Ua Faaauupegaina i Tatou e le Sauniga o le Auaunaga mo Galuega Lelei Uma

¹ O le fuafuaga o le Sauniga o le Auaunaga, ia uunaia ma faaauupegaina i tatou e faia se sao atoatoa i le galuega talaʻi ma le faia ma soʻo. (2 Timo. 3:17) Ae afai tatou te lē sauniuni lelei mo le sauniga, pe lē faatatauina foi mea ua tatou aʻoaʻoina, o le a itiiti la aogā e maua mai ai.

² O le sauniuni muamua mo le sauniga o le a fesoasoani ia te oe e mauaina ai atoatoa aogā o faatonuga. Ia autalu lomiga o le a faaaogāina, ma ave i le sauniga ina ia mafai ona e mulimuli ai i vaega uma o loo faia ma mafai ai foi ona faia sou sao. Ia avea oe o sē e faalogologo totoʻa atu, ma faia ni faamaumauga e faaaogā i se taimi mulimuli.

³ E autaluina ma le faaeteete e le ovasia taʻitaʻi le faasologa o vaega o le sauniga. O toeaina agavaa ma auauna o le faiva e tofia ia sauniunia nei vaega. (om itu. 70) O faapotopotoga e toaitiiti toeaina ma auauna o le faiva e iai, e mafai ona tofia nisi uso agavaa e fesoasoani ia i latou. (km faa-Peretania 10/76, Pusa Fesili) E ao i failauga taitasi ona sauniuni maeaea, ia mulimulitui i faatonuga ua saunia, ma ia mautinoa lona lē ova taimi.

⁴ E masani ona amata le sauniga i faasilasilaga. O le uso e tofia mo lea vaega e ao ona faafesootai muamua le ovasia taʻitaʻi ia iloa ai mataupu e manaomia ona taʻua. Atonu e aofia ai ni tusi mai le Sosaiete po o le faamanatu atu o fuafuaga mo le auaunaga po o ni lipoti faalemasina. Atonu tatou te iloa o loo iai ni tagata o loo mamaʻi e manaomia ona asiasia, pe fia faalogo foi i galuega a le faapotopotoga ua fuafua mo le lumanai. Ia uai totoʻa atu ina ia e iloa ma nofo sauni ai e fai sou sao.

⁵ A oo i vaega o le sauniga e fai ai le sao a le aofia, ia sauniuni e ala i le faitau uma o le mataupu ma suʻe mau ua sii mai. Mafaufau i le auala o e fuafua e faatatau ai fautuaga ma ituaiga o faaopoopoga e mafai ona e faia e faalaeiau ai i isi. E ono mafai ona e faatino le aogā o le faatonuga i le taʻua puupuu o se mea na tupu.

⁶ Pe a iai se faataitaiga, taumafai e faaata ai oe i lena tulaga, ma mafaufau i le mea o le a e fai atu ai. Mātau manatu o loo faaaogā mo le fefulisaiga. Taumafai e toe manatunatu i le mea na e taʻua i le taimi mulimuli na e iai i lenei ituaiga o tulaga, ma iloilo le auala e mafai ona fesoasoani ai manatu na faataitaia ina ia faaleleia ai lea tulaga i le lumanai.

⁷ O i latou e auai i faataitaiga ma faatalanoaga e ao ona lelei ona faataitaia muamua. E ao i tagata taitoatasi ona iloa lelei lana tala o le a fai atu ma le mea foi o loo ia faamoemoe e faia i le pulelaa. O vaega e lē faataitaia lelei muamua e masani lava ona lē uunaia pe faalaeiau ai foi le aofia. O nisi tagata e fai a latou faataitaiga, latou te sauniuni e faataitai a latou vaega i le faaiuga o le Suesuega o Le Olomatamata ina ia mafai ona latou faataitaia i le pulelaa, ma iloa ai e uso o loo taulimaina mea faaleotele leo le tulaga latou te manaomia.

⁸ E aofia i le polokalama i nisi taimi se lauga e patino i manaoga o le faapotopotoga po o se mataupu fetaui mai Le Olomatamata. Ia faalogo lelei, ia goto i le loto le fautuaga ma taumafai e faatatau.

⁹ Tatou te mananao ina ia “saunia mo galuega lelei uma.” (2 Timo. 2:21) O le Sauniga mo le Auaunaga o le tasi lea o sauniuniga a Ieova ua ia faia e fesoasoani ai i le faia o lea galuega. O le auai pea ma le faamaoni ma se taumafaiga filigā e faaaogā mea ua tatou aʻoaʻoina, e mautinoa o le a fesoasoani ia i tatou ina ia mafai ona tatou “matuā faaiuina [la tatou] faiva.”—2 Timo. 4:5.