O ā Au Fuafuaga mo le Vaitaimi e Lagilelei ai le Tau?

¹ Pe e lē moni ea e sili atu ona tatou ausia o tatou sini aogā pe a tatou fuafuaina ma le atamai auala e faaaogā lelei ai o tatou taimi avanoa? O le vaitaimi e lagilelei ai le tau ua aumaia ai ia i tatou avanoa eseese e faaauiluma ai manaoga faatiokarate. (Faata. 21:5) O ā nisi o nei avanoa?

² O le Tauaofiaga “Le Ala a le Atua i le Ola” o se tasi lea o mea e ao ia i tatou uma lava ona faaaofia i a tatou fuafuaga. O le a auai atu ni sui usufono ua filifilia i tauaofiaga faava-o-atunuu i atunuu i fafo. I se taimi mulimuli ane, o le a faia ai la tatou lava tauaofiaga itumalo. Ia fuafua taimi e mālōlō ai mai le galuega po o le aʻoga ina ia mafai ona e auai i aso taitasi o le tauaofiaga. Pe afai e manaomia, ia fai se fuafuaga mo sou āpi ma sauniuni mamao mo lau faigamalaga.

³ Aisea e lē fuafua ai e faateleina au gaoioiga i le auaunaga i le fanua i le vaitaimi e lagilelei ai le tau? O le tau lē timu o aso ma faaitiitia le vevela o le tau, e mafai ona e maua ai le avanoa e faaalu ai se taimi tele i le galuega talaʻi. O tuuaga a aʻoga ua maua ai e tagata talavou le avanoa e paeonia lagolago ai mo se masina se tasi pe sili atu foi i masina ia o loo faagasolo mai. E mafai foi e isi ona fuafua mamao ina ia paeonia lagolago ia Aokuso, lea e lima faaiuga o vaiaso. Ia Aokuso i le tausaga nei, a o tatou faaiuina le tausaga faaleauaunaga, o le a faia ai se taumafaiga tuufaatasi mo tagata uma lava ina ia faia atoatoa se sao i le faiva i se tele e mafai ai.

⁴ Po o e fuafua e fesoasoani atu i se faapotopotoga taulata ane o manaomia se fesoasoani i le galueaiina atoa o la latou oganuu? E mafai e le ovasia matagaluega ona faailoa atu i toeaina e uiga i le manaoga o loo tulai mai i lo outou vaipanoa. Pe afai foi ua e agavaa ma manao e talosaga atu i le Sosaiete ina ia galueaiina oganuu e seāseā ona galueaiina pe lei tofia foi i ni faapotopotoga, ia maua se pepa talosaga mai toeaina o la outou faapotopotoga. Afai o le a e alu ese mai lou aiga ma alu atu i se isi mea e te faimalologa ai, ia fuafua e auai i sauniga ma faia se sao i le auaunaga i le fanua ma le faapotopotoga i lena vaipanoa. Afai e te asiasi atu i ni tauaiga e lē o ni Molimau a Ieova, ia muai sauniuni ni auala e mafai ai ona e tufa atu le upu moni ia i latou.

⁵ O ā au fuafuaga mo le vaitaimi e lagilelei ai le tau? E mautinoa o loo e manao i se faafouina mo oe i le itu faaletino. Ae aua neʻi faagaloina ai avanoa e sili atu ona tāua o loo maua e faamalosia ai oe lava i le itu faaleagaga e ala i le tuu faamuamua pea o manaoga o le Malo i lou olaga.—Mata. 6:33; Efe. 5:15, 16.