tatou tiutefai o le auai e lē aunoa i sauniga? (Teu. 31:12) Talu ai o se manaoga faale-Tusi Paia lenei, e ao ai ia i tatou uma taitoatasi ona iloiloina i le tatalo le fesili e faapea, O faapeī le uigā ia te aʻu o le auai i sauniga?

² O nisi o o tatou uso latou te savalia ni ala pefu mo le tele o itula, ma asā vaitafe e tumu i kolokotaila, ina ia auai i sauniga. I lau lava faapotopotoga, atonu o iai i latou o ē faamaoni e “lē taitai ona misia” ni sauniga e ui i ni faafitauli tugā o le soifua maloloina, le lē atoatoa o le malosi o le tino, le tele o galuega i o latou fale faigaluega, po o ni meaaoga foi e manaomia ona faia i aʻoga. (Luka 2:37) Aisea latou te faia ai ni taumafaiga ina ia auai? Auā ua latou iloa e lē mafai i lo latou lava malosi ona latou faafetaiaia ai faafitauli o lenei lalolagi ua tumu i omiga. E tatau ona latou faalagolago atu i le malosi ua saunia e le Atua.—2 Kori. 12:9, 10.

³ I aso nei, ua tatou mulimuli i le faaaoaoga na faataatia e uluai Kerisiano, o ē sa faapotopoto e lē aunoa e tatalo, e fetufai i mea na tutupu, ma suesue le Afioga a le Atua. (Galu. 4:23-30; 11:4-18; Kolo. 4:16) Ua tatou maua faatonuga e uiga i valoaga ma aʻoaʻoga a le Tusi Paia, faapea ma amioga faale-Atua ma amioga faa-Kerisiano, faapea foi aoaiga i taimi fetaui e faaleleia ai o tatou olaga i le taimi nei, e ala i le faatatauina ma le faaeteete o mataupu silisili faale-​Tusi Paia. (1 Timo. 4:8) E lē gata i lea, ua faamanatu mai ia i tatou lo tatou faamoemoe e faapea, o le a faamutaina faafitauli ma mafatiaga i se aso. O lea, e matuā tāua ai le faaolaola pea o lenei faamoemoe.—Epe. 6:19.

⁴ O faapeī le uigā i lou aiga o le auai i sauniga? Pe avea ea o se vaega o lau faasologa e pei o le taimi e faaalu i au meaai po o se galuega faaletino? I po o aso sauniga, po o e faalotolotolua ea pe e te alu pe leai, po o avea le aufaatasi e lē aunoa ma uso o se mea e lē tuua i le faitalia a le tagata lava ia i lou aiga? E toatele tagata talaʻi ua latou manatua le faaaoaoga a o latou mātua tuuina atu a o latou tuputupu aʻe. Na faamatala mai ma le fiafia e se tasi toeaina e faapea: “O se mea e lelei ai tele loʻu Tamā, o lona faamautinoaina pea lea po o auai uma le auaiga i sauniga. Afai e maʻi se tasi, e toatasi se tagata o i matou e nofo, ae ō uma le isi vaega o le aiga i le sauniga!”

⁵ I isi lomiga o loo faasolo mai o La Tatou Faiva o le Malo, o le a tatou talanoaina ai le tāua o sauniga taitasi a le faapotopotoga, faatasi ma le manatu o le fesoasoani i le atiina aʻe o le talisapaia mo nei sauniuniga faaleagaga. Afai ua faasolo ina vaivai lou auai i sauniga, matou te mautinoa o le a fesoasoani nei mataupu ia te oe e te iloatino ai mea na ua e misia. O le a aofia ai faamanatuga e aogā mo i latou o loo taitaia sauniga, faapena foi manatu e mafai e i tatou uma ona faatatauina pe a sauniuni pe auai foi i sauniga. Aisea e lē potopoto ai o se aiga ma iloiloina lenei mataupu i le tatalo, e uiga i la outou masani o le auai i sauniga? Ona faia lea o so o se fetuunaiga moomia i la outou faasologa. O le auai e lē aunoa i sauniga, o se vala e matuā tāua lea o la tatou aʻoaʻoga faatiokarate, ma e ao ona matuā faatauaina.