Ia Tuliloaina Pea Galuega Faatiokarate a o Faagasolo Aso Mālōlō
1 Ua aumaia e aso mālōlō avanoa e faia ai se sao i galuega eseese. O le toatele o i tatou e fiafia e faaaogā o tatou aso mālōlō e fai ai se isi galuega e ese mai pe mālōlō ai. Peitai, e ao ona tatou leoleo faasaga i le faatagaina o a tatou faasologa faatiokarate e faalavelaveina.—Fili. 3:16.
2 Tatou te tulimataia ma le naunau le tauaofiaga itumalo i tausaga taitasi. Pe ua faia ni au fuafuaga maoti e auai, fuafuaina se auala e ō atu ai, ma se apitaga pe a manaomia? Po o e mafaufau e faaaofia ai se tasi i lau faapotopotoga atonu o loo manaomia se fesoasoani totino? O se gaoioiga lelei faapena o le agalelei, e mafai ona aumaia ai faamanuiaga mo outou uma.
3 Afai o le a iai ni ou taimi avanoa, e pei o le taimi o tuuaga o aʻoga, po o e mafaufau e aapa atu mo le faateleina o sou sao i le faiva? O le toatele ua latou iloaina o se taimi lelei lea e auai atu ai o se paeonia lagolago. O lenei tulaga, e masani lava ona taitaiina atu ai i faaeaga e sili atu o le auaunaga. E mafai e aiga ona latou mauaina le olioli moni i le galulue faatasi o se aiga i ni aso atoa i le faiva. Po o le ā lava le tulaga, pe mafai ea ona e faateleina le taimi e te faaaluina i le auaunaga? E ao ona mafai e le toatele ona seleseleina mai ni aogā i le auai i le molimau atu i itula o le afiafi.
4 Ae faapefea le fesoasoani atu i se faapotopotoga o loo manaomia se fesoasoani i le galueaiina o a latou oganuu? Atonu o iai isi i lau faapotopotoga e fiafia e galulue faatasi ma oe i se vaiaso pe lua i le oganuu o loo tele ai le manaoga. Afai e toaitiiti lau vaega, atonu o ni tagata talaʻi mai se faapotopotoga tuaoi o le a aufaatasi atu ia oe. Afai e faatapulaa le mamao e mafai ona e malaga ai, atonu e mafai ona faasino atu e le ovasia o le matagaluega se faapotopotoga e lata ane o le a talisapaia lau fesoasoani.
5 Po o e fuafuaina se malologa mamao e ese mai lou aiga? Afai o lea, po o e faia ni fuafuaga e te auai i sauniga i le nofoaga lea o le a e asiasi atu i ai? Ae faapefea le galulue i le auaunaga i le fanua faatasi ma uso i lena nofoaga? O le faaaofia ai o lenei mea i lau malologa e mafai ona matuā tauia ai oe ma isi. (Roma 1:11, 12) E lē gata i lea, pe mafai ona e molimau atu lē fuafuaina a o e faimalaga? Ia faamautinoa o ave lau Tusi Paia ma nisi lomiga. Ia faaaogā nisi o ou taimi avanoa e faitau ai au tusi ma lau suesuega faale-Tusi Paia. Ia manatua, e ui lava ina masani ona tatou manaomia se malologa mai a tatou galuega faalelalolagi, ae tatou te lē mananao ai e mālōlō mai le auauna atu ia Ieova.
6 E ao i toeaina ona mataala i le tausia o galuega a le faapotopotoga i se tulaga e maopoopo lelei. Afai o le a toesea se toeaina po o se auauna o le faiva, e ao ona faia se fuafuaga mo isi ina ia vaaia a latou tiute tauave. O le logoina mamao muamua o le ovasia taʻitaʻi i le aso o le a toesea ai nei uso, o le a fesoasoani lea ia te ia i le iloa ua faia ni fetuutuunaiga talafeagai.
7 Ioe, o aso mālōlō e mafai ona avea o se taimi e matuā pisi tele ai. Peitai o faatosinaga, e faigofie ona faalavelaveina ai lau faasologa lelei i le auaunaga o le Malo. Ia faia le mea e silisili i avanoa o ou aso mālōlō. Ia iloa mea faaleagaga e faamuamua, ma ia tumau i ai.—Fili. 1:10.